អ៊ីរ៉ង់បង្ហាញសញ្ញាបិទច្រកដឹកជញ្ជូនសំខាន់មួយទៀតនៅសមុទ្រក្រហម ដែលអាចបង្កើនហានិភ័យធ្ងន់ធ្ងរដល់ពាណិជ្ជកម្មសកល

ខណៈការរំខាននៅច្រកសមុទ្រហ័រមូហ្ស​នៅតែបន្ត​ ​ឥឡូវនេះ អ៊ីរ៉ង់កំពុងបង្ហាញសញ្ញាថា ខ្លួនអាចនឹង​​បង្កើនបន្ទុកថ្មីលើពាណិជ្ជកម្មពិភពលោក តាមរយៈការប្រើក្រុមប្រដាប់អាវុធហ៊ូធី​នៅយេម៉ែន ​ឱ្យ​បិទច្រក បាប អែល ម៉ាន់ដេប (Bab el-Mandeb) ដែលជាផ្លូវទឹកដ៏សំខាន់ភ្ជាប់សមុទ្រក្រហមទៅកាន់ឈូងសមុទ្រអេដិន។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

ក្រុមអ្នកវិភាគបានលើកឡើងថា ការគំរាមបិទច្រក បាប អែល ម៉ាន់ដេប បង្ហាញថា អ៊ីរ៉ង់កំពុងពង្រីកជម្លោះឱ្យហួសពីឈូងសមុទ្រពែរ្ស ដើម្បីបង្កើនសម្ពាធលើសហរដ្ឋអាមេរិក និងធ្វើឱ្យពិភពលោកព្រួយបារម្ភអំពីការផ្គត់ផ្គង់ថាមពល និងពាណិជ្ជកម្មសកល។

ច្រក បាប អែល ម៉ាន់ដេប គឺជាផ្លូវដឹកជញ្ជូនដ៏សំខាន់មួយរបស់ពិភពលោក ដែលប្រេងពីអារ៉ាប៊ីសាអូឌីត និងទំនិញជាច្រើនឆ្លងកាត់ មុនចូលទៅកាន់សមុទ្រក្រហម និងព្រែកជីកស៊ុយអេ។ ប្រសិនបើច្រកនេះត្រូវ​បិទបន្ទាប់ពី​ច្រកហ័រមូហ្ស​ នោះផ្លូវទឹកសំខាន់ ២ ដែលជាមូលដ្ឋាននៃពាណិជ្ជកម្ម និងទីផ្សារប្រេងពិភពលោក នឹងរងផលប៉ះពាល់ក្នុងពេលតែមួយ។

កាលពីថ្ងៃចន្ទ មន្ត្រីជាន់ខ្ពស់ម្នាក់របស់​ក្រុមហ៊ូធីម្នាក់ បានព្រមានថា កងកម្លាំងយេម៉ែនត្រៀមបិទច្រក បាប អែល ម៉ាន់ដេប ប្រសិនបើអារ៉ាប៊ីសាអូឌីតបន្តវាយប្រហារលើយេម៉ែន។ លោកបានអះអាងថា ប្រសិនបើ បាប អែល ម៉ាន់ដេប និង ហ័រមូហ្ស ត្រូវបានបិទក្នុងពេលតែមួយ តម្លៃប្រេងអាចហក់ឡើងដល់ ២០០ ដុល្លារ/បារ៉ែល។

អ្នកជំនាញបានពណ៌នាថា ប្រសិនបើ​ច្រកហ័រមូហ្ស គឺជាអាវុធដាក់​សម្ពាធគេ​ដ៏សំខាន់បំផុតរបស់អ៊ីរ៉ង់ នោះច្រក បាប អែល ម៉ាន់ដេប ​គឺជាជម្រើសយុទ្ធសាស្ត្រចុងក្រោយ ដែល​អ៊ីរ៉ង់អាចប្រើ ប្រសិនបើជម្លោះជាមួយសហរដ្ឋអាមេរិកកាន់តែធ្ងន់ធ្ងរ។

អ្វីដែលគួរឱ្យកត់សម្គាល់នោះគឺថា ក្រុមហ៊ូធីធ្លាប់បង្ហាញសមត្ថភាពរំខានដល់ពាណិជ្ជកម្មពិភពលោករួចមកហើយ។ បន្ទាប់ពីសង្គ្រាមនៅតំបន់ហ្កាហ្សាបានផ្ទុះឡើងក្នុងឆ្នាំ២០២៣ ក្រុមនេះបានវាយប្រហារនាវាពាណិជ្ជកម្មនៅសមុទ្រក្រហម ដោយអះអាងថា កំណត់គោលដៅលើនាវាដែលពាក់ព័ន្ធនឹងអ៊ីស្រាអែល។ ការវាយប្រហារទាំងនោះ បានបង្ខំឱ្យក្រុមហ៊ុនដឹកជញ្ជូនជាច្រើនប្តូរផ្លូវទៅជុំវិញទ្វីបអាហ្វ្រិក ដែលធ្វើឱ្យការដឹកជញ្ជូនចំណាយថ្លៃកាន់តែខ្ពស់ និងជំរុញឱ្យសហរដ្ឋអាមេរិក និងចក្រភពអង់គ្លេស បើកការវាយប្រហារតបតវិញ។

អ្នកវិភាគមួយចំនួនយល់ថា អ៊ីរ៉ង់ប្រហែលជាមិនចង់ពង្រីកសង្គ្រាមភ្លាមៗទេ ប៉ុន្តែកំពុងបង្កើនសម្ពាធជាបន្តបន្ទាប់ ដើម្បីបង្ខំឱ្យ​អាមេរិក​ត្រឡប់មករកតុចរចា។ ទោះជាយ៉ាងណា ប្រសិនបើ​អាមេរិកបង្កើនការវាយប្រហារលើហេដ្ឋារចនាសម្ព័ន្ធសំខាន់ៗរបស់អ៊ីរ៉ង់ ​អ៊ីរ៉ង់អាចនឹងប្រើក្រុមហ៊ូធី ដើម្បីរំខានការធ្វើនាវាចរណ៍តាមច្រក បាប អែល ម៉ាន់ដេប ដែលនឹងធ្វើឱ្យវិបត្តិសេដ្ឋកិច្ច និងទីផ្សារថាមពលពិភពលោកកាន់តែធ្ងន់ធ្ងរ។

ទោះបីជាក្រុមហ៊ូធីមានសមត្ថភាពគំរាមកំហែងដល់ការដឹកជញ្ជូនតាមផ្លូវទឹកនេះក៏ដោយ ក្រុមអ្នកវិភាគជាច្រើនជឿថា ពួកគេទំនងជាមិនធ្វើសកម្មភាពធំដុំឡើយ លុះត្រាតែមានការណែនាំដោយផ្ទាល់ពីអ៊ីរ៉ង់។ ពួកគេក៏ព្រមានថា ការប៉ុនប៉ងបិទច្រក បាប អែល ម៉ាន់ដេប អាចនាំឱ្យសហរដ្ឋអាមេរិក និងសម្ព័ន្ធមិត្ត បើកប្រតិបត្តិការយោធាទ្រង់ទ្រាយធំ ដើម្បីទប់ស្កាត់ក្រុមហ៊ូធី៕