ព័ត៌មានអន្ដរជាតិ

ហេតុអ្វី ន័រវេសលុបកិច្ចសន្យាលក់មីស៊ីលឲ្យម៉ាឡេស៊ីក្នុងតម្លៃរាប់លានដុល្លារ ? តើមីស៊ីលនោះមានអានុភាពកម្រិតណា?

បានផុស

១ ខែ មុន

នៅ

ថ្ងៃចន្ទ ១ មិថុនា ២០២៦

ដោយ

ប្រទេសន័រវេសដែលមានកិត្តិស័ព្ទល្បីល្បាញខាងប្រគល់ពានរង្វាន់ណូបែលសន្តិភាព (Peace Prize) ដល់បុគ្គលឆ្នើមប្រចាំឆ្នាំនៅជុំវិញពីភពលោក ប៉ុន្តែប្រទេសនេះក៏មានឧត្តមភាពក្នុងការផលិតអាវុធ មីស៊ីល ទៅឲ្យប្រទេសផ្សេងៗដែរ។

រឿងរ៉ាវផ្ទុះកក្រើកល្បីល្បាញចុងក្រោយ ដោយសារតែជម្លោះជាមួយម៉ាឡេស៊ី នៅពេលដែលរដ្ឋមន្ត្រីការពារជាតិម៉ាឡេស៊ី Mohamed Khaled Nordin បានទម្លាយឲ្យដឹងអំពីភាគីដៃគូប្រទេសន័រវេស ដែលលុបចោលអាជ្ញាប័ណ្ណនាំចេញមីស៊ីលនៃក្រុមហ៊ុនការពារជាតិ Kongsberg Defence & Aerospace (KDA) ផ្គត់ផ្គង់មីស៊ីលវាយប្រហាររបស់កងទ័ពជើងទឹកទៅកាន់ប្រទេសម៉ាឡេស៊ី នៅអំឡុងកិច្ចប្រជុំសន្តិសុខនៅប្រទេសសិង្ហបុរីពីថ្ងៃទី២៩ដល់៣១ខែឧសភា។

យ៉ាងណាក៏ដោយ ការលុបចោលកុងត្រារបស់ភាគីន័រវេស កើតឡើងដោយសារតែពាក់ព័ន្ធនឹងគោលនយោបាយសន្តិសុខដ៏តឹងរ៉ឹងរបស់ន័រវេសផ្សាភ្ជាប់ជាមួយបច្ចេកវិទ្យាយោធាដ៏រសើប បង្កឱ្យមានការប៉ះទង្គិចគ្នាខាងការទូតយ៉ាងធ្ងន់ធ្ងរ ព្រោះម៉ាឡេស៊ីទាមទារសំណងជាង ២៥១លានដុល្លារសម្រាប់កិច្ចសន្យាដែលត្រូវបានលុបចោល ពីការលើការប្រគល់ប្រាក់១៤៧លានដុល្លាររបស់ម៉ាឡេស៊ីទៅឲ្យន័រវេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារសារព័ត៌មាន AFP ផ្សាយចុងខែឧសភា ឆ្នាំ២០២៦ ក្នុងនោះមាន មីស៊ីលវាយប្រហាររបស់កងទ័ពជើងទឹក (NSM) គឺជាមីស៊ីលប្រឆាំងនាវានិងមីស៊ីលវាយប្រហារលើដីជំនាន់ទី៥ ដ៏ទំនើបផងដែរ។ វាមានល្បឿនលឿនក្រោមសំឡេង រចនាបែបលាក់បាំង មានចម្ងាយរបស់វាលើសពី ៣០០គីឡូម៉ែត្រ។ មីស៊ីលប្រភេទនេះ ត្រូវបានរចនាឡើងជាពិសេសសម្រាប់ការរួមបញ្ចូលទៅក្នុងកងនាវាចរទំនើបៗ ដើម្បីគេចពីប្រព័ន្ធការពារដែនអាកាសទំនើប។

+ ហេតុអ្វីបានជាប្រទេសន័រវេសលុបចោលកិច្ចសន្យា ជាមួយម៉ាឡេស៊ី?

