ព័ត៌មានជាតិ

វិវាទរវាងមន្ត្រីបសុពេទ្យនិងអាជីវករកាប់សាច់សត្វពពែត្រូវបានដោះស្រាយបញ្ចប់

បានផុស

៥ years មុន

នៅ

ថ្ងៃអង្គារ ២១ កញ្ញា ២០២១

ដោយ

វិវាទវាងមន្ត្រីបសុពេទ្យខេត្តកណ្តាល និងអាជីវករប្រឡេះសាច់សត្វពពែ ដែលបានផ្ទុះពេញហ្វេប៊ុកនាពេលថ្មីៗនេះ ត្រូវបានដោះស្រាយបញ្ចប់ជាស្ថាពរហើយ ក្រោយមានការសម្របសម្រួលពីលោកអភិបាលខេត្តកណ្តាលរួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា នៅថ្ងៃទី១៧ ខែកញ្ញា ឆ្នាំ២០២១ វេលាម៉ោង០៦ព្រឹក នៅចំណុចភូមិ ព្រែកតាព្រហ្ម ឃុំកំពង់អុស ស្រុកពញាឮ ខេត្តកណ្តាល មានការឃាត់សួររបស់មន្ត្រីបសុពេទ្យខេត្តកណ្តាល ទៅលើបងប្អូនប្រជាពលរដ្ឋដែលបានដឹកជញ្ជូនសាច់សត្វពពែចំនួន១៧គីឡូក្រាមដែលការណ៍នេះបានបណ្តាលឱ្យមានការឈ្លោះប្រកែកគ្នារហូតដល់មានការបង្ហោះហ្វេសប៊ុកទៅក្នុងផេកសម្តេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា បង្កើតឲ្យដល់មានការខមិនវែកញែក មានខុស មានត្រូវទៅលើគូភាគីទាំងពីរជាច្រើននៅតាមបណ្តាញផ្សព្វផ្សាយសង្គម ពីសំណាក់បងប្អូនប្រជាពលរដ្ឋកម្ពុជាយ៉ាងផុលផុស។

ថ្លែងក្នុងឱកាសចុះដោះស្រាយករណីការឃាត់សួរការដឹកជញ្ជូនសាច់សត្វពពែ ដោយគ្មានលិខិតអនុញ្ញាតិរបស់បងប្អូនខ្មែរឥស្លាមចំនួន២៨គ្រួសារ នៅចំណុចភូមិព្រែកតាព្រហ្ម ឃុំកំពង់អុស ស្រុកពញាឭ ខេត្តកណ្តាល នារសៀលថ្ងៃទី២០ ខែកញ្ញា ឆ្នាំ២០២១ នៅសាលាស្រុកពញ៉ាឮ លោក គង់ សោភ័ណ្ឌ អភិបាលខេត្តកណ្ដាល បានមានប្រសាសន៍ថា ជាទូទៅការកាប់សាច់ជាលក្ខណៈគ្រួសារដើម្បីធ្វើជាម្ហូបអាហារគឺមិនមានការហាមឃាត់ឃាំងនោះទេ ប៉ុន្តែករណីនេះ ជាការកាប់សត្វលក់ជាលក្ខណៈអាជីវកម្ម ការធ្វើអាជីវកម្មលក់ដូរ និងកាប់សាច់ធ្វើម្ហូបអាហារហូបជាលក្ខណៈគ្រួសារ គឺខុសគ្នា។

ក្រោយការសម្របសម្រួលម្ចាស់សត្តឃាតដ្ឋានបានយល់ព្រមឯកភាពយកតម្លៃ៤,០០០រៀល ក្នុងការសំឡេះសត្វពពែ០១ក្បាល ដោយមានអុសប្រកបដោយអនាម័យត្រឹមត្រូវ ក្នុងរយៈពេល០១ឆ្នាំតំបូង និងសុំឡើងតម្លៃ៥,០០០រៀល ក្នុង០១ក្បាល នៅឆ្នាំទី២ ទី៣ និងស្នើសុំលើកលែងតម្លៃសេវាកម្មត្រួតពិនិត្យអនាម័យសាច់តាមរយៈរដ្ឋបាលខេត្តកណ្តាល។

ចំពោះសំណើរនេះ លោកអភិបាលខេត្ត នឹងធ្វើរបាយការណ៍ជូន លោកអគ្គបណ្ឌិតសភាចារ្យឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីគោរពស្នើសុំគោលការណ៍សម្រេចដ៏ខ្ពង់ខ្ពស់ពី សម្តេចតេជោ នាយករដ្ឋមន្ត្រីដើម្បីពិចារណាលើការលើកលែងចំពោះសំណូមពរខាងលើ ជូនបងប្អូនប្រជាពលរដ្ឋ។

ចំណែកក្រុមមន្ត្រីសមត្ថកិច្ចអនុវត្តច្បាប់ដែលបានប្រើប្រាស់ពាក្យសំដីមិនសមរម្យទៅលើប្រជាពលរដ្ឋនាថ្ងៃនោះ បានសូមសំដែងនូវការសោកស្តាយ និងសូមអភ័យទោសចំពោះពាក្យសំដីលើសលស់ ទៅលើបងប្អូនប្រជាពលរដ្ឋ និងបានសន្យាចំពោះមុខថ្នាក់ដឹកនាំគ្រប់រូប គ្រប់ជាន់ថ្នាក់ ព្រមទាំងប្រជាពលរដ្ឋដោយសន្យាឈប់ប្រព្រឹត្តទង្វើបែបនេះតទៅទៀត ដោយសូមកែសម្រួលឥរិយាបទក្នុងការ និយាយស្តី និងទង្វើរឲ្យបានល្អប្រសើរសក្ដិសមជាមន្ត្រីបម្រើប្រជាពលរដ្ឋយ៉ាងពិតប្រាកដរបស់សម្តេចតេជោ គ្រប់ទីកន្លែង និងគ្រប់ពេលវេលា។

ក្នុងឱកាសចុះសម្របសម្រួលនេះដែរ លោកអភិបាលខេត្តកណ្ដាលបានធ្វើការណែនាំដល់មន្ត្រីពាក់ព័ន្ធទាំងអស់ត្រូវតែចេះប្រើប្រាស់ពាក្យសំដីល្អសមរម្យទៅចំពោះប្រជាជន ព្រមទាំងមានការសម្របសម្រួលផ្លូវចិត្តទាំងមន្ត្រី និងប្រជាពលរដ្ឋផងដែរ ខណ:ដែលលោកអភិបាលខេត្តស្នើសុំឲ្យមានការយោគយល់អធ្យាស្រ័យគ្នាចំពោះភាពលើសលួសនាពេលកន្លងមកដោយសហការគ្នា គោរពស្រលាញ់រាប់អានគ្នាក្នុងនាមខ្មែរស្រលាញ់ខ្មែរ ខ្មែរជួយខ្មែរ៕

អត្ថបទ៖ សំអឿន

Related Topics:ខេត្តកណ្ដាល