ព័ត៌មានជាតិ

អធិការស្រុកបាទីកំពុងស្រាវជ្រាវយ៉ាងយកចិត្តទុកដាក់ ករណីឃាតកម្មលើបុរសម្នាក់នៅឃុំកុមារាជា

បានផុស

៥ years មុន

នៅ

ថ្ងៃចន្ទ ២១ មិថុនា ២០២១

ដោយ

លោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទី ប្រាប់ឲ្យថា ករណីឃាតកម្មទៅលើជនរងគ្រោះម្នាក់ នៅចំណុចភូមិខ្នារទង់ ឃុំកុមារាជា ស្រុកបាទី ខេត្តតាកែវ កាលពីយប់ម្សិលមិញនោះ សមត្ថកិច្ចនគរបាលស្រុកបាទី កំពុងខិតខំស្វះស្វែង ស្រាវជ្រាវ យ៉ាងយកចិត្តទុកដាក់ ដើម្បីតាមចាប់ជនសង្ស័យយកមកផ្តន្ទាទោសតាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមជម្រាបជូនថា កាលពីថ្ងៃទី១៩ ខែមិថុនា ឆ្នាំ២០២១ វេលាម៉ោង២២និង៤០នាទី មានការភ្ញាក់ផ្អើលករណីឃាតកម្មមួយកើតឡើង នៅចំណុចភូមិខ្នារទង់ ឃុំកុមារាជា ស្រុកបាទី ខេត្តតាកែវ ដែលបង្កឡើងដោយជនសង្ស័យ២នាក់ ត្រូវជាបងប្អូនបង្កើតនឹងគ្នា តាមកាប់សម្លាប់ជនរងគ្រោះដល់មុខផ្ទះរហូតដល់ស្លាប់នៅកន្លែង។

ជនរងគ្រោះត្រូវបានគេស្គាល់ឈ្មោះ មាំង ខេរៈ ភេទប្រុស អាយុ២៧ឆ្នាំ រស់នៅភូមិកើតហេតុខាងលើ ស្នាមដាច់ជាច្រើនកន្លែង និងដាច់ ក ដៃខាងឆ្វេងបណ្តាលឲ្យស្លាប់នៅនឹងកន្លែងកើតហេតុ មុខផ្ទះជនរងគ្រោះតែម្តង ហើយក្រោយពីកើតហេតុជនសង្ស័យបានរត់គេចខ្លួនបាត់ស្រមោល ។

ជុំវិញករណីនេះ លោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទីអះអាងយ៉ាងមុតមាំថា សមត្ថកិច្ចរបស់លោក កំពុងតែប្រឹងប្រែងស្រាវជ្រាវយ៉ាងក្តៅគគុក ដើម្បីតាមចាប់ជនសង្ស័យយកមកផ្តន្ទាទោសតាមច្បាប់ឲ្យខាងតែបាន៕

អត្ថបទ ៖ រ៉ាវុទ្ធ