អ៊ុយក្រែន​ ជិត​ទទួលបាន ​ឧបករណ៍​យោធា​ទំនើបផុតលេខ​ពី ​ចក្រភព​អង់គ្លេស និង​អាមេរិក (មានវីដេអូ)

ឯកអគ្គរដ្ឋទូតអ៊ុយក្រែនប្រចាំប្រទេសជប៉ុន លោក Sergiy Korsunsky បាននិយាយនៅថ្ងៃសុក្រទី០១ខែមេសានេះថា អ៊ុយក្រែននឹងអាចការពារផ្ទៃមេឃរបស់ខ្លួនពីកងកម្លាំងសត្រូវបានកាន់តែល្អប្រសើរ ព្រោះខ្លួននឹងទទួលបានឧបករណ៍យោធាទំនើបបំផុត ពីសហរដ្ឋអាមេរិក និងចក្រភពអង់គ្លេស។

ថ្លែងទៅកាន់សន្និសីទសារព័ត៌មានមួយ លោក Korsunsky បាននិយាយថា “ពួកគេនៅតែមានឧត្តមភាពលើកម្លាំងទ័ពអាកាស យន្តហោះ និងមីស៊ីល ហើយយើងរំពឹងថា នឹងចាប់ផ្តើមទទួលបានឧបករណ៍ទំនើបៗបំផុតពីសហរដ្ឋអាមេរិក និងអង់គ្លេស ដើម្បីការពារផ្ទៃមេឃ និងទីក្រុងរបស់យើង។ នៅពេលដែលពួកគេបាញ់មីស៊ីលផ្លោងពីរយៈចម្ងាយឆ្ងាយ យើងមិនអាចទៅដល់កន្លែងបាញ់បង្ហោះបានទេ។ យើងត្រូវស្ទាក់ចាប់មីស៊ីលទាំងនោះ។ នោះហើយជាមូលហេតុដែលយើងត្រូវការឧបករណ៍ទំនើបៗ”។

យ៉ាងណាក្តី លោក Korsunsky មិនបានផ្តល់ព័ត៌មានលម្អិតបន្ថែម អំពីថាតើឧបករណ៍យោធាប្រភេទណាខ្លះដែលអ៊ុយក្រែន នឹងទទួលបាននោះទេ។

រឿងនេះកើតឡើងចំពេលនាយករដ្ឋមន្រ្តីអូស្ត្រាលីលោក Scott Morrison បាននិយាយនៅថ្ងៃនេះដែរថា ប្រទេសរបស់លោក នឹងបញ្ជូនរថពាសដែក Bushmaster ទៅកាន់ប្រទេស អ៊ុយក្រែន។

លោក Morrison និយាយថា រថពាសដែកកង់បួន នឹងត្រូវដឹកជញ្ជូនតាមយន្តហោះ Boeing C-17 Globemaster ប៉ុន្តែលោកមិនបានបញ្ជាក់ថា តើរថពាសដែកប៉ុន្មានគ្រឿង នឹងត្រូវបញ្ជូនទៅនោះទេ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sky

ចុចអាន៖ ឧទ្ធម្ភាគចក្រអ៊ុយក្រែន បើកការវាយប្រហារក្នុងប្រទេស រុស្ស៊ី កម្ទេចរោងចក្រប្រេង ឆេះសន្ធោសន្ធៅ