សម្ព័ន្ធមិត្តលោកខាងលិច ប្រជុំនៅប៉ារីស ដើម្បីពង្រឹងខែលការពារឱ្យអ៊ុយក្រែន

សម្ព័ន្ធមិត្តលោកខាងលិច នឹងជួបជុំគ្នានៅទីក្រុងប៉ារីសនាថ្ងៃចន្ទ ទី​១៣ ខែ​កក្កដា ឆ្នាំ​២០២៦ នេះ ដើម្បីស្វែងរកមធ្យោបាយបន្ថែមទៀត ក្នុងការជួយពង្រឹងប្រព័ន្ធការពារដែនអាកាសដល់ប្រទេសអ៊ុយក្រែន។

តាម​ការ​ផ្សាយរបស់ France24 ការជួបជុំនេះ កើតឡើងចំពេលដែលអ៊ុយក្រែន កំពុងជួបប្រទះនឹងការខ្វះខាតអាវុធការពារយ៉ាងធ្ងន់ធ្ងរ ដែលធ្វើឱ្យប្រទេសនេះងាយរងគ្រោះទៅនឹងការវាយប្រហារដោយមីស៊ីលបាលិស្ទិក​ពីសំណាក់ប្រទេសរុស្ស៊ី ទោះបីជាស្ថានភាពនៅលើសមរភូមិមានភាពវិជ្ជមានខ្លះក៏ដោយ។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី នឹងចូលរួមក្នុងកិច្ចប្រជុំនៃក្រុម «សម្ព័ន្ធភាពអ្នកស្ម័គ្រចិត្ត (Coalition of the Willing)» រួមជាមួយមេដឹកនាំជាង ២៥រូបទៀត។ កិច្ចប្រជុំនេះ មិនត្រឹមតែផ្តោតលើការផ្តល់អាវុធប៉ុណ្ណោះទេ ប៉ុន្តែថែមទាំងការរៀបចំជំហររួមមួយ ដើម្បីពិភាក្សាជាមួយរុស្ស៊ី និងការធានាសន្តិសុខ ដើម្បីត្រួសត្រាយផ្លូវឆ្ពោះទៅរកកិច្ចព្រមព្រៀងសន្តិភាពនាពេលអនាគត។ ការជួបជុំគ្នានេះ ធ្វើ​ឡើងតែប៉ុន្មានថ្ងៃប៉ុណ្ណោះ បន្ទាប់ពីកិច្ចប្រជុំកំពូលណាតូ ដែលបានបង្ហាញពីការប្តេជ្ញាចិត្តដ៏មុតមាំ ក្នុងការគាំទ្រអ៊ុយក្រែនក្នុងរយៈពេលវែង។

កាលពីថ្ងៃសៅរ៍សប្ដាហ៍​មុន ការវាយប្រហារដោយមីស៊ីល និងដ្រូនរបស់រុស្ស៊ី បានបណ្តាលឱ្យមនុស្ស ៨នាក់ស្លាប់ និងរាប់សិបនាក់ទៀតរងរបួស ដែលជំរុញឱ្យលោក ហ្សេលេនស្គី អំពាវនាវជាបន្ទាន់ឱ្យសម្ព័ន្ធមិត្តផ្តល់អាវុធឱ្យបានលឿនជាងមុន។ មន្ត្រីបារាំង បានបញ្ជាក់ថា របៀបវារៈសំខាន់នៃកិច្ចប្រជុំថ្ងៃនេះ គឺការសហការលើប្រព័ន្ធប្រឆាំងមីស៊ីលបាលិស្ទិក​ រួមទាំងការស្វែងរកប្រព័ន្ធមីស៊ីល Patriot របស់អាមេរិក និងការពន្លឿនការដាក់ពង្រាយប្រព័ន្ធការពារដែនអាកាស SAMP-T របស់បារាំង-អ៊ីតាលី។ លើសពីនេះ ក្រុមមេដឹកនាំ នឹងពិភាក្សាអំពីការសហការរវាងឧស្សាហកម្មការពារជាតិអឺរ៉ុប និងអ៊ុយក្រែន ដើម្បីផលិតប្រព័ន្ធការពារដែនអាកាសដោយខ្លួនឯង ដែលនឹងផ្តល់ឱ្យអ៊ុយក្រែននូវតួនាទីសំខាន់ ក្នុងការផលិត។

មេដឹកនាំនានា ក៏នឹងពិនិត្យមើលវិធីសាស្ត្រ ក្នុងការកាត់ផ្តាច់ប្រភពចំណូលរបស់រុស្ស៊ីផងដែរ ជាពិសេសការតាមដានកប៉ាល់ដឹកប្រេងសម្ងាត់ដែលរុស្ស៊ីប្រើ ដើម្បីគេចពីការដាក់ទណ្ឌកម្ម។ ទន្ទឺម​នោះ សហភាពអឺរ៉ុបគ្រោងនឹងអនុម័តកញ្ចប់ទណ្ឌកម្មទី ២១ ប្រឆាំងនឹងរុស្ស៊ីនៅសប្តាហ៍ក្រោយ។

ប្រធានាធិបតីបារាំង លោក អេម៉ានុអែល ម៉ាក្រុង បានសន្យាថានឹងមានការប្រកាសសំខាន់ៗ រួមទាំងកិច្ចសហប្រតិបត្តិការផលិតអាវុធរួមគ្នា និងលំហាត់យោធារួមគ្នា ដើម្បីពង្រឹងសមត្ថភាពនៃកម្លាំងពហុជាតិចម្រុះ ដែលគ្រោងនឹងបង្កើតឡើងនាពេលអនាគត។ យ៉ាងណាមិញ មន្ត្រីជាន់ខ្ពស់បារាំង បានបញ្ជាក់យ៉ាងច្បាស់ថា ការសមយុទ្ធទាំងនេះ មានគោលបំណងបង្កើនសមត្ថភាពប្រតិបត្តិការរួម ប៉ុន្តែវាមិនមែនជាការដាក់ពង្រាយកងទ័ព ឬធ្វើសមយុទ្ធនៅក្នុងទឹកដីប្រទេសអ៊ុយក្រែននោះទេ៕

ប្រែសម្រួល៖ ឈាង