យុទ្ធនាការចាក់វ៉ាក់សាំងកូវីដ-១៩បានពង្រីកដល់រាជធានីខេត្តចំនួន១៤ហើយ

ភ្នំពេញ៖ យុទ្ធនាការចាក់វ៉ាក់សាំងការពារជំងឺកូវីដ-១៩ ដល់ប្រជាពលរដ្ឋទូទៅដែលមានអាយុចាប់ពី១៨ឆ្នាំឡើងទៅបានពង្រីកដល់រាជធានីខេត្តចំនួន១៤ហើយ។

បើតាមក្រសួងសុខាភិបាលបានឱ្យដឹងថា បច្ចុប្បន្ននេះក្រុមការងារចាក់វ៉ាក់សាំងការពារជំងឺកូវីដ-១៩ កំពុងដំណើរការចាក់វ៉ាក់សាំងជូនដល់ប្រជាពលរដ្ឋនៅរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង ពោធិសាត់ ស្វាយរៀង កោះ កុង ព្រះសីហនុ កំពង់ចាម ត្បូងឃ្មុំ តាកែវ បន្ទាយមានជ័យ ប៉ៃលិន និងខេត្តព្រៃវែង។

ក្នុងនោះខេត្តប៉ៃលិន និងខេត្តព្រៃវែងចាប់ផ្តើមចាក់វ៉ាក់សាំងកូវីដ-១៩ ជូនពលរដ្ឋចាប់ពីថ្ងៃទី០៨ ខែកក្កដាឆ្នាំ២០២១នេះតទៅ ខណៈរាជធានីភ្នំពេញនឹងត្រូវបិទបញ្ចប់យុទ្ធនាការចាក់វ៉ាក់សាំងនៅថ្ងៃនេះ។

រដ្ឋបាលខេត្តព្រៃវែង នៅថ្ងៃទី០៧ ខែកក្កដា ឆ្នាំ២០២១នេះ បានចេញសេចក្ដីជូនដំណឹងស្ដីពីការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋនៅក្រុងព្រៃវែង ចាប់ពីថ្ងៃទី០៨ ដល់ថ្ងៃទី១៤ ខែកក្កដា ឆ្នាំ២០២១។

សម្រាប់ខត្តព្រៃវែង ការចាក់ថ្នាំបង្ការជំងឺកូវីដ-១៩ ធ្វើឡើងនៅទីតាំងវិទ្យាល័យអង្គដួង។

រីឯខេត្តប៉ៃលិនវិញចាក់វ៉ាក់សាំងជំងឺកូវីដ-១៩ ជូនដល់ប្រជាពលរដ្ឋចាប់ពីអាយុ១៨ឆ្នាំឡើងទៅមានរយៈពេល១៤ថ្ងៃគឺចាប់ពីថ្ងៃទី០៨ ខែកក្កដា ឆ្នាំ២០២១នេះតទៅ ដោយនៅក្រុងប៉ៃលិនចាក់នៅនៅមន្ទីរពេទ្យបង្អែកខេត្តប៉ៃលិនចំនួន​២កន្លែង និងនៅមណ្ឌលសុខភាពក្រចាប់ចំនួន១កន្លែង។

ស្រុកសាលាក្រៅចាក់នៅមណ្ឌលសុខភាពផ្សារព្រំចំនួន២កន្លែង នៅមណ្ឌលសុខភាពភ្នំស្កង់ចំនួន១កន្លែង នៅមណ្ឌលសុខភាពភ្នំព្រាលចំនួន១កន្លែង។

បើតាមក្រសួងសុខាភិបាលបានឱ្យដឹងថា គិតចាប់ពីថ្ងៃទី១០ ខែកម្ភៈរហូតមកដល់ត្រឹមថ្ងៃទី០៧ ខែកក្កដា ឆ្នាំ២០២១​នេះមានពលរដ្ឋទទួលបានការចាក់វ៉ាក់សាំងបង្ការជំងឺកូវីដ-១៩ ចំនួន៤,៧០១,២៥៥នាក់ ស្មើនឹង៤៧.០១% ធៀបនឹងគោលដៅ១០លាននាក់។

អត្ថបទ​៖ សំអឿន