ចាក់វ៉ាក់សាំងយឺតយ៉ាវនិងកង្វះវិធានការទប់ស្កាត់ ប្រេស៊ីល ត្រៀមខ្លួនទទួលកូវីដ រលកទី៣

ខណៈកំពុងងើបឡើងវិញពីនាមជាប្រទេសមានអ្នកស្លាប់ខ្ពស់បំផុតមួយដោយសារជំងឺកូវីដ-១៩នៅលើពិភពលោក ប្រេស៊ីលកំពុងរងការគំរាមកំហែងនៃជំងឺកូវីដរលកទី៣ ដែលត្រូវបានជំរុញដោយការពន្យាពេលចាក់វ៉ាក់សាំង និងកង្វះវិធានការទប់ស្កាត់។

រលករាតត្បាតនីមួយៗនៅក្នុងប្រទេសប្រេស៊ីលត្រូវបានគេមើលឃើញថា មានសភាដ៏អាក្រក់ ​ពោលគឺកាលពីរលកទី១ក្នុងខែកក្កដាឆ្នាំ២០២០ ប្រេស៊ីលមានអ្នកស្លាប់ប្រហែល១,០០០នាក់ក្នុងមួយថ្ងៃ ហើយក្នុងរលកទី២កាលពីខែមេសាឆ្នាំនេះ មនុស្ស៣,០០០នាក់ បានស្លាប់ក្នុងថ្ងៃ។

ទោះបីជាយ៉ាងណាក៏ដោយ ចាប់តាំងពីពេលនោះមក អត្រាបានថយចុះមកជាមធ្យម មានអ្នកស្លាប់ប្រហែល១,៦០០នាក់ក្នុងមួយថ្ងៃ កាលពីសប្តាហ៍កន្លងទៅ ហើយប្រជាជនប្រេស៊ីលភាគច្រើនបានត្រឡប់ទៅរកស៊ីដូចធម្មតាវិញ។

ប៉ុន្តែខណៈរដូវរងានៅអឌ្ឍគោលខាងត្បូងខិតជិតមកដល់ជាថ្មីម្តងទៀត ក្រុមអ្នកជំនាញនិយាយថា ភ្លើងសញ្ញាប្រកាសអាសន្នកំពុងបំភ្លឺឡើង ដែលជាហេតុបង្កឲ្យមានការភ័យខ្លាចនៃការវិលត្រឡប់ទៅរកព្រឹត្តិការណ៍មុនៗ ដូចជាមន្ទីរពេទ្យពោរពេញដោយអ្នកជំងឺហូរហៀរ រណ្តៅកប់សពធំៗ រថយន្តក្លាស្សេសពគរលើគ្នា និងឈុតឆាករន្ធត់ផ្សេងៗទៀត។ 

ប្រទេសនេះ មានភាពយឺតយ៉ាវក្នុងការចាក់វ៉ាក់សាំងដល់ប្រជាជនចំនួន ២១២លាននាក់របស់ខ្លួន ហើយប្រញាប់ប្រញាល់ក្នុងការដកវិធានការស្នាក់នៅក្នុងផ្ទះ។

ទន្ទឹមនឹងនេះ វីរុសបំប្លែងខ្លួនដ៏គ្រោះថ្នាក់ រួមទាំងវីរុស Gamma ដែលបានកើតឡើងនៅក្នុងប្រទេសប្រេស៊ីលផ្ទាល់ បូករួមទាំងករណីដំបូងនៃវីរុស Delta ដែលកើតចេញពីប្រទេសឥណ្ឌាផងដែរ បានគំរាមកំហែងដល់ការបង្កើនល្បឿន រីករាលដាលនៃជំងឺនេះ។

ជំងឺកូវីដ-១៩ បានឆក់យកជីវិតមនុស្សជាង៤៧០,០០០នាក់ នៅក្នុងប្រទេសប្រេស៊ីលរួចទៅហើយពោលគឺជាប់ចំណាត់ថ្នាក់ទី ២ បន្ទាប់ពីសហរដ្ឋអាមេរិក៕

ប្រែសម្រួល៖ Vann Vann

ប្រភព៖ CNA

ចុចអាន៖ ប្រជាជនប្រេស៊ីល គោះចានឆ្នាំង ធ្វើបាតុកម្មប្រឆាំង ប្រធានាធិបតី (មានវីដេអូ)