មានហេតុផលបីសំខាន់ៗ ដែលធ្វើឱ្យន័រវេសលុបកិច្ចសន្យារាប់លានដុល្លារ ដែលធ្វើឲ្យម៉ាឡេស៊ីខឹងយ៉ាងខ្លាំង និងបានចោទប្រកាន់ភាគីន័រវេសដែលធ្វើឲ្យចំណងមិត្តភាពនៃប្រទេសទាំងពីរបែកបាក់ និង មិនអាចប៉ះប៉ូវឲ្យបានដូចដើមវិញនោះទេ។

ហេតុផលទី១. បរិបទសន្តិសុខថ្មី៖ ក្រសួងការបរទេសន័រវេសបានបញ្ជាក់ថា ការគ្រប់គ្រងការនាំចេញលើបច្ចេកវិទ្យាការពារជាតិក្នុងស្រុកត្រូវរឹតបន្តឹងយ៉ាងខ្លាំង

ហេតុផលទី២. ការរឹតបន្តឹងរបស់អង្គការណាតូ និងសម្ព័ន្ធមិត្ត៖ ក្រោមច្បាប់របស់ប្រទេសន័រវេសដែលបានកែសម្រួល ការនាំចេញអាវុធរសើបបច្ចុប្បន្នត្រូវបានកំណត់ទាំងស្រុង សម្រាប់តែសមាជិកអង្គការណាតូ និងសម្ព័ន្ធមិត្តជិតស្និទ្ធបំផុតរបស់ប្រទេសនេះប៉ុណ្ណោះ។

ហេតុផលទី៣. ការរឹតបន្តឹងលើសមាសធាតុ៖ របាយការណ៍ឧស្សាហកម្មក៏ចង្អុលបង្ហាញពីផលវិបាកដែលអាចកើតមានទាក់ទងនឹងសមាសធាតុរបស់សហរដ្ឋអាមេរិកក្នុងមីស៊ីល (ដូចជាឧបករណ៍បង្វិល) ប្រឈមនឹងការរឹតបន្តឹងលើការនាំចេញរបស់ភាគីទីបីយ៉ាងតឹងរ៉ឹង។ ក្រុមហ៊ុនផលិតអាវុធ Kongsberg Defence & Aerospace គឺជាបុត្រសម្ព័ន្ធដ៏សំខាន់មួយរបស់ក្រុមហ៊ុន Kongsberg Group មានឫសគល់ជាមួយឃ្លាំងអាវុធកងទ័ពជើងទឹករាជវង្សន័រវេស ត្រូវបានបង្កើតឡើងក្នុងឆ្នាំ ១៨១៤។

សព្វថ្ងៃនេះ វាគឺជាក្រុមហ៊ុនម៉ៅការការពារជាតិលំដាប់កំពូលរបស់ប្រទេសន័រវេស ទទួលស្គាល់ជាសកលលើប្រព័ន្ធមីស៊ីលដីទៅអាកាសកម្រិតខ្ពស់ជាតិ(NSM, NASAMS) និងស្ថានីយ៍អាវុធពីចម្ងាយប្រើប្រាស់ដោយយោធាទូទាំងពិភពលោក។ អ្វីដែលក្រុមហ៊ុន KDA ផលិតសព្វថ្ងៃ គឺផ្តោតលើ ប្រព័ន្ធមីស៊ីល ប្រព័ន្ធការពារដែនអាកាស និងស្ថានីយ៍អាវុធពីចម្ងាយ ដោយរួមបញ្ចូលបំរែបំរួលបាញ់បង្ហោះ ការណែនាំ និងប៉មបាញ់ជាក់លាក់រាប់សិប៕

សម្រួល៖ ណឺ មិនា