ព័ត៌មានជាតិ

ពលរដ្ឋរងគ្រោះដោយទឹកជំនន់ជិត១០០គ្រួសារ ទទួលអំណោយមនុស្សធម៌លោករដ្ឋមន្ត្រី វង សូត

បានផុស

៦ years មុន

នៅ

ថ្ងៃសៅរ៍ ២៤ តុលា ២០២០

ដោយ

លោក ញ៉ឹក វណ្ណារ៉ា រដ្ឋលេខាធិការ តំណាង លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា អញ្ជើញចុះសួរសុខទុក្ខ និងនាំយកគ្រឿងឧបភោគ ជូនដល់ប្រជាពលរដ្ឋដែលរងគ្រោះដោយជំនន់ទឹកភ្លៀង នៅភូមិឆ្នុកទ្រូ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង កាលពីល្ងាចម្សិលមិញនេះ។

តំណាង លោក វង សូត បានថ្លែងនូវការផ្ដាំផ្ញើសួរសុខទុក្ខពី សំណាក់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា។ ដែលជានិច្ចកាល សម្ដេចទាំងទ្វេ តែងតែគិតគូរ យកចិត្តទុកដាក់ អំពីសុខទុក្ខរបស់ប្រជាពលរដ្ឋជាធំ។

បន្ថែមពីនោះ ទោះនៅទីណាក៏ដោយ ឲ្យតែមានពលរដ្ឋរងគ្រោះ ឬជួបទុក្ខអាសន្ន ទោះដល់ទីតំបន់ដាច់ស្រយាលយ៉ាងណាក៏ដោយ ក៏មានវត្តមាន សម្ដេចទាំងទ្វេ ចុះទៅដល់ទីនោះ ពិសេសមួយរយៈនេះ ប្រជាជនរងគ្រោះដោយទឹកជំនន់រាប់សែនគ្រួសារ។

ជាក់ស្ដែង ស្របតាមការចង្អុលបង្ហាញរបស់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងលោករដ្ឋមន្ត្រី វង សូត រួចមក ក្រុមការងារ ក៏បាននាំអំណោយ ស្បៀង ដើម្បីជួយដោះស្រាយទាន់ពេលវេលា និងសម្រួលបន្ទុកដល់ប្រជាពលរដ្ឋដែលកំពុងរងគ្រោះដោយកូវីដ-១៩ និងជំនន់ទឹកភ្លៀង ក្នុងស្រុកបរិបូរណ៍។

អំណោយសប្បុរសធម៌ដែលបានចែកជូនគ្រួសាររងគ្រោះដោយទឹកជំនន់ជិត១០០គ្រួសារនោះរួមមាន ៖ អង្ករ មី ត្រីខ ទឹកត្រី ទឹកស៊ីអ៊ីវ ប្រេងឆា និង ថវិកា២ម៉ឺនរៀល ក្នុង១គ្រួសារ ដែលជាអំណោយសប្បុរសធម៌ ក្រសួង និង លោកឧកញ៉ា អ៊ុច សម្បត្តិ ស្ថាបនិកក្រុមហ៊ុនគ្រួសារកក់ក្តៅ និងភរិយា៕អត្ថបទ ៖ វិមាន

Related Topics:អំណោយ