ក្រោយធ្វើទស្សនកិច្ចចិន​, រដ្ឋមន្ត្រីការបរទេសរុស្ស៊ី ទៅ ឥណ្ឌា បន្តទៀត

រដ្ឋមន្ត្រីការបរទេសរុស្ស៊ី លោក Sergey Lavrov បានទៅដល់ទីក្រុង ញូវដែលី ហើយកាលពីថ្ងៃព្រហស្បតិ៍ទី៣១ខែមីនា ហើយគ្រោងនឹងជួបជាមួយនាយករដ្ឋមន្ត្រីឥណ្ឌាលោក Narendra Modi នៅថ្ងៃសុក្រទី០១ខែមេសានេះ។ នេះបើយោងតាមរដ្ឋមន្ត្រីក្រសួងការបរទេសរុស្ស៊ី។

មន្ត្រីជាន់ខ្ពស់រដ្ឋាភិបាលឥណ្ឌា ដែលដឹងពីការត្រៀមរៀបចំសម្រាប់កិច្ចពិភាក្សាបាននិយាយថា លោក Modi នឹងបញ្ជាក់ជាថ្មី និងសង្កត់ធ្ងន់លើតម្រូវការសម្រាប់ការបញ្ឈប់អរិភាព និងអធិបតេយ្យភាពដែលមិនអាចរំលោភបំពានបាន។

លោក Lavrov ក៏នឹងជួបជាមួយរដ្ឋមន្ត្រីការបរទេសឥណ្ឌាលោក S. Jaishankar ផងដែរ។

មុនដំណើរទស្សនកិច្ចរបស់លោក Lavrov ទៅកាន់ប្រទេសឥណ្ឌា អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានប្រាប់អ្នកសារព័ត៌មានថា ប្រទេសនីមួយៗ មានទំនាក់ទំនងផ្ទាល់ខ្លួនជាមួយរុស្ស៊ី។

សហរដ្ឋអាមេរិកមិនបានស្វែងរកការផ្លាស់ប្តូរនោះទេ ប៉ុន្តែកំពុងស្វែងរកប្រទេសដែលហ៊ាននិយាយខ្លាំងៗប្រឆាំងការលុកលុយ ដោយមិនសមហេតុផលរបស់រុស្ស៊ី, អំពាវនាវឲ្យបញ្ចប់អំពើហិង្សា និងប្រើឥទ្ធិពលដែលខ្លួនមានដើម្បីបញ្ចប់រឿងទាំងនោះ។

ចំណែករដ្ឋមន្ត្រីការបរទេសអង់គ្លេសលោកស្រី Elizabeth Truss ក៏បានជួបជាមួយលោក Jaishankar ផងដែរកាលពីថ្ងៃព្រហស្បតិ៍ទី៣១ខែមីនា ដោយបានចង្អុលបង្ហាញម្តងហើយម្តងទៀត​ អំពីរបៀបដែលប្រទេសនានាជុំវិញពិភពលោក បង្កើនការថ្កោលទោសលើការវាយប្រហាររបស់រុស្ស៊ីនៅអ៊ុយក្រែន។

គួរបញ្ជាក់ជាថ្មីថា ឥណ្ឌាបានបដិសេធប្រកាន់ជំហរលើជម្លោះនៅអ៊ុយក្រែន និងបានអនុបវាទលើការបោះឆ្នោតជាបន្តបន្ទាប់របស់អង្គការសហប្រជាជាតិ។ ឥណ្ឌាបានស្វាគមន៍មេដឹកនាំបរទេសជាច្រើនមកកាន់ប្រទេសក្នុងសប្តាហ៍នេះ ជាមួយនឹងកិច្ចពិភាក្សាផ្សេងៗអំពីបញ្ហាអ៊ុយក្រែន៕

ប្រែសម្រួល៖ Vann Vann

ប្រភព៖ CNN

ចុចអាន៖ អ៊ុយក្រែន​ ជិត​ទទួលបាន ​ឧបករណ៍​យោធា​ទំនើបផុតលេខ​ពី ​ចក្រភព​អង់គ្លេស និង​អាមេរិក