​លោក ធួន ស៊ីណាន៖ វិបត្តិសេដ្ឋកិច្ចពិភពលោកជាដើមចម ​ធ្វើឱ្យភ្ញៀវទេសចរអន្តរជាតិមកទស្សនាកម្ពុជាថយចុះ​

​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា (PATA) ​លោក ធួន ស៊ីណាន មានប្រសាសន៍​មកកាន់កម្ពុជាថ្មីថា​ មាន​កក្ដា​ជាច្រើនដែលបាន​ធ្វើឱ្យភ្ញៀវទេសចរអន្តរជាតិមកទស្សនាកម្ពុជាថមថយចុះ ​ក្នុងនោះមាន​កត្តា​ខាងក្នុង ​និង​ខាង​កត្តា​ក្រៅ ដោយសារតែភាពមិនប្រាកដប្រជានៃសេដ្ឋកិច្ចសកល និងភាពតានតឹងភូមិសាស្រ្តនយោបាយ។​

​លោក​បានថ្លែងថា ​ស្ថានភាពសេដ្ឋកិច្ចពិភពលោកនៅតែមិនទាន់មានស្ថិរភាព ដែល​ធ្វើ​ឱ្យ​អ្នកដំណើរជាច្រើនកាត់បន្ថយការចំណាយលើការធ្វើដំណើរកម្សាន្ត​ និងផ្លាស់ប្ដូរទៅ​ជ្រើស​រើស​គោលដៅ​ដែល​មានតម្លៃប្រកួតប្រជែងជាងមុន។​

​ម្យ៉ាងទៀត ​ការប្រកួតប្រជែងក្នុងតំបន់អាស៊ានកាន់តែខ្លាំង ប្រទេសជិតខាងដូចជា ថៃ វៀតណាម និងម៉ា​ឡេស៊ី បានវិនិយោគយ៉ាងច្រើនលើការផ្សព្វផ្សាយទេសចរណ៍ ការបើកជើងហោះហើរថ្មី ការលើកលែងទិដ្ឋាការ និងការផ្ដល់កញ្ចប់ទេសចរណ៍ ដែលមានភាពទាក់ទាញខ្ពស់។

​លោក បន្ថែមថា កម្ពុជាមានបញ្ហាប្រឈមមួយចំនួន ដែលត្រូវកែលម្អ ដូចជា ការតភ្ជាប់ជើង​ហោះ​ហើរ​ត្រង់​ពីទីផ្សារសំខាន់ៗ​នៅមិនទាន់គ្រប់គ្រាន់ ការផ្សព្វផ្សាយទីផ្សារអន្តរជាតិ​ មិនទាន់មាន​ទំហំធំ​គ្រប់​គ្រាន់ ​ការប្រើប្រាស់បច្ចេកវិទ្យាឌីជីថល ក្នុងការទាក់ទាញភ្ញៀវទេសចរនៅមានកម្រិត និងការ​បង្កើត​ផលិតផលទេសចរណ៍ថ្មីៗ ដែលអាចឆ្លើយតបនឹងតម្រូវការភ្ញៀវសម័យថ្មី ដែលត្រូវការ​ពង្រឹងបន្ថែម។​

​ទោះជាយ៉ាងណា សក្ដានុពលទេសចរណ៍កម្ពុជានៅតែមានភាពរឹងមាំ។ កម្ពុជាមានបេតិកភណ្ឌ​ដ៏អស្ចារ្យ ​ឆ្នេរសមុទ្រ ​និង​កោះដែលមានសម្រស់ធម្មជាតិ ព្រមទាំងទេសចរណ៍ធម្មជាតិ ទេសចរណ៍​សហគមន៍ ទេសចរណ៍ម្ហូបអាហារ និងទេសចរណ៍សុខមាលភាព​ ដែលកំពុងមានការចាប់​អារម្មណ៍​កាន់​តែ​ច្រើនពីទីផ្សារអន្តរជាតិ។​

​លោក ធួន ស៊ីណាន​ បញ្ជាក់ថា៖«​ការថយចុះនេះ គួរត្រូវបានចាត់ទុកជាឱកាសមួយសម្រាប់​យើងក្នុង​ការពិនិត្យ ឡើងវិញនូវយុទ្ធសាស្ត្រ បង្កើនគុណភាពសេវាកម្ម បង្កើតផលិតផលថ្មីៗ ពង្រីកទីផ្សារថ្មី និងពង្រឹងកិច្ច សហការរវាងរាជរដ្ឋាភិបាល និងវិស័យឯកជន។ ប្រសិនបើយើងអាចធ្វើបានជាប្រព័ន្ធ និងមានការចូលរួម ពីគ្រប់ភាគី លោកជឿជាក់ថា វិស័យទេសចរណ៍កម្ពុជានឹង​អាចស្តារកំណើន​ឡើង​វិញ​បានយ៉ាងរឹងមាំ និងប្រកបដោយចីរភាព»។​

​យោងតាមក្រសួងទេសចរណ៍ ​គិតត្រឹមរយៈពេល ៥ ខែ ២០២៦ ​កម្ពុជាស្វាគមន៍​ភ្ញៀវ​ទេសចរ​អន្តរ​ជាតិ​ប្រមាណ​ ១,៥ ​លាននាក់​ ថយចុះ ​៤៧% ​ធៀប​នឹង​រយៈពេល​ដូចគ្នា ​នៅ​ឆ្នាំ​ ២០២៥។ ​

​ក្នុង​ចំណោមភ្ញៀវទេសចរណ៍​អន្តរជាតិជាង ១,៥ ​លាននាក់​ មាន​ទេសចរចិនជិត ៤០ ម៉ឺននាក់ ធ្លាក់ចុះ ១៩% វៀតណាម ៣៨ ម៉ឺននាក់ ធ្លាក់ចុះជិត ២៦% អាមេរិកជាង ៩ ម៉ឺននាក់ ធ្លាក់ចុះជាង ១១% អង់គ្លេសជាង ៦ ម៉ឺននាក់ ធ្លាក់ចុះ ១៤,៥% និងបារាំងជាង ៥ ម៉ឺននាក់ ធ្លាក់ចុះ ១៦,៥%។​

​នៅ​ក្នុងឆ្នាំ ​២០២៥ ​កម្ពុជា​ទទួល​បាន​ភ្ញៀវ​ទេសចរអន្តរជាតិចំនួន​ ៥,៥៧ ​លាននាក់ ​ធ្លាក់ចុះ ១៦,៧% ​ធៀបនឹងឆ្នាំ ២០២៤ ​ខណៈចំណូលបានពី​វិស័យ​ទេសចរណ៍​មាន​ចំនួន ៣.៨៧៨ លាន​ដុល្លារ​ កើន​ឡើង ៦,៦%៕

អត្ថបទ៖ ឡេង ដេត