វៀតណាមកំណត់ការ​ផលិត​កប៉ាល់ជាម៉ាស៊ីនកំណើនឧស្សាហកម្មថ្មី

​វៀតណាម​បាន​កំណត់​ផលិតកម្ម​កប៉ាល់ជា​សសរស្តម្ភយុទ្ធសាស្ត្រនៃសេដ្ឋកិច្ច​សមុទ្ររបស់ខ្លួន ដោយមានគោលបំណងប្រែក្លាយ​ឧស្សាហកម្មនេះ ឱ្យទៅជាកម្លាំងចលករនៃកំណើនឧស្សាហកម្ម និង​សេដ្ឋកិច្ច ការអភិវឌ្ឍភស្តុភារ និងសន្តិសុខជាតិ ​ចំពេល​ការប្រកួតប្រជែងសកល និងសម្ពាធខ្សែ​ច្រវ៉ាក់ផ្គត់ផ្គង់។ នេះបើតាមការចុះផ្សាយរបស់ទីភ្នាក់ងារសារព័ត៌មាន​ VNS។

លោក ង្វៀន ទៀន ដាត (Nguyễn Tiến Đạt) អនុប្រធានសាជីវកម្មឧស្សាហកម្មផលិតកប៉ាល់ (SBIC) បាន​និយាយ​ក្នុងសិក្ខាសាលាមួយកាលពីថ្ងៃចន្ទ ថា គោលការណ៍ណែនាំថ្មីៗនេះរបស់បក្សកុម្មុយនិស្តវៀតណាម បានបញ្ជាក់ជាថ្មីថាការ​ផលិត​កប៉ាល់ជាឧស្សាហកម្មជាតិដ៏សំខាន់ ដោយផ្លាស់ប្តូរវាពីវិស័យផលិតកម្មតូចចង្អៀត ទៅជា​វិស័យ​ស្នូល​ក្នុង​យុទ្ធសាស្ត្រអភិវឌ្ឍន៍ជាតិ។ លោកបាននិយាយថា ​ឧស្សាហកម្មផលិតកប៉ាល់គាំទ្រដល់អធិបតេយ្យភាពសមុទ្រ ស្វ័យភាពដឹកជញ្ជូន ការកាត់បន្ថយការពឹងផ្អែកលើទីផ្សារបរទេស ការចំណាយលើភស្តុភារទាប និងការផ្លាស់ប្តូរថាមពលបៃតង ហើយអាចក្លាយជាម៉ាស៊ីនកំណើនថ្មី ដែលរួមចំណែកដល់ការពង្រីកផលិតផលក្នុងស្រុកសរុប (GDP) កាន់តែខ្ពស់។

​យ៉ាងណាមិញ​ លោកបានកត់សម្គាល់ពីបញ្ហាប្រឈមដែលកំពុងបន្តកើតមាន រួមទាំងសមត្ថភាពហិរញ្ញវត្ថុមានកម្រិត ភាពផុយស្រួយនៃផលិតកម្ម កម្សោយនៃការគាំទ្រ ​​និង​កង្វះការរួមបញ្ចូលជាមួយ​ខ្សែច្រវ៉ាក់ផ្គត់ផ្គង់ទ្រង់ទ្រាយធំ ដែលបន្តកម្រិតដល់​ការប្រកួតប្រជែងរបស់វៀតណាមលើវិស័យនេះ​។

ដោយលែក​លោក Phạm Ngọc Linh អនុប្រធានសហភាពសមាគមវិទ្យាសាស្ត្រ និងបច្ចេកវិទ្យា​វៀតណាម (VUSTA) ឯណោះវិញ បានមានប្រសាសន៍ថា ឧស្សាហកម្ម​ផលិតកប៉ាល់ នៅតែប្រឈមមុខនឹងឧបសគ្គធំៗក្នុងការទទួលបានដើមទុន បច្ចេកវិទ្យាទំនើប និងធនធានមនុស្សដែលមានគុណភាពខ្ពស់ ដែលត្រូវការសម្រាប់​សំណង់«កប៉ាល់បៃតង និងឆ្លាតវៃ»។ លោក​បានកត់សម្គាល់​ថា កងនាវាដឹកជញ្ជូនរបស់វៀតណាមនៅតែខ្សោយ ​ហើយ​ពឹងផ្អែកយ៉ាងខ្លាំងទៅលើក្រុមហ៊ុនដឹកជញ្ជូនបរទេស។

​ទោះយ៉ាងណាក៏ដោយ លោក Đạt បាននិយាយថា វិស័យនេះទទួលបានសន្ទុះ​ បន្ទាប់ពីការរៀបចំរចនាសម្ព័ន្ធឡើងវិញ ដោយក្រុមហ៊ុនក្នុងស្រុកឥឡូវនេះអាច​ផលិតកប៉ាល់បំពាក់​បច្ចេកវិទ្យាខ្ពស់ ដែលមិនប៉ះពាល់ដល់បរិស្ថាន និងសូម្បីតែអាចផលិត​កប៉ាល់យោធាទំនើបៗ។ ​លើសពីនោះ វៀតណាមក៏ត្រូវបានចាត់ទុកថាជាប្រទេសមួយក្នុងចំណោមប្រទេស​ផលិត​កប៉ាល់កំពូលទាំង ១០​ របស់ពិភពលោកតាមសមត្ថភាពផងដែរ ទោះបីជាគម្លាតផ្នែកហិរញ្ញវត្ថុ និងបច្ចេកវិទ្យានៅតែមានក៏ដោយ៕

​