ឥឡូវនេះ អ្នកទេសចរបរទេសទៅលេង ថៃ លែងដូចមុនហើយ ត្រូវតេស្តម៉ាស៊ីនធំ PCR ចំនួន ២ ដង

អាជ្ញាធរអាកាសចរណ៍ស៊ីវិលនៃប្រទេសថៃ (CAAT) បានចេញសេចក្តីជូនដំណឹងដល់បេសកកម្មផ្លូវអាកាស (NOTAM) ឲ្យជូនដំណឹងដល់ក្រុមហ៊ុនអាកាសចរណ៍ជុំវិញពិភពលោកអំពីបទប្បញ្ញត្តិថ្មីរបស់ប្រទេសថៃទាក់ទងនឹងអ្នកទេសចរដែលធ្វើដំណើរក្រោមកម្មវិធី “Test & Go” និង “Sandbox” ក្នុងគោលបំណងទប់ស្កាត់ការរីករាលដាលនៃវីរុសកូវីដបំប្លែងខ្លួន Omicron ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់សារព័ត៌មាន Thai PBS World បានឲ្យដឹងថា CAAT បានអំពាវនាវឲ្យក្រុមហ៊ុនអាកាសចរណ៍ជួយពិនិត្យមើលឯកសារអ្នកដំណើររបស់ពួកគេ និងធានាថា ពួកគេបំពេញតាមលក្ខណៈវិនិច្ឆ័យថ្មី ។

សម្រាប់ពេលនេះ អ្នកដំណើរដែលបានទទួលលិខិតឆ្លងដែនប្រទេសថៃរួចហើយនៅក្រោមប្រព័ន្ធកម្មវិធី Test & Go នៅតែអាចចូលប្រទេសថៃបាន ជាមួយនឹងការធ្វើចត្តាឡីស័កតិចតួច ប៉ុន្តែនឹងត្រូវឆ្លងកាត់ការធ្វើតេស្តម៉ាស៊ីនធំ PCR ចំនួន ២ ដង ។

កន្លងមកអ្នកដំណើរត្រូវធ្វើតេស្ត PCR តែ ១ ដងប៉ុណ្ណោះ និងការធ្វើតេស្តរហ័សនៅថ្ងៃទី ៦ នៅពេលមកដល់ ។ សារព័ត៌មាន Thai PBS World រាយការណ៍ថា ចំពោះអ្នកដែលដាក់ពាក្យសុំរួចហើយ ប៉ុន្តែនៅតែរង់ចាំប្រព័ន្ធ Thailand Pass ក៏អាចចូលប្រទេសបានដែរ នៅពេលដែលពួកគេទទួលបានលិខិតឆ្លងដែន ។

ចំណែកអ្នកទេសចរបរទេសដែលប្រើប្រាស់គម្រោងប្រអប់ខ្សាច់ភូកេត “Phuket Sandbox” ត្រូវតែស្នាក់នៅលើកោះក្នុងសណ្ឋាគារ SHA Plus យ៉ាងហោចណាស់ ៧ ថ្ងៃ មុនពេលដល់ថ្ងៃកំណត់ក្នុងការអនុញ្ញាតឲ្យធ្វើដំណើរទៅកន្លែងផ្សេងទៀតនៅប្រទេសថៃ ។

ទន្ទឹមនោះអ្នកធ្វើដំណើរទាំងអស់ មិនថាក្រោមកម្មវិធី Test & Go ដែលបានចុះឈ្មោះមុន ឬការមកដល់របស់គម្រោង Phuket Sandbox នោះទេ នឹងត្រូវបញ្ជូនទៅធ្វើតេស្ត PCR លើកទី ២ ដូចគ្នានៅទីតាំងរបស់រដ្ឋាភិបាល ៕

ប្រែសម្រួលដោយ ៖ ជីវ័ន្ត

ប្រភព ៖ Thaiger

ចុចអាន ៖ ក្រោយរកឃើញ Omicron ច្រើនឡើងៗ ថៃ ពិចារណាដាក់ភ្ញៀវទេសចរ បរទេសធ្វើចត្តាឡីស័កជាថ្មី