ព័ត៌មានអន្ដរជាតិ

UN ព្រមានពិភពលោកឲ្យត្រៀមខ្លួន ចំពោះបាតុភូត El Niño នាំមកនូវអាកាសធាតុដ៏អាក្រក់

បានផុស

១ ខែ មុន

នៅ

ថ្ងៃអង្គារ ២ មិថុនា ២០២៦

ដោយ

អង្គការសហប្រជាជាតិ (UN) ព្រមានថា ពិភពលោកត្រូវតែត្រៀមខ្លួនសម្រាប់ការវិលត្រឡប់មកវិញនៃបាតុភូត El Niño ដែលនាំមកនូវអាកាសធាតុដ៏អាក្រក់បំផុត ដោយមានទាំងភ្លៀងធ្លាក់ខ្លាំងបណ្តាលឲ្យទឹកជំនន់ និងគ្រោះរាំងស្ងួតដ៏អាក្រក់។

អង្គការឧតុនិយមពិភពលោក (WMO) បានឲ្យដឹងនៅថ្ងៃអង្គារថា គំរូអាកាសធាតុធម្មជាតិដ៏មានឥទ្ធិពល កំពុងបង្កើនសីតុណ្ហភាពពិភពលោក និងធ្វើឱ្យភ្លៀងធ្លាក់កាន់តែអាក្រក់ទៅៗ មានឱកាសកើតឡើង ៨០% មុនខែកញ្ញា និង ៩០% បន្តរហូតដល់ខែវិច្ឆិកា។

យោងតាមកាសែត The Guardian ចុះផ្សាយថ្ងៃទី០២ ខែមិថុនា ឆ្នាំ២០២៦ អង្គការទាំងពីររកឃើញគំរូភាគច្រើនបានព្យាករណ៍ពីការវិលត្រឡប់មកវិញនៃបាតុភូតក្នុងមហាសមុទ្រនិងបរិយាកាសលាយឡំជាមួយកម្លាំងមធ្យម និងអាចឈានដល់ខ្លាំងទៀតផង។ អ្នកវិទ្យាសាស្ត្រធ្លាប់បានព្រមានថា វាអាចជាកម្លាំងខ្លាំងបំផុតនៅសតវត្សនេះ។

ប្រធានអង្គការសហប្រជាជាតិ លោក António Guterres ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គលេខាធិការអង្គការសហប្រជាជាតិ លោក António Guterres ព្រមានថា៖ « ពិភពលោកត្រូវតែចាត់ទុកវាថាជាការព្រមានបន្ទាន់ អំពីអាកាសធាតុ។ ស្ថានភាព El Niño នឹងចាក់សាំងលើភ្លើងនៃពិភពលោកដែលកំពុងឡើងកម្ដៅ។ ផលប៉ះពាល់នឹងវាយប្រហារកាន់តែខ្លាំង ធ្វើដំណើរកាន់តែឆ្ងាយ និងឆ្លងកាត់ព្រំដែនក្នុងល្បឿនដ៏គ្រោះថ្នាក់»។

គួរបញ្ជាក់ថា បាតុភូត El Niño ថ្មីបំផុត បានកើតឡើងកាលពីឆ្នាំ ២០២៣-២៤ គឺជាបាតុភូតមួយក្នុងចំណោមបាតុភូតខ្លាំងបំផុតទាំងប្រាំបានកត់ត្រាទុក។

អង្គការ WMO ថា សីតុណ្ហភាពខ្ពស់ខុសពីធម្មតាត្រូវបានព្យាករណ៍នៅស្ទើរតែគ្រប់តំបន់ទាំងអស់នៃភពផែនដីសម្រាប់រយៈពេលបីខែខាងមុខ ព្រមទាំងមានលទ្ធភាពនាំឱ្យមានភ្លៀងធ្លាក់ខ្លាំងនិងគ្រោះរាំងស្ងួត។ ទោះបីជាបាតុភូត El Niño នីមួយៗមានលក្ខណៈប្លែកក៏ដោយ អ្នកវិទ្យាសាស្ត្រភ្ជាប់ពួកវាជាមួយនឹងភ្លៀងធ្លាក់ខ្លាំងក្នុងតំបន់ខ្លះនៃអាមេរិកខាងត្បូង ភាគខាងត្បូងសហរដ្ឋអាមេរិក តំបន់អាហ្វ្រិក និងអាស៊ីកណ្តាល។

ចំណែក លក្ខខណ្ឌរាំងស្ងួតនឹងប៉ះពាល់ដល់អាមេរិកកណ្តាល ភាគខាងជើងអាមេរិកខាងត្បូង តំបន់ការ៉ាប៊ីន អូស្ត្រាលី ឥណ្ឌូណេស៊ី និងផ្នែកខ្លះនៃអាស៊ីខាងត្បូង។

លោក Gareth Redmond-King មកពីអង្គភាពស៊ើបការណ៍សម្ងាត់ថាមពល និងអាកាសធាតុ (ECIU) និយាយថា ការរកឃើញចុងក្រោយបំផុតគឺជាដំណឹងអាក្រក់ សម្រាប់ការផ្គត់ផ្គង់ស្បៀងអាហារ ខណៈមនុស្សកំពុងស្ថិតក្រោមភាពតានតឹងរួចទៅហើយ ដោយការប្រែប្រួលអាកាសធាតុ និងការរឹតត្បិតលំហូរជីពីសង្គ្រាមអ៊ីរ៉ង់។

លោកថា៖ « គ្រោះមហន្តរាយរបស់បាតុភូត El Niño នឹងកើតឡើង ហើយវាទំនងជានាំមកនូវឆ្នាំដ៏ក្តៅបំផុតមួយទៀត គឺនៅឆ្នាំ២០២៧ ជាពិសេសនឹងបំផ្លិចបំផ្លាញដល់កសិកររាប់លាននាក់ និងអាចមានមនុស្សស្លាប់ជាច្រើនផងដែរ»៕

សម្រួល៖ ណឺ មិនា