វប្បធម៌ ជំនឿ

ប្រវត្តិយូរលង់នៃការសែនដកជើងធូប តាមជំនឿហុងស៊ុយ ចិន

បានផុស

៣ years មុន

នៅ

ថ្ងៃអាទិត្យ ១៥ មករា ២០២៣

ដោយ

វិធីសែនដកជើងធូប ឬបុណ្យសែនអរគុណទេវតា ជូនដំណើរទេវតាឡើងទៅឋានសួគ៍នេះ ត្រូវបានប្រជាជនចិន ឬកូនខ្មែរកាត់ចិន តែងតែប្រាព្ធឡើងជារៀងរាល់ចុងឆ្នាំចាស់ ពោលគឺមុនសែនចូលឆ្នាំចិនរយៈពេល ៥ ថ្ងៃទៅ ៦ ថ្ងៃ។

ការសែននេះ គឺដើម្បីអរគុណដល់ទេវតាទាំងអស់នៅក្នុងផ្ទះ ឬហៅម្យ៉ាងថាសូកប៉ាន់ទេវតា ដែលពួកគាត់បានជួយការពារ និងផ្ដល់ភាពចម្រុងចម្រើនដល់សមាជិកក្នុងផ្ទះពេញមួយឆ្នាំ ដូចនេះយើងត្រូវចេះដឹងគុណដល់អ្នកដែលតាមថែរក្សាយើង ទាំងដែលយើងមិនដែលធ្លាប់ឃើញ ទាល់តែសោះ។ គេជឿថា នៅពេលដែលសែនដឹងគុណដល់ទេវតានឹងរំភើប អរសប្បាយពីអ្វីដែលយើងសែនជូន ពេលដែលសោយអាហារដែលជាគ្រឿងសែនហើយអស់ ពពួកទេវតានឹងឡើងទៅឋានសួគ៌ទូលថ្វាយស្ដេចទេវតាពីទឹកចិត្តដឹងគុណរបស់យើង និងរឿងល្អៗដែលយើងបានធ្វើពេញមួយឆ្នាំ២០២២នេះ ។ ពេលនោះស្ដេចទេវតានិងប្រទានលាភជ័យ ដំឡើងអំណាចបារមីតាមទេវតា ដើម្បីឲ្យទេវតាជំនាងផ្ទះ ទេវតាចង្ក្រាន ទេវតាព្រះភូមិ ទេវតាយាមទ្វា នាំយកលាភជ័យនោះមកឲ្យយើង នៅពេលយើងសែនចូលឆ្នាំចិននាពេលខាងមុខនេះ។

យ៉ាងណាមិញ ប្រពៃណីទំនៀមទម្លាប់របស់ជនជាតិចិន នៃការដកជើងធូប ត្រូវធ្វើឡើងតែម្ដងប៉ុណ្ណោះក្នុងមួយឆ្នាំ លើកលែងតែមានករណីពិសេស ឬករណីចាំបាច់ណាមួយ ហើយការដកជើងធូបនេះទៀតសោត ក៏ត្រូវធ្វើឡើងដោយមានការសែនព្រេនត្រឹមត្រូវ ។ ជនជាតិចិនជាទូទៅ មិនហ៊ានបំពានទម្លាប់នេះទេ។ ប្រសិនបើមានការបំពាន ឬធ្វើអ្វីមួយឲ្យឆ្គាំឆ្គង នឹងនាំឲ្យចង្រៃពេញមួយឆ្នាំ ហើយប្រជាជនចិនមិនហ៊ានដកជើងធូបចេញពីកំប៉ុងឡើយ ដោយជនជាតិចិនខ្លះបកស្រាយថា ធ្វើតាមចាស់ៗ ខណៈអ្នកខ្លះឆ្លើយថា ខ្លាចរាសីដាក់ ជួបគ្រោះកាចចង្រៃស៊យពេញមួយឆ្នាំ ។

មួយវិញទៀត ចំពោះជើងធូបដែលបានដក ឬផេះក្នុងកំប៉ុងដែលបានចាកចេញប្ដូរថ្មីនោះ គឺកុំចោលធុងសំរាម ព្រោះជាទ្រព្យឆ្នាំចាស់ អាចយកទៅចោលក្នុងថូផ្កាមុខផ្ទះ ឲ្យក្លាយជាជី នោះទ្រព្យនឹងកើនឡើងទ្វេដងថែមទៀត៕

គ្រូ ណុប

ប្រភព៖ហុងស៊ុយ

ចុចអាន៖តាមជំនឿ ពេលណាត្រូវអុចធូប ១៦ ដើម ដើម្បីនាំសំណាងល្អ នៃផ្នែកហិរញ្ញវត្ថុចូលមក