អំណោយទាំង ៩ គេចៀសវាងជូនឱ្យគ្នា ព្រោះអាចនាំទុក្ខដល់អ្នកទទួល

ការជូនអំណោយដល់គ្នាក្នុងឱកាសពិសេស​​ ឬដើម្បីបង្ហាញសេចក្ដីស្រឡាញ់ក្ដី មិនចេះតែជូនតាមនឹកឃើញឡើយ ព្រោះថានៅលោកខាងលិចក៏ដូចជានៅអាស៊ីមានអបិយជំនឿមុតមាំចំពោះអំណោយទាំងនោះ។ អំណោយខ្លះជូនទៅ នឹងទទួលបានក្ដីសុខសប្បាយ តែអំណោយខ្លះទៀតអាចនាំទុក្ខទោស ក្ដៅក្រហាយដល់អ្នកទទួល។

ហេតុនេះគេតែងតែប្រយ័ត្នចំពោះអំណោយទាំង ៩ នេះ!  

១. កន្សែងដៃ

កន្សែងដៃ ផ្សារភ្ជាប់ជាមួយនឹងទឹកភ្នែក។ នៅប្រទេសស៊ុយអែត គេមិនដែលជូនកន្សែងដៃឱ្យគ្នានោះទេ ព្រោះគេជឿថា វាតំណាងឱ្យភាពបែកបាក់នៃស្នេហាឬមិត្តភក្តិ។

២. ស្បែកជើង

ស្បែកជើងជានិមិត្តរូបនៃសំណាងអាក្រក់ ព្រោះគេគិតថា វាជាសញ្ញាបង្ហាញពីការដើរចេញរបស់បុគ្គលសំខាន់ក្នុងជីវិត។

 ៣. ពណ៌ខ្មៅ

ពណ៌នៃអំណោយក៏មានសារៈសំខាន់ខ្លាំងដែរ។ ការឲ្យឬទទួលរបស់របរពណ៌ខ្មៅត្រូវបានគេចាត់ទុកជាគ្រោះ ដោយសារពណ៌នេះតំណាងឱ្យសេចក្តីស្លាប់។

៤. ផ្កា

ការជូនផ្កាជាអំណោយដ៏គួរឱ្យស្រឡាញ់ ប៉ុន្តែប្រសិនបើផ្កាតែមួយទងបែរជាសំណាងអាក្រក់ទៅវិញ។​ តាមជំនឿវាអាចនាំឱ្យអ្នកទទួលនោះទៅជាឈឺ ជាពិសេសឈឺហើយមិនងាយជាសះស្បើយ។

៥. ស្រោមដៃ

កាដូស្រោមដៃជាសំណាងមិនល្អ ដែលមានន័យថា អ្នកនឹងមានជម្លោះឈ្លោះប្រកែកគ្នា ឬបាត់បង់មិត្តភាពដែលជិតដិត។

៦. រូបសត្វក្ងោក

រូបសត្វក្ងោក​ឬស្លាបរបស់វា ត្រូវបានហាមប្រាមក្នុងការផ្តល់ជាអំណោយ ព្រោះវានឹងទាក់ទាញវេទមន្តងងឹត ឬថាមពលអាក្រក់ចូលក្នុងគ្រួសារ។

៧. ឆ័ត្រឬកញ្ចក់

ឆ័ត្រនិងកញ្ចក់ក៏ជាអំណោយដែលគ្មានសំណាងល្អផងដែរ ព្រោះវានឹងបង្កឱ្យមានការឃ្លាតឆ្ងាយពីគ្នា ឬដាច់ទំនាក់ទំនងតែម្ដង។

៨. វត្ថុធ្វើពីដែក

ប្រយ័ត្នចំពោះអំណោយដែលធ្វើពីលោហៈធាតុ ជាពិសេសវត្ថុដែលធ្វើពីសំណ។ តាមក្បួនហោរាសាស្ត្រទស្សន៍ទាយថានឹងមានអំពើអាក្រក់មកព័ទ្ធជុំជិត។

៩. កាបូប

ប្រសិនបើឱ្យកាបូបស្ពាយឬកាបូបលុយទៅនរណាម្នាក់ ចាំបាច់ត្រូវប្រាកដថា អ្នកដាក់កាក់យ៉ាងហោចណាស់មួយកាក់នៅខាងក្នុង។ ពុំនោះទេ អ្នកដែលទទួលនឹងមិនអាចរកស៊ីអ្វីឱ្យសមប្រកបឡើយ៕

ប្រែសម្រួល៖ សន្យា

ប្រភព៖ MENTALFLOSS

ចុចអាន៖ ​ក្នុងជីវិតគួរមានគ្រឿងអលង្ការ​ទាំងនេះ ដើម្បីបង្កើនហុងស៊ុយនិងការពារពីភាពអវិជ្ជមានផ្សេងៗ

ចុចអាន៖ ស្លាកលេខឡានឬម៉ូតូបែបណា ទើបចាត់ទុកជាលេខហុងស៊ុយល្អ?