ព័ត៌មានអន្ដរជាតិ

នៅអឺរ៉ុបមានមនុស្ស ១០ ០០០នាក់ស្លាប់ អំឡុងពេលរលកកម្តៅវាយប្រហារ នៅចុងខែមិថុនា

បានផុស

២២ វិនាទី មុន

នៅ

ថ្ងៃចន្ទ ១៣ កក្កដា ២០២៦

ដោយ

ទិន្នន័យផ្លូវការ បានបង្ហាញថា បណ្តាប្រទេសនៅអឺរ៉ុបមានមនុស្សស្លាប់លើសពី ១០ ០០០នាក់ អំឡុងពេលរលកកម្តៅដ៏ខ្លាំងបំផុតបានវាយប្រហារភាគខាងលិចនៃទ្វីបអឺរ៉ុបនៅចុងខែមិថុនា ក្នុងនោះជាង ៩ ០០០នាក់នៃអ្នកស្លាប់ ស្ថិតក្នុងចំណោមមនុស្សដែលមានអាយុ ៦៥ឆ្នាំឡើង។ នេះបើយោងតាមទិន្នន័យចេញផ្សាយដោយបណ្តាញគាំទ្រដោយមជ្ឈមណ្ឌលបង្ការនិងគ្រប់គ្រងជំងឺអឺរ៉ុប និងអង្គការសុខភាពពិភពលោក (EuroMOMO)។

ទីភ្នាក់ងារសារព័ត៌មានរ៉យទ័រ ចេញផ្សាយនៅថ្ងៃទី១៣ ខែកក្កដា ឆ្នាំ ២០២៦ បានឱ្យដឹងថា កម្តៅខ្លាំងអាចសម្លាប់មនុស្ស តាមរយៈបង្កឱ្យដាច់សរសៃឈាមខួរក្បាល ឬជំងឺសរសៃឈាមបេះដូង និងផ្លូវដង្ហើមកាន់តែធ្ងន់ធ្ងរ ក្នុងនោះមនុស្សចាស់ងាយរងគ្រោះបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្រាមរណភាពរួមបញ្ចូលគ្នារបស់ប្រទេសនៅអឺរ៉ុបក្នុងរយៈពេល ៨សប្តាហ៍មុន ជាមធ្យមមានមនុស្សជិត ៥០០នាក់ស្លាប់ក្នុងមួយសប្តាហ៍។

មិនតែប៉ុណ្ណោះ រលកកម្ដៅខ្លាំងនៅចុងខែមិថុនាបានរំខានដល់ការផ្គត់ផ្គង់ថាមពល បិទសាលារៀន និងបំបែកកំណត់ត្រាសីតុណ្ហភាពនៅប្រទេសបារាំង អេស្ប៉ាញ និងចក្រភពអង់គ្លេស។

EuroMOMO មិនបានផ្សាយពីអត្រាមរណភាពលើសសម្រាប់ប្រទេសនីមួយៗទេ ប៉ុន្តែកត់សម្គាល់ថា ប្រទេសបារាំង និងបែលហ្ស៊ិកមានត្រាអត្រាមរណភាពលើសខ្ពស់ខ្លាំង នៅក្នុងសប្តាហ៍ចុងក្រោយនៃខែមិថុនា។

យោងតាមវិទ្យាស្ថានសុខភាពសាធារណៈ Sciensano អត្រាមរណភាពលើសរបស់ប្រទេសបែលហ្ស៊ិកគឺខ្ពស់បំផុត អំឡុងពេលរលកកម្ដៅដែលកំពុងមានបច្ចុប្បន្ន ចាប់តាំងពីឆ្នាំ ២០០០ ។

ការសិក្សាដាច់ដោយឡែកមួយ ចេញផ្សាយនៅថ្ងៃចន្ទ បានប៉ាន់ប្រមាណថាមនុស្សចំនួន ២ ៧០០នាក់ស្លាប់ ទាក់ទងនឹងកម្តៅក្នុងប្រទេសអង់គ្លេស និងតំបន់ Wales អំឡុងរលកកម្តៅនាខែឧសភា និងខែមិថុនា៕

សម្រួល៖ ណឺ មិនា