តុលាការកូរ៉េខាងត្បូង ផ្ដន្ទាទោសអតីតជំទាវទីមួយ Kim Keon Hee ជាប់ពន្ធនាគារ ៧ឆ្នាំ ពីបទទទួលសំណូក

អតីតជំទាវទីមួយនៃប្រទេសកូរ៉េខាងត្បូង លោកស្រី Kim Keon Hee នៅថ្ងៃទី២៦ ខែមិថុនា ត្រូវបានតុលាការកាត់ទោសឲ្យជាប់ពន្ធនាគាររយៈពេល ៧ ឆ្នាំ ពីបទទទួលសំណូក បន្ទាប់ពីតុលាការ បានរកឃើញថា លោកស្រីមានទោសពិតប្រាកដមែន ក្នុងការទទួលយកវត្ថុប្រណីតៗ ដូចជាគ្រឿងអលង្ការ និងកាបូបម៉ាក Dior ជាថ្នូរនឹងការផ្តល់ផលប្រយោជន៍ផ្នែកនយោបាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានក្រុម​ចៅក្រមជម្រះ​ក្តីនៅតុលាការ​ទីក្រុងសេអ៊ូល បានថ្លែងថា ភរិយារបស់អតីតប្រធានាធិបតី Yoon Suk Yeol ដែលត្រូវបានបណ្តេញចេញពីតំណែងក្នុងឆ្នាំ ២០២៥ បន្ទាប់ពីការប៉ុនប៉ងបរាជ័យក្នុងការដាក់ប្រទេសក្នុងភាពអាសន្ន (ច្បាប់អាជ្ញាសឹក) នោះ បានទទួលសំណូកទាំងនេះទាំងមុនពេល និងអំឡុងពេលដែលស្វាមីរបស់លោកស្រីកាន់តំណែងជាប្រធានាធិបតី។

ចៅក្រមបានលើកឡើងថា លោកស្រីបានប្រើប្រាស់អំណាចរបស់ខ្លួនជាជំទាវទីមួយ ដើម្បីផ្តល់ការងារ និងផលប្រយោជន៍ខាងអាជីវកម្ម ដោយលោកបានលើកឡើងពីឆន្ទៈរបស់លោកស្រី ក្នុងការប្រើប្រាស់ឥទ្ធិពលរបស់ខ្លួន ដើម្បីជួយបុគ្គលមួយចំនួនឲ្យទទួលបានតំណែងសំខាន់ៗនៅក្នុងរដ្ឋាភិបាល ឬនៅក្នុងសភា។ លោកចៅក្រមបានបន្ថែមថា លោកស្រីបានទទួលយកសំណូកទាំងនោះដោយគ្មានការរារែកចិត្តទាល់តែសោះ ដែលសំណូកទាំងនោះជាវត្ថុដែលប្រជាជនធម្មតាពិបាកនឹងបានជួបប្រទះណាស់នៅក្នុងឆាកជីវិតរបស់ពួកគេ។

តុលាការបានសង្កត់ធ្ងន់ថា សកម្មភាពរបស់អតីតជំទាវទីមួយរូបនេះ បានធ្វើឲ្យប៉ះពាល់យ៉ាងធ្ងន់ធ្ងរដល់ទំនុកចិត្តរបស់សាធារណជន ទៅលើភាពយុត្តិធម៌នៃការតែងតាំងមន្ត្រីរាជការ។

លោកចៅក្រមបានបន្តថា ក្នុងចំណោមអ្នកដែលបានផ្តល់សំណូកដល់លោកស្រី រួមមាន ម្ចាស់ក្រុមហ៊ុនសំណង់ម្នាក់ដែលចង់បានតំណែងក្នុងរដ្ឋាភិបាលឲ្យកូនប្រសាររបស់ខ្លួន, គ្រូគង្វាលម្នាក់ដែលចង់ពង្រីកបណ្តាញទំនាក់ទំនងជាមួយមន្ត្រីជាន់ខ្ពស់, អតីតប្រធានសាកលវិទ្យាល័យឯកជនមួយ និងនាយកប្រតិបត្តិនៃក្រុមហ៊ុនលក់រាយមនុស្សយន្តឆ្កែ ដែលចង់ផ្គត់ផ្គង់ផលិតផលរបស់ខ្លួនទៅឲ្យក្រុមសន្តិសុខប្រធានាធិបតី។

ជាការផ្តន្ទាទោស តុលាការក៏បានពិន័យជាប្រាក់ដល់លោកស្រី Kim Keon Hee ចំនួន ៦៤.៨ លានវ៉ុន និងបានបញ្ជាឲ្យរឹបអូសវត្ថុទាំងអស់ដែលទទួលបានពីសំណូក ប្រសិនបើគេអាចស្វែងរកទីតាំងវត្ថុទាំងនោះឃើញ។

ទោះជាយ៉ាងណាក៏ដោយ លោកស្រី Kim Keon Hee បានបដិសេធរាល់ការចោទប្រកាន់ទាំងអស់។ ទីភ្នាក់ងារសារព័ត៌មាន Yonhap បានរាយការណ៍ថា មេធាវីរបស់លោកស្រីបានប្រាប់អ្នកយកព័ត៌មានថា ពួកគេនឹងប្តឹងឧទ្ធរណ៍ប្រឆាំងនឹងសេចក្តីសម្រេចនេះ ដោយបានចោទប្រកាន់លោកចៅក្រមថា បានបំផ្លើសភស្តុតាងដែលមិនផ្តល់ផលចំណេញដល់លោកស្រី ។

បច្ចុប្បន្ន អតីតជំទាវទីមួយរូបនេះកំពុងស្ថិតនៅក្នុងពន្ធនាគាររួចស្រេចទៅហើយ បន្ទាប់ពីត្រូវបានរកឃើញថាមានទោសពីបទកែបន្លំតម្លៃភាគហ៊ុន និងការទទួលសំណូកពីព្រះវិហារ Unification Church របស់កូរ៉េខាងត្បូង។ លោកស្រីត្រូវបានតុលាការកាត់ទោសឲ្យជាប់ពន្ធនាគាររយៈពេល ៤ ឆ្នាំរួចមកហើយលើបទចោទប្រកាន់ទាំងនោះ កាលពីខែមេសាកន្លងទៅ។

ដោយឡែក ស្វាមីរបស់លោកស្រីគឺលោក Yoon Suk Yeol ត្រូវបានតុលាការកាត់ទោសឲ្យជាប់ពន្ធនាគារអស់មួយជីវិតកាលពីខែកុម្ភៈ ពីបទដឹកនាំធ្វើរដ្ឋប្រហារ (ការបះបោរ) ដែលពាក់ព័ន្ធនឹងការប្រកាសដាក់ប្រទេសក្នុងច្បាប់អាជ្ញាសឹកក្នុងរយៈពេលដ៏ខ្លីកាលពីឆ្នាំ ២០២៤៕

អត្ថបទ ៖ សាង ស្រីល័ក្ខ