នាយករដ្ឋមន្រ្តី​កម្ពុជា​-ឡាវ​ ឯកភាពពន្លឿន​ការ​ចរចា​លើរឿង​ព្រំដែន​

វត្តមាន​របស់​នាយករដ្ឋមន្រ្តីឡាវ​ឯកឧត្តមបណ្ឌិត ផនខាំ វីផាវ៉ាន់ នៅ​កម្ពុជា បាន​សម្រេច​ការងារ​មួយ​ចំនួន ក៏​មាន​ពាក់ព័ន្ធ​ការ​ដោះស្រាយ​​លើ​កិច្ចការ​ព្រំដែនរវាង​ប្រទេស​ទាំងពីរ។

ពាក់ព័ន្ធនឹងកិច្ចការព្រំដែនកម្ពុជា និងឡាវ សម្រេចបានការខណ្ឌសីមា និងបោះបង្គោលចំនួន ១២១បង្គោល ស្មើនឹង​៨៦%​នៃខ្សែព្រំដែនរួម។ ភាគីទាំងពីរបានឯកភាពប្រគល់ភារកិច្ចជូន គណៈកម្មាធិការចម្រុះព្រំដែននៃប្រទេសទាំងពីរ ពនឿនការចរចាលើសន្ធិសញ្ញាកំណត់ព្រំដែនរដ្ឋរវាងកម្ពុជា និងឡាវ សំរាប់ខ្សែព្រំដែនដែលបានឯកភាពគ្នា និងពិភាក្សាគ្នាលើការបោះបង្គោលព្រំដែនបំពេញបន្ថែមចន្លោះបង្គោល ដែលមានស្រាប់នៅក្នុងតំបន់ដែលបានឯកភាពគ្នារួច ៨៦% ព្រមទាំង ផលិតផែនទីជាឧបសម្ព័ន្ធនៃសន្ធិសញ្ញាខាងលើនេះ។

ជាមួយ​គ្នា​នេះ​ដែរ ក្នុង​ដំំណើរ​ប្រមុខ​ដឹកនាំ​របស់​ប្រទេស​ឡាវ​នេះ​ដែរ នាយករដ្ឋមន្ត្រីទាំងពីរបានឯកភាពបន្តជំរុញពន្លឿន​ការបញ្ចប់សេចក្តីព្រាងផែនការសកម្មភាព សម្រាប់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែងរវាងប្រទេសទាំងពីរ ដែលអាចនឹងឈានដល់ការចុះហត្ថលេខាក្នុងពេលឆាប់ៗខាងមុខនេះ ស្របតាមការឯកភាពគ្នាក្នុងជំនួប ទ្វេភាគីរវាងសម្តេចតេជោនាយករដ្ឋមន្ត្រី និងឯកឧត្តមបណ្ឌិត ថងលូន ស៊ីសុលីត ដែលពេលនោះជានាយករដ្ឋមន្ត្រី នៅក្នុងឱកាសទស្សនកិច្ចផ្លូវការរបស់ឯកឧត្តមនៅកម្ពុជាកាលពីថ្ងៃទី១២-១៣ ខែ កញ្ញា ឆ្នាំ២០១៩។

នាយករដ្ឋមន្ត្រីទាំងពីរ បានឯកភាពគ្នាបន្តជំរុញការផ្លាស់ប្តូរទស្សនកិច្ច និងជំនួបរវាងថ្នាក់ដឹកនាំនៃប្រទេសទាំងពីរ ក្រសួង-ស្ថាប័ន អាជ្ញាធរមូលដ្ឋានឱ្យបានទៀងទាត់ ដើម្បីជំរុញកិច្ចសហប្រតិបត្តិការលើវិស័យមួយចំនួន ព្រមទាំងពង្រឹងទំនាក់ទំនងមិត្តភាពជាប្រពៃណីរវាងកម្ពុជា និង ឡាវ។ ភាគីទាំងពីរ ក៏បានឯកភាពជំរុញឱ្យអាជ្ញាធរពាក់ព័ន្ធថ្នាក់កណ្តាល និងថ្នាក់មូលដ្ឋានរបស់ខ្លួន អនុវត្តភារកិច្ចប្រកបដោយការទទួលខុសត្រូវខ្ពស់ ធានាបាននូវសន្តិភាព និងស្ថិរភាពតាមតំបន់​ព្រំដែនកម្ពុជា-ឡាវ ដើម្បីប្រែក្លាយតំបន់ព្រំដែនទៅជាតំបន់ប្រកបដោយសន្តិភាព មិត្តភាពយូរអង្វែង និងកិច្ចសហប្រតិបត្តិការ។

