ព័ត៌មានជាតិ

ស.ស.យ.ក. ផ្តល់អាហារូបករណ៍ ១០០% ចំនួន ៣១៤កន្លែង សម្រាប់ឆ្នាំសិក្សា ២០២៦-២០២៧

បានផុស

៣ នាទី មុន

នៅ

ថ្ងៃពុធ ១៥ កក្កដា ២០២៦

ដោយ

ដើម្បីរួមចំណែកជាមួយរាជរដ្ឋាភិបាល ក្នុងការលើកកម្ពស់វិស័យអប់រំ និងបណ្តុះបណ្តាលធនធនាមនុស្សនៃកម្ពុជា ក្នុងឆ្នាំសិក្សា ២០២៦-២០២៧ នេះ សហភាពសហព័ន្ធយុវជនកម្ពុជា (ស.ស.យ.ក.) រាជធានីភ្នំពេញ ផ្តល់ជូនអាហារូបករណ៍ ១០០% ចំនួន ៣១៤កន្លែង។ នេះបើយោងតាមសេចក្តីជូនដំណឹងរបស់ សហភាពសហព័ន្ធយុវជនកម្ពុជា នាថ្ងៃទី១៥ ខែកក្កដា ឆ្នាំ២០២៦។

ការផ្តល់ជូននេះ សម្រាប់សិក្សាថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ទៅលើមុខជំនាញជាច្រើន នៅតាមបណ្តាគ្រឹះស្ថានសិក្សារដ្ឋ និងឯកជនដែលជាដៃគូ របស់ស.ស.យ.ក. រាជធានីភ្នំពេញ ដែលរួមមាន សាកលវិទ្យាល័យភូមិន្ទភ្នំពេញ, សាកលវិទ្យាល័យជាតិគ្រប់គ្រង, សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច, សាកលវិទ្យាល័យអាមេរិកាំងភ្នំពេញ, សាកលវិទ្យាល័យភូមិន្ទកសិកម្ម និងវិទ្យាស្ថានខ្មែរជំនាន់ថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំពោះលក្ខខណ្ឌនៃការជ្រើសរើស

+បេក្ខជនត្រូវមានលិខិតបញ្ជាក់ធ្លាក់បាក់ឌុប ឬសញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែល មានតម្លៃស្មើសម្រាប់សិក្សាថ្នាក់បរិញ្ញាបត្ររង។

+មានសញ្ញាបត្រមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់បរិញ្ញាបត្រ។
+មានសញ្ញាបត្របរិញ្ញាបត្រ ឬឯកសារបញ្ជាក់ដែលមានតម្លៃស្មើ សម្រាប់សិក្សាថ្នាក់ បរិញ្ញាបត្រជាន់ខ្ពស់។

+បេក្ខជនត្រូវបំពេញលក្ខខណ្ឌចុះឈ្មោះចូលសិក្សានៅគ្រឹះស្ថានសិក្សានីមួយៗ ដូចខាងក្រោម៖

-សាកលវិទ្យាល័យភូមិន្ទភ្នំពេញ៖ បេក្ខជនត្រូវគោរពគោលការណ៍ណែនាំ និងចុះឈ្មោះប្រឡង ចូលរៀនតាមមុខជំនាញនៅសាកលវិទ្យាល័យដោយផ្ទាល់ ឱ្យបានមុនថ្ងៃទី៣០ ខែកញ្ញា ឆ្នាំ២០២៦ជាកំហិត។

-សាកលវិទ្យាល័យអាមេរិកាំងភ្នំពេញ៖ សម្រាប់តែបេក្ខជនប្រឡងជាប់មធ្យមសិក្សាទុតិយភូមិ ទទួលបាននិទ្ទេស A, B និង C។ បេក្ខជនដែលបានដាក់ពាក្យទាំងអស់ ត្រូវឆ្លងកាត់ការធ្វើតេស្ត ភាសាអង់គ្លេស, គណិតវិទ្យា និងរូបវិទ្យា ( សម្រាប់ជំនាញ IT) ឬប្រវត្តិវិទ្យា ( សម្រាប់មុខ ជំនាញផ្សេងៗ) ដែលរៀបចំដោយសាកលវិទ្យាល័យផ្ទាល់។ បេក្ខជនជាប់ជ័យលាភីអាហារូបករណ៍ ត្រូវទទួលបន្ទុកបង់ថ្លៃសេវារដ្ឋបាល ៣០០$/ឆ្នាំ។

-វិទ្យាស្ថានខ្មែរជំនាន់ថ្មី៖ បេក្ខជនជាប់ជ័យលាភីអាហារូបករណ៍ ត្រូវទទួលបន្ទុកបង់ថ្លៃសេវារដ្ឋបាល ថ្នាក់បរិញ្ញាបត្ររង និងថ្នាក់បរិញ្ញាបត្រចំនួន១០០$/ឆ្នាំ និងថ្នាក់បរិញ្ញាបត្រជាន់ខ្ពស់ចំនួន ២០៨/ ឆ្នាំ។

+បេក្ខជនត្រូវឆ្លងកាត់ការវាយតម្លៃ និងជ្រើសរើសចុងក្រោយ ដែលរៀបចំដោយកម្មវិធីសាបព្រោះគ្រាប់ពូជ នៃសហភាពសហព័ន្ធយុវជនកម្ពុជា រាជធានីភ្នំពេញ។
+បេក្ខជនដែលជាប់ជ័យលាភីអាហារូបករណ៍ ត្រូវទទួលបន្ទុកចំណាយលើការចុះឈ្មោះចូលរៀន និង ចំណាយផ្សេងៗ តាមគ្រឹះស្ថានសិក្សានីមួយៗកំណត់។
+បេក្ខជនដែលជាប់ជ័យលាភីអាហារូបករណ៍ ត្រូវចូលរួមសកម្មភាពសង្គមនានារបស់ ស. ស. យ. ក.
រាជធានីភ្នំពេញ។

បេក្ខជនដែលមានចំណាប់អារម្មណ៍ អាចទាញយកសំណុំឯកសារស្នើសុំអាហារូបករណ៍របស់ ស. ស. យ. ក. រាជធានីភ្នំពេញ តាមរយៈ QR code ដើម្បីបំពេញ បន្ទាប់មក Upload ឯកសារទាំងអស់នេះ តាមរយៈតំណភ្ជាប់ ដាក់ពាក្យតាមគ្រឹះស្ថានសិក្សានីមួយៗ៕