ជប៉ុន​គាំទ្រ​សម្តេច​តេជោ ហ៊ុន សែន ផ្តួចផ្ដើម​គំនិត​កែ​លម្អ​ស្ថាន​ភាព​នៅ​មីយ៉ាន់ម៉ា

មានប្រសាសន៍នៅក្នុងពិធីសម្ពោធដាក់ឱ្យប្រើប្រាស់កំណាត់ផ្លូវជាតិលេខ ៥ ប្រវែងជិត ៨៥ គីឡូម៉ែត្រ ពីទីរួមខេត្តបាត់ដំបង ទៅទីរួមខេត្តបន្ទាយមានជ័យ (ក្រុងសេរីសោភណ្ឌ) នាព្រឹកថ្ងៃចន្ទ ទី១០ ខែមករា ឆ្នាំ២០២២នេះ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជាបានគោរពចំពោះការផ្តួចផ្ដើមគំនិតសម្តេចតេជោ ហ៊ុន សែន ក្នុងការកែលម្អស្ថានភាពនៅមីយ៉ាន់ម៉ា ខណៈដែលកម្ពុជាធ្វើជាប្រធានអាស៊ាន។

លោកឯកអគ្គរាជទូតជប៉ុនបានថ្លែងយ៉ាងដូច្នេះថា “ប្រទេសកម្ពុជានឹងធ្វើជាប្រធានអាស៊ាននៅឆ្នាំ២០២២ នេះ ខ្ញុំសូមសម្ដែងនូវការគោរពចំពោះសម្ដេចតេជោនាយករដ្ឋមន្ត្រីសម្រាប់ដំណើរទស្សនកិច្ចភ្លាមៗរបស់សម្ដេចទៅកាន់មីយ៉ាន់​ម៉ា និងរួចផ្ដើមគំនិតក្នុងការកែលម្អស្ថានភាពនៅប្រទេសមីយ៉ាន់ម៉ាផងដែរ។ ប្រទេសជប៉ុនមានបំណងផ្ដល់កិច្ចសហប្រតិបត្តិការ ដើម្បីឲ្យប្រទេសកម្ពុជាទទួលបានជោគជ័យក្នុងនាមជាប្រធានអាស៊ាន។

សូមបញ្ជាក់ថា ដើម្បីជួយមីយ៉ាន់ម៉ា ក៏ដូចជាអាស៊ាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញទៅសាធារណរដ្ឋសហភាពមីយ៉ាន់ម៉ា រយៈពេល២ថ្ងៃ កាលពីថ្ងៃទី ០៧ និង០៨ ខែមករា ឆ្នាំ២០២២ ហើយទស្សនកិច្ចទទួលបានផ្លែផ្កាយ៉ាងខ្លាំង ដោយនាយឧត្តមសេនីយ៍ជាន់ខ្ពស់ មីន អោង ឡាំង បានប្រកាសពីបទឈប់បាញ់គ្នាជាមួយអង្គការប្រដាប់អាវុធជនជាតិភាគតិចទាំងអស់ ក្នុងរយៈពេល៥ខែ រហូតដល់ចុងខែកុម្ភៈ ឆ្នាំ២០២២ និងបានសម្រេចពន្យារបទឈប់បាញ់គ្នាបន្ថែមទៀត រហូតដល់ចុងឆ្នាំ២០២២។ 

ជាមួយគ្នានោះ នាយឧត្តមសេនីយ៍មីន អោង ឡាំង ក៏បានអំពាវនាវដល់គ្រប់ភាគីពាក់ព័ន្ធទាំងអស់ឱ្យទទួលអនុវត្ត​បទឈប់បាញ់គ្នា ដើម្បីផលប្រយោជន៍ប្រទេសជាតិ និងប្រជាជនបញ្ឈប់រាល់អំពើហិង្សា និងប្រកាន់នូវភាពអត់ធ្មត់ខ្ពស់បំផុត ដែលទង្វើទាំងនេះសម្តេចតេជោនាយករដ្ឋមន្ត្រី បានសម្ដែងនូវការគាំទ្រយ៉ាងខ្លាំង ក្នុងគោលបំណងកាត់បន្ថយភាពតានតឹង និងបើកផ្លូវឱ្យមានកិច្ចសន្ទនាប្រកបដោយស្មារតីស្ថាបនា រវាងភាគីពាក់ព័ន្ធទាំងអស់ សំដៅឈានទៅសម្រេចបាននូវសន្ថិភាពយូរអង្វែង និងការអភិវឌ្ឍជាតិ។

នាយឧត្តមសេនីយ៍ មីន អោង ឡាំង ក៏បានស្វាគមន៍ការចូលរួមរបស់ប្រេសិតពិសេសរបស់ប្រធានអាស៊ាន ស្តីពីមីយ៉ាន់ម៉ា ដើម្បីចូលរួមក្នុងកិច្ចពិភាក្សាអំពីបទឈប់បាញ់ជាមួយអង្គការប្រដាប់អាវុធជនជាតិភាគតិច។

សម្តេចតេជោនាយករដ្ឋមន្ត្រី បានប្រាប់ មីន អោង ឡាំង ដែរថា តាមបទពិសោធន៍ និងមេរៀនដែលកម្ពុជាទទួលបានពីដំណើរការសន្តិភាព, សន្តិភាពពេញលេញ និងការបង្រួបបង្រួមជាតិ មិនអាចសម្រេចបានទេ ប្រសិនបើគ្មានការចូលរួម និងការព្រមព្រៀងគ្នាពីគ្រប់ភាគីពាក់ព័ន្ធទាំងអស់។

ដើម្បីសម្រេចតាមអនុសាសន៏សម្តេចតេជោ នាយឧត្តមសេនីយ៍ជាន់ខ្ពស់ មីន អោង ឡាំង បានធានាពីការសម្របសម្រួលដំណើរទស្សនកិច្ចរបស់ប្រេសិតពិសេសនៅមីយ៉ាន់ម៉ា និងការជួបជាមួយនឹងភាគីពាក់ព័ន្ធទាំងអស់ រួមទាំងអង្គការប្រដាប់អាវុធជនជាតិភាគតិច ដោយពិចារណាទៅលើស្ថានការណ៍ជាក់ស្តែងនៅមីយ៉ាន់ម៉ា៕

អត្ថបទ៖ កោះកែវ