សមត្ថកិច្ចប៉ុស្តិ៍ចោមចៅទី១ ឃាត់ក្រុមក្មេងទំនើង៨នាក់ជាបន្តបន្ទាប់ក្រោយបង្កហឹង្សាទៅលើយុវជន៤នាក់របួស

ក្រុមក្មេងទំនើងមួយក្រុមមានគ្នា៣០នាក់ជិះម៉ូតូ១៥គ្រឿង បានធ្វើសកម្មភាពវាយយុវជន៤នាក់បណ្តលឲ្យរងរបួស២នាក់និងវាយបំផ្លាយម៉ូតូ២គ្រឿង កាលពីវេលាម៉ោង០៣ និង ៣០នាទី រំលងអាធ្រាត្រ ឈានចូលថ្ងៃទី២០ ខែមិថុនា ឆ្នាំ២០២៦  នៅចំណុចតាមបណ្ដោយផ្លូវបេតុងអង្គតាម៉ិញ ស្ថិតនៅភូមិគោកចំបក់ សង្កាត់ចោមចៅទី១ ខណ្ឌពោធិ៍សែនជ័យ  រាជធានីភ្នំពេញ ។ រហូតមកដល់ថ្ងៃទី២៥ ខែមិថុនា ឆ្នាំ២០២៦នេះ កម្លាំងសមត្ថកិច្ចប៉ុស្តិ៍នគរបាលចោមចៅទី១ ស្រាវជ្រាវតាមចាប់បានជាបន្តបន្ទាប់ សរុប៨នាក់។

ជនសង្ស័យ ដែលឃាត់បានទីឈ្មោះសឿង គឹមហុង, ឈ្មោះតាំង គីមសាយ, ឈ្មោះយឹម បុត្ររ៉ាសាក់ , ឈ្មោះង៉ែត រាជ្យ, ឈ្មោះជីវន្ត វិសាល,  ឈ្មោះ ឆេង សុផាន់នី, ឈ្មោះ ទូច ឆេងអ័រ , ឈ្មោះធឿន វុធធី ធើ្វអោយសម្ភារ: ខូចខាតមួយចំនួន ដូចជា បាក់កាបាំងមុខខាងស្តាំ បែកកាតតាប៊ូមុខ បាក់ដៃប្រាំងខាងមុខ។

តាមប្រភពព័ត៌មានបានឲ្យដឹងថា នៅយប់កើតហេតុជនរងគ្រោះមានគ្នា៤នាក់ជិះម៉ូតូ២គ្រឿង ធ្វើដំណើរឆ្លងកាត់ផ្លូវបេតុងវត្តអង្គតាមិញ លុះមកដល់ចំណុចកើតហេតុស្រាប់តែជួបជាមួយក្រុមក្មេងទំនើងទាំងនោះ ហើយក៏ត្រូវក្មេងទំនើងដេញវាយធ្វើឲ្យជនរងគ្រោះរបួស២នាក់ ដោយភ័យពេកក៏រត់ចោលម៉ូតូត្រូវបានពួកគេវាយម៉ូតូបណ្តាលឲ្យខួចខាត ហើយនាំគ្នារត់គេចខ្លួនអស់។

ក្រោយកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី១ ដើម្បីសុំការអន្តរាគមន៍។

ក្រោយទទួលបណ្តឹងជនរងគ្រោះរួចកម្លាំងសមត្ថកិច្ចធ្វើការស្រាវជ្រាវរហូតឃាត់ខ្លួនបានជាបន្តបន្ទាប់សរុបចំនួន៨នាក់។

បច្ចុប្បន្ន ជនសង្ស័យកំពុងកសាងសំណុំរឿងបណ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យដើម្បីចាត់ការតាមច្បាប់៕ដោយ៖សុខា