ផ្សារមូលបត្រកម្ពុជា​ កៀរគរទុន​វិនិយោគជាង ១ ​ពាន់លានដុល្លារ​

គិតមកដល់ពេលនេះ ​មានក្រុមហ៊ុនចំនួន ៣០ ​បានធ្វើការបោះផ្សាយ​លក់មូលបត្រ ​ក្នុងនោះ មានក្រុមហ៊ុនចុះបញ្ជីលក់មូលបត្របំណុលជាសាធារណៈ ​សម្រាប់វិនិយោគិនគុណវុឌ្ឍិ ​និង​ឯកជនចំនួន ១៨ ​ដែលប្រមូលសាច់ប្រាក់បានប្រមាណ ១,១៣ ​ពាន់លានដុល្លារ ​និងក្រុមហ៊ុន​ចុះបញ្ជី​មូលបត្រ​កម្មសិទ្ធិចំនួន ១២ (ទាំងក្នុង ទីផ្សារគោល និងទីផ្សារកំណើន) ដែលប្រមូលសាច់ប្រាក់បានប្រមាណ ១៣០ លានដុល្លារ។

​លោក ស៊ូ ​សុជាតិ ​អគ្គនាយកនិយ័តករមូលបត្រកម្ពុជា ​បានលើកឡើងនៅក្នុងពិធី​បោះផ្សាយលក់ភាគហ៊ុនលើកដំបូងរបស់ក្រុមហ៊ុន ​បុរី វិមានសំណាង ​នៅថ្ងៃទី ២ ​កក្កដា ២០២៦ថា ការបោះផ្សាយលក់មូលបត្ររបស់ក្រុមហ៊ុន ​បុរី វិមានសំណាង នឹងក្លាយជាជំហានមួយទៀតក្នុងការចូលរួមចំណែកពង្រីកមូលដ្ឋានក្រុមហ៊ុនចុះបញ្ជី បង្កើនជម្រើសវិនយោគសម្រាប់សាធារណជន និងជំរុញការអភវឌ្ឍទីផ្សារមូលធនឱ្យកាន់តែសកម្មបន្ថែមទៀត។

លោក ស៊ូ ​សុជាតិ ​បន្តថា កន្លងមក និយ័តករមូលបត្រកម្ពុជា បានខិតខំបន្តអភិវឌ្ឍ និងធ្វើទំនើបកម្មក្របខណ្ឌច្បាប់ បទប្បញ្ញត្តិ និងយន្តការត្រួតពិនិត្យ ដើម្បីធានាឱ្យទីផ្សារមូលបត្រកម្ពុជាដំណើរការប្រកបដោយតម្លាភាព។

លោក ស៊ូ ​សុជាតិ បន្ថែមថា ចំពោះការវិនិយោគនៅក្នុងមូលបត្រកម្មសិទ្ធ វិនិយោគិនសាធារណៈនឹងទទួលបាននូវអត្ថប្រយោជន៍ជាច្រើនរួមមាន ការចំណេញភាគលាភ ការចំណេញមូលធន ការលើកទឹកចិត្តផ្នែកពន្ធដារ និងមានឱកាសក្លាយជាភាគហ៊ុននិក ដើម្បីចូលរួមសម្រេចនូវរាល់កិច្ចការធំៗ របស់ក្រុមហ៊ុនបោះផ្សាយមូលបត្រផងដែរ។

លោក ស៊ូ ​សុជាតិ លើកទឹកចិត្តឱ្យវិនិយោគិនសិក្សាស្វែងយល់ព័ត៌មាននៅក្នុងឯកសារផ្ដល់ព័ត៌មាន និងឯកសារពាក់ព័ន្ធឱ្យបានហ្មត់ចត់ មុននឹងធ្វើការសម្រេចចិត្តវិនិយោគ។

ការវិនិយោគនៅក្នុងទីផ្សារមូលបត្រតែងតែមានទាំងឱកាស និងហានិភ័យ ដូច្នេះការសម្រេចចិត្តគួរធ្វើឡើង ដោយផ្អែកលើការវិភាគ និងការវាយតម្លៃដោយប្រុងប្រយ័ត្ន។

ក្រុមហ៊ុន ​បុរី វិមានសំណាង ដែលជាក្រុមហ៊ុនអភិវឌ្ឍអចលនទ្រព្យ នឹងធ្វើការបោះផ្សាយ និងចុះបញ្ជីលក់​ភាគហ៊ុនលើកដំបូងចំនួន ៣៣ ៥០០ ០០០ ភាគហ៊ុន ក្នុងតម្លៃ ១២០០ រៀល ក្នុងមួយហ៊ុន ដែលស្មើនឹង ១០ លានដុល្លារ៕

អត្ថបទ៖ ឡេង ដេត