ព័ត៌មានអន្ដរជាតិ

PHE រកឃើញសញ្ញាដំបូង វ៉ាក់សាំងប្រហែលជាមិនអាចការពារ Delta មិនឲ្យឆ្លងបានទេ

បានផុស

៥ years មុន

នៅ

ថ្ងៃសៅរ៍ ៧ សីហា ២០២១

ដោយ

មានសញ្ញាដំបូងបង្ហាញថា មនុស្សបានចាក់វ៉ាក់សាំងបង្ការកូវីដ-១៩រួចហើយប្រហែលជានៅតែអាចឆ្លងវីរុសបំប្លែងខ្លួនដ៏កាចសាហាវ Delta បានងាយស្រួលដូចមនុស្សមិនទាន់ចាក់វ៉ាក់សាំង។ នេះជាការលើកឡើងរបស់អ្នកវិទ្យាសាស្ត្រនៅសុខភាពសាធារណៈអង់គ្លេស (PHE) កាលពីសុក្រ ទី៦ ខែសីហា។

ការរកឃើញនេះចេញពីមជ្ឈមណ្ឌលគ្រប់គ្រង និងបង្ការជំងឺឆ្លងសហរដ្ឋអាមេរិក (CDC) ដែលកាលពីសប្តាហ៍មុនបានលើកឡើងពីកង្វល់ថា អ្នកចាក់វ៉ាក់សាំងរួចបានឆ្លងវីរុស Delta ដែលខុសពីវីរុសបំប្លែងខ្លួនផ្សេងៗ។

វីរុសបំប្លែងខ្លួន Delta ដែលងាយឆ្លងយ៉ាងលឿន និងស្រួលបានកំពុងរាតត្បាតពិភពលោកយ៉ាងខ្លាំងដែលបានសម្លាប់មនុស្សជាង៤.៤លាននាក់ ក្នុងនោះនៅចក្រភពអង់គ្លេសជាង ១៣០ ០០០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វ៉ាក់សាំងបង្ហាញពីការការពារយ៉ាងល្អប្រឆាំងនឹងមិនឲ្យឈឺធ្ងន់ និងបណ្តាលឲ្យស្លាប់ពីវីរុស Delta ជាពិសេសការចាក់ទាំងពីរដូស ប៉ុន្តែមិនមានទិន្នន័យច្រើនទេថាតើអ្នកចាក់វ៉ាក់សាំងរួចហើយនៅតែអាចចម្លងទៅអ្នកផ្សេងឬយ៉ាងណា។

PHE បាននិយាយក្នុងសេចក្តីប្រកាសមួយថា ៖«ការរកឃើញពីដំបូងមួយចំនួន បង្ហាញថា កម្រិតឆ្លង Delta លើមនុស្សបានចាក់វ៉ាក់សាំងរួចរាល់ហើយគឺប្រហាក់ប្រហែលនឹងកម្រិតឆ្លងលើមនុស្សមិនទាន់ចាក់វ៉ាក់សាំង»។

«នេះប្រហែលជាមានផលប៉ះពាល់ដល់ការឆ្លងមេរោគរបស់មនុស្ស មិនថាពួកគាត់ចាក់វ៉ាក់សាំងរួច ឬក៏អត់ទេ។ ទោះជាយ៉ាងណា នេះជាការស្រាវជ្រាវវិភាគដំបូង និងតម្រូវឲ្យមានការសិក្សាបន្ថែមទៀតជុំវិញបញ្ហានេះ»។

PHE បាននិយាយថា ករណីឆ្លង Delta ដែលបានបញ្ជាក់ដែលបានចូលព្យាបាលនៅមន្ទីរពេទ្យចាប់តាំងពីថ្ងៃទី១៩ ខែកក្កដាមកគឺ មាន៥៥.១%ជាអ្នកដែលមិនទាន់ចាក់វ៉ាក់សាំង និងមាន៣៤.៩%ជាអ្នកដែលបានចាក់វ៉ាក់សាំង២ដូសហើយ។

ប្រជាជនអង់គ្លេសជិត៧៥%បានចាក់វ៉ាក់សាំងទាំងពីរដូស ប៉ុន្តែ PHE បាននិយាយថា «មនុស្សចាក់វ៉ាក់សាំងបានច្រើន យើងនៅតែឃើញភាគរយឆ្លងខ្ពស់នៃអ្នកចាក់វ៉ាក់សាំងរួចហើយចូលមន្ទីរពេទ្យ»៕

ប្រែសម្រួល៖ វីរបុត្រ
ប្រភព៖ Reuters

Related Topics:កូវីដ-១៩