ព័ត៌មានអន្ដរជាតិ

គ្រោះទឹកជំនន់នៅឥណ្ឌា ឆក់យកជីវិតមនុស្ស ៤១ ខណៈ ប្រមាណ១០០ បាត់ខ្លួន និងរាប់សែននាក់រងប៉ះពាល់

បានផុស

៤២ នាទី មុន

នៅ

ថ្ងៃព្រហស្បតិ៍ ២៣ កក្កដា ២០២៦

ដោយ

ស្ថានភាពទឹកជំនន់នៅរដ្ឋ Assam កាន់តែមានសភាពអាក្រក់ទៅៗ ខណៈរដ្ឋាភិបាលឥណ្ឌាបានបញ្ជាក់ពីចំនួនមនុស្ស ៤១នាក់ស្លាប់ នៅថ្ងៃពុធ ដោយមានកងទ័ពអាកាសឥណ្ឌា និងកងទ័ពជួយអាជ្ញាធររដ្ឋក្នុងការជួយសង្គ្រោះ ទោះបីជាមនុស្សជាង ៧២៧ ០០០នាក់ នៅតែរងផលប៉ះពាល់នៅទូទាំង ២៥ស្រុកនៃរដ្ឋភាគឦសាន។ នេះបើយោងតាមការចុះផ្សាយរបស់សារព័ត៌មាន Hindustan Times នៅថ្ងៃទី២៣ ខែកក្កដា ឆ្នាំ២០២៦ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអាជ្ញាធរគ្រប់គ្រងគ្រោះមហន្តរាយរដ្ឋអាសាម (ASDMA) មានអ្នកស្លាប់ចំនួន ១០នាក់ត្រូវបានរាយការណ៍នៅថ្ងៃពុធ កើនដល់ ៤១ នាក់ក្នុងរដ្ឋនេះ។

អភិបាលរដ្ឋ Assam លោក Himanta Biswa Sarma និយាយកាលពីថ្ងៃពុធ ថា មនុស្សជាង ១០០នាក់កំពុងបាត់ខ្លួន ហើយចំនួនអ្នកស្លាប់អាចនឹងកើនឡើងក្នុងរយៈពេល ៣ទៅ ៤ថ្ងៃខាងមុខ។ មនុស្សជាង ៧២៧ ០០០ នាក់នៅទូទាំង ២៥ ស្រុកបានរងផលប៉ះពាល់ដោយទឹកជំនន់។

លោកបន្តថា៖ « យើងមិនដែលឃើញទឹកជំនន់ប្រភេទនេះទេ! យោងតាមការវាយតម្លៃរបស់យើង យើងនឹងចាត់វិធានការសមស្របនាពេលអនាគត»។

មន្ត្រីបន្ថែមថា រដ្ឋាភិបាលរដ្ឋបានបង្កើតជំរំសង្គ្រោះចំនួន ៤៦៩ កន្លែង ហើយមនុស្ស ១៨ ០០០នាក់បានជ្រកកោន នៅទូទាំងស្រុកចំនួន ២៥ ដែលរងគ្រោះដោយទឹកជំនន់។

មិនតែប៉ុណ្ណោះកងទ័ពឥណ្ឌា កងកម្លាំងឆ្លើយតបគ្រោះមហន្តរាយជាតិ (NDRF) កងកម្លាំងឆ្លើយតបគ្រោះមហន្តរាយរដ្ឋ (SDRF) កងកាំភ្លើង Assam និងសេវាពន្លត់អគ្គិភ័យ និងសង្គ្រោះបន្ទាន់ ត្រូវបានដាក់ពង្រាយដើម្បីអនុវត្តប្រតិបត្តិការជួយសង្គ្រោះ និងផ្តល់ជំនួយដ៏ធំមួយនៅទូទាំងស្រុកដែលរងផលប៉ះពាល់៕

ណឺ មិនា