សមាគមសិល្បករខ្មែរ ប្រកាសបដិសេធ ករណីជនឆ្លៀតឱកាសប្រើឈ្មោះសមាគម រៃអង្គាសប្រាក់តាមទីសាធារណៈ

នារសៀលថ្ងៃទី៥ ខែមិថុនា ឆ្នាំ២០២៦នេះ សមាគមសិល្បករខ្មែរ បានចេញសេចក្តីជូនដំណឹង និងបដិសេធចំពោះទង្វើរបស់ជនឆ្លៀតឱកាសមួយចំនួន ដែលបានយកឈ្មោះសមាគមទៅប្រើប្រាស់ ដើម្បីធ្វើសកម្មភាពរៃអង្គាស និងប្រមូលថវិកាតាមទីសាធារណៈ សម្រាប់ផលប្រយោជន៍ផ្ទាល់ខ្លួន។

យោងតាមសេចក្តីប្រកាស សមាគមសិល្បករខ្មែរ បានឱ្យដឹងថា ថ្មីៗនេះ សមាគមទទួលបានព័ត៌មានថា មានបុគ្គលមួយចំនួនបានអះអាងថា កំពុងប្រមូលថវិកាក្នុងនាមសមាគមសិល្បករខ្មែរ ដើម្បីជួយដល់ជនភៀសសឹក និងវីរកងទ័ពដែលកំពុងបំពេញបេសកកម្មតាមតំបន់ព្រំដែន។

ទោះជាយ៉ាងណា សមាគមសិល្បករខ្មែរ បានបញ្ជាក់យ៉ាងច្បាស់ថា សកម្មភាពខាងលើមិនមែនជាគម្រោង ឬសកម្មភាពផ្លូវការរបស់សមាគម ក្រុមការងារ ឬសមាជិកណាម្នាក់ឡើយ។ សមាគមក៏បានអះអាងថា ខ្លួនមិនមានកម្មវិធីដើររៃអង្គាសប្រាក់តាមទីសាធារណៈក្នុងទម្រង់បែបនេះនោះទេ។

ជាមួយគ្នានេះ សមាគមសិល្បករខ្មែរ បានអំពាវនាវដល់សាធារណជនឱ្យមានការប្រុងប្រយ័ត្ន និងពិនិត្យផ្ទៀងផ្ទាត់ព័ត៌មានឱ្យបានច្បាស់លាស់ មុននឹងចូលរួមឧបត្ថម្ភថវិកា ដើម្បីជៀសវាងការចាញ់បោកជនខិលខូចដែលកំពុងឆ្លៀតឱកាសយកឈ្មោះស្ថាប័នទៅប្រើប្រាស់ខុសគោលបំណង។

សមាគមក៏បានព្រមានថា នឹងចាត់វិធានការផ្លូវច្បាប់ជាបន្ទាន់ចំពោះជនពាក់ព័ន្ធទាំងអស់ ប្រសិនបើនៅតែបន្តធ្វើសកម្មភាពក្លែងបន្លំ និងបង្កឱ្យប៉ះពាល់ដល់កិត្តិយស និងភាពជឿជាក់របស់សមាគមសិល្បករខ្មែរ៕