មិនធ្លាប់មានសោះលើលោក! ឥណ្ឌា អនុម័ត វ៉ាក់សាំងកូវីដប្រើ DNA

និយតករឱសថរបស់ប្រទេសឥណ្ឌាបានផ្តល់ការអនុញ្ញាតឱ្យប្រើប្រាស់បន្ទាន់នូវវ៉ាក់សាំងការពារជំងឺកូវីដ-១៩ ZyCoV-D ដែលប្រើ DNA ក្នុងការផលិតដំបូងគេរបស់ពិភពលោកប្រឆាំងនឹងវីរុសកូរ៉ូណា ចំពោះមនុស្សពេញវ័យនិងកុមារដែលមានអាយុចាប់ពី ១២ ឆ្នាំឡើងទៅ។

វ៉ាក់សាំង ZyCoV-D​ ជាវ៉ាក់សាំងទី ៦ ដែលបានអនុញ្ញាតឱ្យប្រើនៅក្នុងប្រទេសឥណ្ឌា ដែលការអនុម័តនេះ មានគោលបំណងផ្ដល់ការចាក់ថ្នាំបង្ការដល់មនុស្សពេញវ័យនៅខែធ្នូខាងមុខ ក៏ដូចចាប់ផ្ដើមចាក់ជូនមនុស្សវ័យក្មេងក្រោម ១៨ ឆ្នាំជាលើដំបូង ខណៈយុទ្ធនាការចាក់វ៉ាក់សាំងក្នុងប្រទេស​ ទើបតែសម្រេចបាន ៩.១៨%ប៉ុណ្ណោះ។

វ៉ាក់សាំង ZyCoV-D​ ជាបច្ចេកវិទ្យាដែលប្រើ DNA ឬ RNA របស់វីរុសដើម្បីបង្កើតប្រូតេអ៊ីនជាក់លាក់ឱ្យប្រព័ន្ធភាពស៊ាំទទួលស្គាល់វីរុស និងអាចឆ្លើយតបទៅនឹងវីរុសវិញ។

ក្រុមហ៊ុនផលិតឱសថ Zydus Biotech បានប្រកាសថា ខ្លួនគ្រោងផលិតវ៉ាក់សាំង ZyCoV-D​ ពី ១០០-១២០ លានដូសក្នុងមួយឆ្នាំ ហើយវាមិនដូចវ៉ាក់សាំងការពារកូវីដ-១៩ ភាគច្រើននោះទេ ដោយតម្រូវឱ្យចាក់​ ៣ដូស។

ក្រុមហ៊ុននេះថ្លែងថា វ៉ាក់សាំងកូវីដ-១៩ របស់ខ្លួន មានប្រសិទ្ធភាពប្រឆាំងនឹងវីរុសបំប្លែងខ្លួនថ្មីៗ​ ជាពិសេសវីរុសបំប្លែងខ្លួន Delta។ ផ្អែកតាមទិន្នន័យដែលបញ្ចេញដោយក្រុមហ៊ុនកាលពីដើមខែកក្កដា ឆ្នាំ២០២១ បានឱ្យដឹងថា វ៉ាក់សាំង ZyCoV-D មានប្រសិទ្ធភាព ៦៦.៦% នៅក្នុងការសាកល្បងដំណាក់កាលចុងក្រោយលើអ្នកស្ម័គ្រចិត្តជាង ២៨,០០០ នាក់៕

ប្រែសម្រួល៖ សន្យា

ប្រភព៖ CNA

ចុចអាន៖ អង់គ្លេស អនុម័តឲ្យប្រើប្រាស់ថ្នាំមួយប្រភេទព្យាបាលកូវីដជាលើកដំបូង

ចុចអាន៖ ចាក់ឆ្លាស់គ្នារវាង AstraZeneca និងវ៉ាក់សាំងចាក់តែមួយដូស Sputnik Light បង្កើនកម្រិតអង់ទីគ័រខ្ពស់