ជនណាបន្លំក្នុងការប្រឡងបាក់ឌុប នឹងត្រូវទទួលពិន័យអន្តរការណ៍ពី ១លាន ទៅ ៥លានរៀល ករណីមិនរាងនឹងត្រូវពិន័យទ្វេដង

ក្រសួងអប់រំ យុវជន នឹងកីឡា បានកំណត់យកថ្ងៃទី១០ ខែសីហា ឆ្នាំ២០២៦ ជាថ្ងៃប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម្រាប់ឆ្នាំ២០២៦។ ទន្ទឹមនេះ ដើម្បីធានាបាននូវគុណភាព និងប្រសិទ្ធភាពអប់រំប្រកបដោយភាពត្រឹមត្រូវ និងយុត្តិធម៌ ក្រសួងក៏បានដាក់ចេញនូវបទប្បញ្ញត្តិ និងកម្រិតវិន័យចំពោះបេក្ខជនក្នុងការប្រលងសញ្ញាបត្រមធ្យមសិក្សាទុតិយភូមិ ឆ្នាំ២០២៦ នេះផងដែរ។

យោងតាមប្រការ១២ នៃបទប្បញ្ញត្តិនេះ បទល្មើសនៃការបន្លំក្នុងការប្រឡង តាមមាត្រា៤៩ នៃច្បាប់ស្តីពីការអប់រំ បានចែងថា សាមីខ្លួន ឬជនណាដែលប្រឡងជំនួស ឬបន្លំគ្រប់រូបភាពក្នុងការប្រឡងដូចបានបញ្ញត្តិមាត្រា២៦ នៃច្បាប់នេះ ត្រូវទទួលពិន័យអន្តរការណ៍ជាប្រាក់ពី ១លានរៀល ទៅ ៥លានរៀល។

ករណីមិនរាងចាល សាមីខ្លួនត្រូវទទួលពិន័យអន្តរការណ៍ជាប្រាក់ចំនួនទ្វេដងនៃប្រាក់ពិន័យអន្តរការណ៍ខាងលើ ហើយត្រូវព្យួរការប្រឡងសម្រាប់រយៈពេល ២ឆ្នាំ ឬហាមឃាត់មិនឱ្យចុះឈ្មោះក្នុងបញ្ជីប្រឡងជាស្ថាពរ។ ចំពោះជនដែលប្រឡងជំនួស ឬបន្លប់គ្រប់រូបភាពក្នុងការប្រឡង ត្រូវផ្តន្ទាទោសតាមច្បាប់ព្រហ្មទណ្ឌជាធរមាន៕