KPT+

ចង់សាក់ចិញ្ចើម បបូរមាត់ ឬត្របកភ្នែក ដើម្បីសុវត្ថិភាព ត្រូវដឹងពីការសាក់ឲ្យច្បាស់សិនទៅ!

បានផុស

៤ years មុន

នៅ

ថ្ងៃសៅរ៍ ៦ វិច្ឆិកា ២០២១

ដោយ

Sonya

រឿងកែសម្ផស្ស ស្រីៗជំនាញជាងប្រុសៗឆ្ងាយណាស់ ព្រោះចង់ឲ្យមើលទៅកាន់តែស្អាតជាងមុន និងចំណេញពេលតុបតែងមុខបានច្រើនទៀតផង ធ្វើឲ្យការសាក់កែសម្ផស្ស កំពុងពេញនិយមខ្លាំងគ្រប់កន្លែងជុំវិញពិភពលោក ។ យ៉ាងណា មុនសម្រេចចិត្តសាក់កែសម្ផស្ស ស្រីៗគ្នាយើង គួរស្វែងយល់ឲ្យបានច្បាស់ពីវា ធ្វើម៉េចទើបសាក់ទៅ ត្រូវនឹងទម្រង់មុខ ពណ៌ស្បែកយើង និងមានសុវត្ថិភាព។ អត្ថបទនេះនឹងលើកពីការសាក់កែសម្ផស្សឲ្យគ្នាយើងបានដឹង។

១- ដំណើរការសាក់កែសម្ផស្ស

ដំណើរការសាក់កែសម្ផស្ស ស្រដៀងគ្នានឹងការសាក់លម្អខ្លួនធម្មតាដែរ គ្រាន់តែការសាក់កែសម្ផស្ស ត្រូវប្រើបច្ចេកទេស Micro Pigmentation ដោយយកម្ជុលចាក់ចូលទៅស្រទាប់ជ្រៅនៃស្បែក។ អ្នកជំនាញខាងសក់ អាចប្រើវិធីផ្សេងៗគ្នាក្នុងការសាក់កែសម្ផស្សនេះ ដោយវិធីមួយចំនួន រួមមាន ប្រើម៉ាស៊ីនសាក់បែបបុរាណ ម៉ាស៊ីនប៊ិច ឬម៉ាស៊ីនបង្វិល និងការសាក់ដោយដៃ មិនប្រើម៉ាស៊ីន ខណៈដំណើរការទាំងស្រុង ក្នុងការសាក់កែសម្ផស្សមាន៖

– ពិគ្រោះអំពីពណ៌ និងវិធីសាក់លើស្បែកអ្នក
– ធ្វើតេស្តលើស្បែក ដើម្បីចង់ដឹងថាស្បែកយើងមានប្រតិកម្មជាមួយសារធាតុត្រូវប្រើ ឬអត់?
– ចាក់សារធាតុពណ៌ចូលស្បែក ដោយមុននឹងចាក់សាក់ គ្នាយើងភាគច្រើន ត្រូវចាក់ថ្នាំស្ពឹកលើស្បែកជាមួយសិន ដើម្បីការពារការឈឺចាប់ពេលចាក់សាក់។
– តាមដាន ដើម្បីវាយតម្លៃពីគុណភាព និងពណ៌របស់សាក់ចាក់រួច។

គ្រូពេទ្យឯកទេសខាងស្បែក ឯកទេសខាងកែសម្ផស្ស ឯកទេសខាងថ្នាំសណ្ដំ គិលានុបដ្ឋាយិកា និងអ្នកគូររូបសាក់ សុទ្ធតែមានតួនាទីក្នុងដំណើរការសាក់កែសម្ផស្សនេះ។

២- ប្រភេទសាក់កែសម្ផស្ស

ការសាក់កែសម្ផស្ស អាចធ្វើលើផ្នែកផ្សេងៗនៃរាងកាយ ប៉ុន្តែការសាក់ នេះច្រើនធ្វើនៅបីកន្លែង មាន បបូរមាត់ ចិញ្ចើម និងត្របកភ្នែក។

Lips Tattoo - Divine Brow Lash Salon and Academy

– បបូរមាត់៖ សាក់បបូរមាត់ នឹងធ្វើឲ្យបបូរមាត់ក្រហមស្អាត ទោះជាមិនលាបក្រែមក៏ដោយ។ ក្រៅពីធ្វើបបូរមាត់មានពណ៌ស្អាត ក៏អាចធ្វើបបូរមាត់យើងមានទម្រង់ស្អាត បំបាត់ស្លាកស្នាមលើបបូរមាត់ និងស្នាមជ្រួញរបស់បបូរមាត់។

– ចិញ្ចើម៖ ការសាក់ចិញ្ចើម គឺជាដំណោះស្រាយសម្រាប់ចិញ្ចើមស្ដើង អត់ចិញ្ចើម ឬចិញ្ចើមខ្លី។ ស្រីៗសាក់ចិញ្ចើម នឹងជួយសម្រួលដល់ការគូរចិញ្ចើម ដោយបាច់ចំណាយពេលយូរទៀត។

-ត្របកភ្នែក៖ សាក់លើត្របកភ្នែក វិធីសាក់កែសម្ផស្សពេញនិយមបំផុតមួយ ដោយមានម៉ូត និងពណ៌ជាច្រើនផ្សេងៗគ្នាសម្រាប់សាក់លើត្របកភ្នែក ធ្វើឲ្យមើលទៅស្រទន់ រោមភ្នែកដូចធម្មជាតិ។ ស្រីៗមួយចំនួន ជ្រើសរើសការសាក់លើត្របកភ្នែកទាំងលើ និងក្រោម ឯខ្លះធ្វើតែមួយផ្នែក គឺគ្រប់គ្រាន់ មើលទៅស្អាតដូចធម្មជាតិ។

គ្នាយើងត្រូវធ្វើការសាក់កែសម្ផស្ស នៅកន្លែងមានអ្នកជំនាញត្រឹមត្រូវ និងអាចទុកចិត្តបាន។ កត្តាបីយ៉ាង ជួយឲ្យការសាក់ចិញ្ចើមយើងមានសុវត្ថិភាព ត្រូវតែសម្លាប់មេរោគ បច្ចេកទេស និងការធានារ៉ាប់រង។ ត្រូវត្រៀមខ្លួនឲ្យបានល្អសម្រាប់ប្រតិកម្ម ការឆ្លងរោគ និងផលវិបាកផ្សេងៗអាចកើតមាន៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ មុនសម្រេចចិត្តតចង្កា គួរដឹងប៉ុន្មានចំណុចនេះសិន

ចុចអាន៖ កំពុងគាបធ្មេញ តិចច្រឡំធ្វើរឿងអស់នេះ យ៉ាប់ហើយ!