កីឡា

ក្ដីស្រមៃចង់ក្លាយជាមន្ត្រីកីឡាក្រសួងមហាផ្ទៃរបស់ អ៊ូច ធារិទ្ធ ទំនងត្រូវបញ្ចប់ក្រោយមានរបួសមិនអាចបន្តអាជីពប្រដាល់

បានផុស

៣ នាទី មុន

នៅ

ថ្ងៃអង្គារ ១៤ កក្កដា ២០២៦

ដោយ

អ្នកលេងគុនខ្មែរ អ៊ូច ធារិទ្ធ ក្ដីស្រមៃធំរបស់រូបគេដែលចង់ក្លាយជាមន្ត្រីកីឡាក្រសួងមហាផ្ទៃ (នគរបាល) ពីមុននោះទំនងត្រូវបានបញ្ចប់ហើយចាប់ពីពេលនេះតទៅ ព្រោះមានរបួសក្បាលធ្ងន់ធ្ងរដោយត្រូវបញ្ចប់អាជីពត្រឹមនេះហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ូច ធារិទ្ធ ក្រោយពេលរបួសក្បាល

គ្រូពេទ្យបានបញ្ជាក់ទៅកាន់ អ៊ូច ធារិទ្ធ ហើយថារូបគេមិនអាចបន្តអាជីពប្រដាល់នេះបានទៀតទេដោយសារតែរបួសឈាមកកក្នុងក្បាលរបស់គេមានសភាពធ្ងន់ធ្ងររហូតដល់វះកាត់ដូចសាធារណៈជនបានឃើញជាក់ស្ដែងនៅពេលនេះអីចឹ។ ដំណឹងដ៏អាក្រក់មួយនេះបានធ្វើឲ្យម្ចាស់ខ្លួនមិនអាចទទួលយកបានភ្លាមៗនោះឡើយ និងតែងតែហូរទឹកភ្នែកនៅពេលគិតពីការបាត់បង់អាជីពដែលខ្លួនស្រឡាញ់ និងប្រឡូកអស់ជាច្រើនឆ្នាំមកនេះ។

ធារិទ្ធ ប្រពន្ធកូន

លើសពីនេះទៅទៀតក្ដីស្រមៃធំរបស់រូបគេដែលធ្លាប់មានពីមុនមកថាចង់ជាប់ជាមន្ត្រីកីឡាក្រសួងមហាផ្ទៃ (នគរបាល) នោះគឺទំនងត្រូវបានបញ្ចប់ដោយមិនអាចសម្រេចបានចាប់ពីនេះទៅហើយ។ ព្រោះរូបគេមិនអាចបន្តព្យាយាមស្វែងរកនូវសមិទ្ធផល ឬមេដាយមាសតំណាងឲ្យក្រសួងមហាផ្ទៃបានទៀតទេដោយសាររបួសក្បាលដ៏ធ្ងន់ធ្ងរនេះ។

អ៊ូច ធារិទ្ធ និងលោក សំណព្វ

អ៊ូច ធារិទ្ធ ធ្លាប់បានប្រាប់កម្ពុជាថ្មីថា រូបគេបានតស៊ូប្រកួតតំណាងឲ្យក្រសួងមហាផ្ទៃនេះជាច្រើនឆ្នាំមកហើយមិនថាប្រកួតលើប្រភេទកីឡាប្រដាល់សកល និងគុនខ្មែរនោះឡើយទេ។ អាចថាជារឿងស៊យសម្រាប់រូបគេផងដែរចំពោះការតស៊ូនេះដោយសារតែប្រកួតបានតែមេដាយប្រាក់ មេដាយសំរឺទ្ធ និងមានឱកាសទៅដណ្ដើមមេដាយមាសបែរជាជួបរឿងចៃដន្យមានជំងឺមិនអាចឡើងប្រកួតបានទៅវិញកន្លងមក។ ការមិនបានដណ្ដើមមេដាយមាសនេះហើយទើបរូបគេមិនទាន់ឃើញមានឈ្មោះជាប់ក្របខណ្ឌរហូតមកដល់ពេលខ្លួនមានរបួសធ្ងន់បាត់បង់អាជីពប្រដាល់ដូចពេលនេះទៅ។

អ៊ូច ធារិទ្ធ និងលោក សំណព្វ

បញ្ជាក់ដែរថា កីឡាករ អ៊ូច ធារិទ្ធ បានរងរបួសក្រោយពីប្រកួតឈ្នះពិន្ទុកីឡាករប្រេស៊ីល GABRIEL SOUZA កាលពីថ្ងៃទី១៦ ខែឧសភា ឆ្នាំ២០២៦ នៅឯខេត្តកំពត ក្នុងកម្មវិធីប្រដាល់របស់សង្វៀន ទទក ។ បច្ចុប្បន្ននេះរូបគេសម្រាកនៅផ្ទះដើម្បីព្យាបាលបន្ត និងរង់ចាំការវះកាត់ដាក់បញ្ចូលលលាក្បាលឡើងវិញតាមដំណាក់កាលរបស់គ្រូពេទ្យ។ ចំពោះការជាប់ក្របខណ្ឌជាមន្ត្រីកីឡានគរបាល ឬមន្ត្រីកីឡាផ្នែកក្រសួងការពារជាតិកន្លងមកលុះត្រាតែកីឡាករ កីឡាការិនីផ្សេងៗនោះមានក្លឹបប្រកួតតំណាងក្រសួងនោះតាមនិតិវិធីផ្លូវច្បាប់ត្រឹមត្រូវ និងមានស្នាដៃតាមការកំណត់ណាមួយនោះនឹងមានឱកាសជាប់ក្នុងពេលវេលាជាក់ស្ដែង៕