ក្រុម​ប្រឹក្សា​រាជធានី​ ជំរុញឱ្យ​សមាជិក​សហការ​ជាមួយ​អាជ្ញាធរ​ ចាក់​វ៉ាក់សាំង​ឱ្យ​ប្រជា​ពលរដ្ឋ​ឱ្យ​បាន​គ្រប់គ្នា

ប្រធានក្រុមប្រឹក្សារាជធានីភ្នំពេញ លោក ម៉ប់ សារិន បានស្នើដល់សមាជិកក្រុមប្រឹក្សាដែលចុះទៅមូលដ្ឋានខណ្ឌ សង្កាត់ត្រូវសហការជាមួយ អាជ្ញាធរពាក់ពន្ធ័ឲ្យបានល្អ និងត្រូវចេះសួរនាំសំដៅធ្វើយ៉ាងណាជំរុញការចាក់វ៉ាក់សាំងជូនបងប្អូនប្រជាពលរដ្ឋអោយបានគ្រប់គ្នា។

ការសំណូមពរបែបនេះបានធ្វើឡើងក្នុងកិច្ចប្រជុំសាមញ្ញលើកទី ៣៤ របស់ក្រុមប្រឹក្សារាជធានីភ្នំពេញ នាព្រឹកថ្ងៃទី ១០ ខែមីនា នៅសាលារាជធានីភ្នំពេញ។

លោក ម៉ប់ សារិន បានមានប្រសាសន៍ថា សមាជិកក្រុមប្រឹក្សាដែលចុះទៅមូលដ្ឋានខណ្ឌ សង្កាត់ត្រូវសហការជាមួយ អាជ្ញាធរពាក់ពន្ធ័ឲ្យបានល្អនិងត្រូវចេះសួរនាំ និងស្វែងយល់ពីបញ្ហាណាមួយដែលយើងត្រូវកំណត់ថាបងប្អូនប្រជាពលរដ្ឋយើងត្រូវតែបានទទួលការចាក់វ៉ាក់សាំងការពារជំងឺកូវីដ-១៩ ឬអ្នកខ្លះចាក់មិនបានគ្រប់ដូស តើមកពីមូលហេតុអ្វី ហើយ
តើហេតុអ្វីបានជាមានបងប្អូនខ្លះគាត់មិនព្រមមកទទួលការចាក់វ៉ាក់សាំង តើសេវាបំរើនោះយ៉ាងម៉េចដែរដើម្បីយើងទទួលបានពត៏មានជាក់ស្តែងសំរាប់ធ្វើ ការឆ្លើយតបនិងដោះស្រាយអោយទាន់ពេលវេលា។

លោកបន្តទៀតថា ដើម្បីឱ្យទទួលបានព័ត៌មានពិតជាក់ស្តែង យើងត្រូវចុះទៅឱ្យដល់ផ្ទះប្រជាពលរដ្ឋតែម្តង។
ក្នុងកិច្ចប្រជុំនោះ គណៈអភិបាលរាជធានីភ្នំពេញ បានទទួលយករាល់សំណើ និងសំណូមពររបស់សមាជិកក្រុមប្រឹក្សារាជធានីភ្នំពេញទៅធ្វើការដោះស្រាយ និងកែលំអរក្នុងការអនុវត្តការងាររបស់រដ្ឋបាលរាជធានីភ្នំពេញ។

លោក កើត ឆែ អភិបាលរងរាជធានីភ្នំពេញ បានលើកឡើងថា៖ បញ្ហាវ៉ាក់សាំងចាក់ជូនប្រជាពលរដ្ឋក្នុងរាជធានីភ្នំពេញរបស់ យើងគឺយើងមានវ៉ាក់សាំងគ្រប់គ្រាន់សំរាប់ចាក់ជូនបងប្អូន សូមបងប្អូនទៅទទួលការចាក់វ៉ាក់សាំងការពារជំងឺកូវីដ-១៩ពិសេសប្រភេទបំប្លែងថ្មីអូមីក្រុង។

លោកបន្តថា៖ មកដល់ពេលនេះ មិនទាន់មានពត៏មានជាក់លាក់ណាមួយដែលថា អ្នកឆ្លងកូវីដ-១៩ប្រភេទDeltaរួចហើយ មិនអាចឆ្លងប្រភេទអូមីក្រុង ហើយក៏មិនមាន ពត៏មានណាបញ្ជាក់ថា អ្នកបានឆ្លងអូមីក្រុងហើយមិនឆ្លង Deltaទៀតនោះដែរ  សំខាន់គឺយើងត្រូវការពារខ្លួនតាមវិធានការ៣កុំ ៣ការពារឱ្យបានម៉ត់ចត់។

ពាក់ពន្ធ័នឹងបញ្ហាសំរាមក្នុងរាជធានីភ្នំពេញ លោក កើត ឆែ គូសបញ្ជាក់ថា៖ បញ្ហាសំរាមជាបញ្ហាប្រឈមមួយ តែពេលនេះ យើងបានដោះស្រាយ បានល្អប្រសើរច្រើន ដោយយើងមានក្រុមហ៊ុនប្រមូលសំរាមដល់ទៅ៣ក្រុមហ៊ុន គឺអ្វីៗយើងបាន ធ្វើទៅតាមផែនការដោយសន្សឹមៗទាំងការរៀបចំទីតាំងចាក់សំរាម ការអប់រំណែ នាំពីការញែកសំរាមរវាងសំរាមសើម និងសំរាមស្ងួត និងវិធានការផាកពិន័យចំពោះអ្នកដែលមិនអនុវត្តតាមការណែនាំផងដែរ៕

អត្ថបទ៖ ស្រីរ័ត្ន