OPEC+ និងអារ៉ាប៊ីសាអូឌីត នៅតែផ្តោតលើទិន្នផលប្រេង

យោងតាមក្រុមហ៊ុន Vitol Group បានឲ្យដឹងថា ការកើនឡើងតម្លៃប្រេងខ្ពស់ជាងការរំពឹងទុករបស់ប្រទេសអារ៉ាប៊ីសាអូឌីត គឺជាសញ្ញាមួយដែលបង្ហាញ ខ្លួននឹងបន្តតតាំងជាមួយសម្ពាធរបស់សហរដ្ឋអាមេរិក ដែលឲ្យបូមប្រេងឲ្យបានលឿនជាងមុន។

ក្រុមហ៊ុន Saudi Aramco បានដំឡើងតម្លៃខែធ្នូសម្រាប់អតិថិជននៅអាស៊ី សហរដ្ឋអាមេរិក និងអឺរ៉ុបកាលពីថ្ងៃសុក្រ ពោលគឺមួយថ្ងៃបន្ទាប់ពីអង្គការ OPEC+ ជាប់គាំងនឹងផែនការរបស់ខ្លួន ក្នុងការជំរុញទិន្នផលក្នុងល្បឿនបន្តិចម្តងៗ។

យោងតាមទិន្នន័យដែលចងក្រងដោយ Bloomberg បានឲ្យដឹងថា ការដំឡើងតម្លៃលក់ផ្លូវការឬ OSP របស់ក្រុមហ៊ុនរដ្ឋ សម្រាប់អាស៊ី គឺជាការឡើងថ្លៃខ្ពស់បំផុតលើកទី៣ ក្នុងសតវត្សរ៍នេះ។

លោក Mike Muller ប្រធានអាស៊ីនៅក្រុមហ៊ុន Vitol ដែលជាពាណិជ្ជករប្រេងឯករាជ្យធំបំផុតរបស់ពិភពលោកបានប្រាប់ Bloomberg កាលពីថ្ងៃអាទិត្យថា “ពួកគេទំនងជាមិនផ្លាស់ប្តូរជំហរទេ”។

ប្រធានាធិបតីសហរដ្ឋអាមេរិកលោក Joe Biden បានអំពាវនាវដល់អង្គការ OPEC+ ដែលជាសម្ព័ន្ធមិត្តមាន២៣ប្រទេសដឹកនាំដោយអារ៉ាប៊ីសាអូឌីតនិងរុស្ស៊ី ឲ្យពន្លឿនការបន្ធូរបន្ថយ ឈប់ទប់ស្កាត់ការផ្គត់ផ្គង់ ដែលបានចាប់ផ្តើមនៅដើមឆ្នាំ២០២០ ស្របពេលជំងឺរាតត្បាតផ្ទុះឡើង។

នៅឆ្នាំនេះ ប្រេងបានឡើងថ្លៃប្រហែល ៦០% ដល់ជាង ៨០ ដុល្លារក្នុងមួយបារ៉ែល ដោយសារតែការស្ទុះងើបឡើងវិញនៃសេដ្ឋកិច្ចពិភពលោក និងការកាត់បន្ថយរបស់ OPEC+។

អារ៉ាប៊ីសាអូឌីត បានដំឡើង OSP ថ្លៃជាងការរំពឹងទុក។ នោះគឺជាសញ្ញាមួយសម្រាប់អ្នកដែលកំពុងរិះគន់ OPEC+ ចំពោះការមិនដាក់ប្រេងគ្រប់គ្រាន់នៅលើទីផ្សារ។ អារ៉ាប៊ីសាអូឌីតបានបង្ហាញថា ពួកគេពិតជាអាចធ្វើឲ្យតម្លៃប្រេងឡើងកាន់តែខ្ពស់៕

ប្រែសម្រួល៖ Vann Vann

ប្រភព៖ Bloomberg

ចុចអាន៖ ថ្ងៃ នេះ តម្លៃ ប្រេង ឡើង ថ្លៃ បន្ទាប់ ពី ក្រុម ហ៊ុន Aramco ឡើង ថ្លៃ លក់