ព័ត៌មានជាតិ

រយៈពេល៤ថ្ងៃខេត្តបាត់ដំបងទទួលបានកំណើនភ្ញៀវទេសចរច្រើនគួឲ្យកត់សម្គាល់

បានផុស

៤ years មុន

នៅ

ថ្ងៃសុក្រ ៤ កុម្ភៈ ២០២២

ដោយ

ក្នុងឱកាសបុណ្យប្រពៃណីចូលឆ្នាំចិនវៀតណាមក្នុងរយៈពេល០៤ថ្ងៃគិតពីថ្ងៃទី៣១ ខែមករា ឆ្នាំ២០២២ដល់ថ្ងៃទី០៣ ខែកុម្ភៈ ឆ្នាំ២០២២ក្នុងខេត្តបាត់ដំបងបានទាក់ទាញភ្ញៀវទេសចរជាតិនិងអន្តរជាតិមកទស្សនាកម្សាន្តតាមរមណីយដ្ឋានទេសចរណ៍និងគោលដៅទេសចរណ៍នានាក្នុងខេត្តបាត់ដំបងមានកំណើនច្រើនគួឲ្យកត់សម្គាល់ បើប្រៀបធៀបនិងឆ្នាំ២០២១។ នេះបើយោងតាមរបាយការណ៍ពីមន្ទីរទេសចរណ៍ខេត្តដែលកម្ពុជាថ្មីទទួលបាននៅព្រលប់ថ្ងៃទី០៣ ខែកុម្ភ:នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពដដែលបន្តឲ្យដឹងថា រមណីយដ្ឋានទេសចរណ៍និងគោលដៅទេសចរណ៍សំខាន់ៗដែលបានទាក់ទាញកំណើនភ្ញៀវមកទស្សនាកម្សាន្តក្នុងភូមិសាស្ត្រខេត្តបាត់ដំបងនារដូវកាលចូលឆ្នាំប្រពៃណីចិនវៀតណាមក្នុងឆ្នាំ២០២២នេះមានដូចជា រមណីយដ្ឋានប្រាសាទបាណន់,រមណីយដ្ឋានភ្នំសំពៅ,រមណីយដ្ឋានប្រាសាទឯកភ្នំ,រមណីយដ្ឋានអាងកំពីងពួយ,រមណីយដ្ឋានចម្ការស្វាយ,រមណីយដ្ឋានស្ទឹងថ្មដាចម្ការធុរេន,រមណីយដ្ឋានទឹកធ្លាក់៥៣ភ្នំព្រឹក,រមណីយដ្ឋាននគរជុំភ្នំព្រឹក,រមណីយដ្ឋានភ្នំកំពូល,រមណីយដ្ឋានចម្ការធុរេនអូរតង,រមណីយដ្ឋានវាលចម្បាំងខេមសាយ,សហគមន៍អេកូទេសចរណ៍ទឹកធ្លាក់អូរជាំ,សហគមន៍អេកូទេសចរណ៍ព្រែកទាល់,មណ្ឌលកម្សាន្តឡូរីជើងភ្នំបាណន់,រមណីយដ្ឋានស្ទឹងក្រញូង,គោលដៅទេសចរណ៍ស្ទឹងថ្វាក,រមណីយដ្ឋានចំការមៀន,គោលដៅទេសចរវត្តភ្នំចំបាំង,មណ្ឌលកម្សាន្តសួនទឹកសុភមង្គល,ផ្ទះផ្កាBegonia,សួនផ្កាភ្នំសំពៅ,សួនផ្កាឈើទាល,និងគោលដៅទេសចរណ៍នានាក្នុងខេត្តបាត់ដំបង។

ប្រភពខាងលើបង្ហាញឲ្យដឹងថា ចំនួនភ្ញៀវទេសចរណ៍ដែលមកកម្សាន្តក្នុងខេត្តបាត់ដំបងមានចំនួនសរុប២១៨,៤២០នាក់កើនឡើង២០៣.៧៧%ប្រៀបធៀបនឹងរយៈពេលដូចគ្នាឆ្នាំ២០២១ចំនួន៧១,៩០៤នាក់ក្នុងនោះមានភ្ញៀវទេសចរជាតិចំនួន២១៧,៩៥៩នាក់កើនឡើង២០៣.៩៤%ប្រៀបធៀបឆ្នាំ២០២១ចំនួន៧១,៧១១នាក់។ភ្ញៀវទេសចរអន្តរជាតិ(បរទេសផ្ទៃក្នុង)មានចំនួន៤៦១នាក់កើនឡើង១៣៨.៧៧%ប្រៀបធៀបឆ្នាំ២០២១ចំនួន១៩៣នាក់។

ពាក់ព័ន្ធនិងកំណើនភ្ញៀវទេសចរកើនឡើងខាងលើនេះលោក ហម អារុណ ប្រធានការិយាល័យគ្រប់គ្រងឧស្សាហកម្មទេសចរណ៍ខេត្តបានបញ្ជាក់ឲ្យដឹងថា កត្តាដែលនាំអោយមានកំណើនភ្ញៀវទេសចរឆ្នាំនេះបណ្តាលមកពីសន្តិភាពសន្តិសុខសណ្តាប់ធ្នាប់មានភាពល្អប្រសើរក្រោមដំបូលសន្តិភាពមានហេដ្ឋារចនាសម្ព័ន្ធទៅកាន់រមណីយដ្ឋាននិងគោលដៅទេសចរណ៍នានាល្អ។

មានការរៀបចំផលិតផលថ្មីៗនៅតាមគោលដៅទេសចរណ៍សំខាន់ៗបានប្រសើរួមផ្សំជាមួយអាកាសធាតុអំណោយផលតំបន់គោលដៅទេសចរណ៍នៅជាប់ប្រភពទឹកមានសភាពស្អាត(ត្រជាក់និងទឹកថ្លាល្អរាក់ងាយស្រួលលេងកម្សាន្ត)និងមានការធូរស្រាលនៃជំងឺកូវីដ១៩(ប្រជាពលរដ្ឋសាំជាមួយជំងឺដោយសារបានចាក់វ៉ាក់សាំងលើសពី៣ដង)ក្នុងពលរដ្ឋម្នាក់ៗ។

លោកបន្តថា ពិសេសគ្រប់រមនីយដ្ឋាននិងគោលដៅទេសចរណ៍ទាំងអស់បានគោរពនិងអនុវត្តតាមវិធានការរបស់ក្រសួងសុខាភិបាលក៏ដូចជាអនុសាសន៍ណែនាំពីប្រមុខរាជរដ្ឋាភិបាលបានល្អប្រសើតាមរយះសេចក្តីណែនាំពីរដ្ឋបាលសាលាខេត្តរួមនិងមន្ទីរពាក់ព័ន្ធផងបានរួមសហការជាមួយម្ចាស់ទីតាំងរមនីយដ្ឋាននិងគោលដៅតំបន់ទេសចរណ៍សំខាន់ៗដើម្បីអនុវត្តវិធានការខាងលើនេះឲ្យមានប្រសិទ្ធិភាពលើសុខភាពភ្ញៀវទេសទេសចរទូទៅដែលបានចូលមកកម្សាន្តលើទឹកដីខេត្តបាត់ដំបងក្នុងរយះពេល០៤ថ្ងៃមកនេះ៕

អត្ថបទ៖ សៅ សារិទ្ធ