កម្ពុជាប្រាប់អន្តរជាតិថា ថៃបន្តរារាំងការវិលត្រឡប់របស់ពលរដ្ឋខ្មែរនៅតាមព្រំដែន ហើយទាមទារឱ្យបញ្ឈប់ការរំលោភបំពាន

តំណាងអចិន្ត្រៃយ៍កម្ពុជាប្រចាំទីក្រុងហ្សឺណែវ លោក​ កែ សុវណ្ណ លើកឡើងអំពីក្តីបារម្ភចំពោះសកម្មភាពរបស់យោធាថៃ ដែលបានបន្តរារាំងការវិលត្រឡប់របស់ជនស៊ីវិលកម្ពុជាទៅកាន់ផ្ទះសម្បែងរបស់ពួកគេនៅតាមតំបន់ព្រំដែនកម្ពុជា-ថៃ។ ការមិនអាចវិលទៅលំនៅឋានវិញបាននេះត្រូវបានលោកអះអាងថាដោយសារតែការបន្តកាន់កាប់ដោយខុសច្បាប់លើទឹកដីកម្ពុជាដោយកងកម្លាំងប្រដាប់អាវុធរបស់ថៃ។

លោក និយាយាថា «ទោះបីមានកិច្ចព្រមព្រៀងឈប់បាញ់រវាងកម្ពុជា និងថៃ សម្រេចបានតាំងពីខែធ្នូ ឆ្នាំ២០២៥ ក៏ដោយ ក៏ជនស៊ីវិលកម្ពុជាជាង២២ ០០០នាក់ នៅតែបន្តជាជនភៀសខ្លួន និងមិនអាចវិលត្រឡប់ទៅផ្ទះរបស់ពួកគេវិញបាន»។

ការលើកឡើងដូច្នេះរបស់តំណាងអចិន្ត្រៃយ៍កម្ពុជា បានធ្វើឡើងនៅក្នុងសម័យប្រជុំលើកទី៦២ នៃក្រុមប្រឹក្សាសិទ្ធិមនុស្សអង្គការសហប្រជាជាតិ នៅឯទីក្រុងហ្សឺណែវ កាលពីថ្ងៃទី២៥ ខែមិថុនា ឆ្នាំ២០២៦ ក្រោមរបៀបវារៈនៃកិច្ចសន្ទនាអន្តរកម្មជាមួយអ្នករាយការណ៍ពិសេស ស្តីពីសិទ្ធិមនុស្សរបស់ជនភៀសខ្លួនក្នុងស្រុក។

ក្នុងសេចក្ដីថ្លែងការណ៍របស់លោក កែ សុវណ្ណ បានបន្តរាយការណ៍ពីផលប៉ះពាល់ដែលបង្កឡើងដោយការឈ្លានពានរបស់យោធាថៃលើទឹកដីកម្ពុជា ជាពិសេសការបង្កផលប៉ះពាល់ដល់ជនស៊ីវិលស្លូតត្រង់កម្ពុជា ដោយលោកពណ៌នាថា ថៃបានចូលកាន់កាប់ជ្រៅដោយខុសច្បាប់លើទឹកដីកម្ពុជា រារាំងការវិលត្រឡប់របស់ជនស៊ីវិល រុះរើផ្ទះសម្បែង ហើយជំនួសវិញដោយការសាងសង់សំណង់អចិន្ត្រៃយ៍ ការវាស់វែងដីធ្លីនៅភូមិរបស់កម្ពុជា ដែលបានបណ្តាលឱ្យមានការផ្លាស់ទីលំនៅយូរ និងរារាំងការវិលត្រឡប់ដោយសុវត្ថិភាព និងថ្លៃថ្នូររបស់ជនស៊ីវិលកម្ពុជា ដែលរងផលប៉ះពាល់។

សកម្មភាពទាំងនេះ លោក ថា បង្កើតបានជាការរំលោភបំពានយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់កម្ពុជា ហើយជាការរំលោភបំពានលើច្បាប់មនុស្សធម៌ និងសិទ្ធិមនុស្សអន្តរជាតិ ដែលមានផលវិបាកយ៉ាងធ្ងន់ធ្ងរដល់ជនស៊ីវិល ជាពិសេសស្ត្រី និងកុមារ។

ជាថ្មីម្ដងទៀត ពីវេទិការបស់អង្គការសហប្រជាជាតិ តំណាងកម្ពុជា បានទាមទារឱ្យថៃគោរពធម្មនុញ្ញអង្គការសហប្រជាជាតិ ច្បាប់មនុស្សធម៌អន្តរជាតិ និងច្បាប់សិទ្ធិមនុស្ស ជាមួយនឹងការអំពាវនាវដល់សហគមន៍អន្តជាតិឱ្យមានការបង្កើតលក្ខខណ្ឌចាំបាច់នានា ដើម្បីអនុញ្ញាតឱ្យគ្រួសារជនភៀសខ្លួនអាចវិលត្រឡប់ទៅផ្ទះរបស់ពួកគេវិញបាន។ ចំពោះបញ្ហាជម្លោះព្រំដែន លោក បញ្ជាក់ជាថ្មីថា ត្រូវតែដោះស្រាយដោយសន្តិវិធី។

ក្នុងជម្លោះព្រំដែនកម្ពុជា-ថៃ កន្លងមក បានបង្កើតឱ្យមានពលរដ្ឋភៀសសឹកជាង៦សែន៤ម៉ឺននាក់ ត្រូវបង្ខំឱ្យចាកចេញពីផ្ទះសម្បែង ប៉ុន្តែក្រោយមានបទឈប់បាញ់ ពលរដ្ឋជិត៦សែន២ម៉ឺននាក់ បានវិលត្រឡប់ទៅលំនៅឋានវិញ។ តាមរបាយការណ៍របស់ក្រសួងមហាផ្ទៃ គិតត្រឹមថ្ងៃទី២៥ ខែមិថុនា ឆ្នាំ២០២៦ នៅមានជនភៀសសឹកកម្ពុជាប្រមាណ ២១ ៥០១នាក់ទៀត ដែលក្នុងនោះស្ត្រី១១ ០៣៩នាក់ និងកុមារ៦ ១៦៩នាក់ គឺពុំទាន់អាចវិលទៅលំនៅឋានវិញបានឡើយ ដោយសារកងកម្លាំងថៃបានរាយបន្លាលួស ដាក់ទូកុងតឺន័រ កាន់កាន់ និងបំផ្លិចបំផ្លាញដោយខុសច្បាប់៕

ដោយ៖ ធឿន វ៉ាន់សុង