ក្នុងវិស័យការពារជាតិ និងសន្តិសុខសាធារណៈ ថ្នាក់ដឹកនាំនៃប្រទេសទាំងពីរ បានព្រមព្រៀងជំរុញកិច្ចសហប្រតិបត្តិការបន្ថែមទៀតក្នុងការទប់ស្កាត់ និងបង្ក្រាបសកម្មភាពខុសច្បាប់តាមរយៈការផ្លាស់ប្តូរ និងចែករំលែកព័ត៌មានរវាងស្ថាប័នមានសមត្ថកិច្ចនៅតំបន់ព្រំដែននៃប្រទេសទាំងពីរ។ នាយករដ្ឋមន្ត្រីទាំងពីរបានឯកភាពជំរុញបន្តការពិគ្រោះយោបល់គ្នាឲ្យបានទៀងទាត់។

ថ្នាក់ដឹកនាំទាំងពីរបានបញ្ជាក់សាជាថ្មីអំពីសារសំខាន់ ក្នុងការលើកកម្ពស់កិច្ចសហប្រតិបត្តិការ ទ្វេភាគី ដើម្បីបង្កើនពាណិជ្ជកម្មនិងការវិនិយោគបន្ថែមទៀត សំដៅជំរុញការស្តារសេដ្ឋកិច្ចឡើងវិញឱ្យបានឆាប់។ ភាគីទាំងពីរបានជំរុញឲ្យអាជ្ញាធរពាក់ព័ន្ធពន្លឿន​ការចរចាលើកិច្ចព្រមព្រៀងស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធ និងពន្ធលើប្រាក់ចំណូល (DTA)។

ពាក់ព័ន្ធនឹងកិច្ចសហប្រតិបត្តិការតំបន់ និងអន្តរជាតិ ថ្នាក់ដឹកនាំទាំងពីរ បានផ្លាស់ប្តូរទស្សនៈគ្នាលើបញ្ហាដែលជាផលប្រយោជន៍ និងកង្វល់រួម និងបានបញ្ជាក់នូវការប្តេជ្ញាចិត្តយ៉ាងមុតមាំ ក្នុងការគាំទ្រគ្នាទៅវិញទៅមក និងជំរុញបន្ថែមទៀតនូវកិច្ចសហប្រតិបត្តិការក្នុងក្របខ័ណ្ឌពហុភាគី ជាពិសេសអាស៊ាន ដែលនឹងរួមចំណែកដល់សន្តិភាព ស្ថិរភាព និងវិបុលភាពតំបន់ និងពិភពលោក។

សម្តេចតេជោនាយករដ្ឋមន្ត្រី បានថ្លែងអំណរគុណឯកឧត្តមបណ្ឌិត ផនខាំ វីជាវ៉ាន់ ដែលបានគាំទ្រកម្ពុជាក្នុងការរៀបចំកិច្ចប្រជុំកំពូលអាស៊ី-អឺរ៉ុប លើកទី១៣ នៅថ្ងៃទី២៥-២៦ ខែវិច្ឆិកា ឆ្នាំ២០២១ កន្លងទៅថ្មីៗនេះដោយជោគជ័យ និងក្នុងការបំពេញតួនាទីរបស់កម្ពុជាជាប្រធានអាស៊ាននៅឆ្នាំ២០២២។

ឯកឧត្តមបណ្ឌិត ផនខាំ វីជាវាន់ ក៏បានអញ្ជើញសម្តេចតេជោនាយករដ្ឋមន្ត្រី និងសម្តេច កិត្តិព្រឹទ្ធបណ្ឌិតទៅបំពេញទស្សនកិច្ចផ្លូវការនៅប្រទេសឡាវ នៅពេលវេលាសមស្របឆាប់ៗខាងមុខនេះ៕