ទុរេន ថៃ នាំចេញទៅ ចិន រកឃើញមានផ្ទុកមេរោគ កូវីដ១៩

ក្រោយ​ពី​មេរោគកូវីដ១៩ ​ត្រូវ​បាន​​រក​ឃើញ​នៅ​លើ​​ប្រអប់​ទុរេន​ថៃ, ការនាំចេញផ្លែឈើនេះ​ទៅកាន់​ប្រទេស​ចិន ​ត្រូវ​បាន​រារាំង​មិន​ឲ្យ​ចូល​​រយៈពេល៣ថ្ងៃខណៈក្រុមហ៊ុននៅក្នុងឧស្សាហកម្មនាំចេញផ្លែឈើរបស់ប្រទេសថៃ ត្រូវបានណែនាំឲ្យគោរពវិធានការបង្ការកូវីដដ៏តឹងរ៉ឹង។

ផ្លែទុរេន ពីប្រទេសថៃ ត្រូវបានគេរកឃើញមានផ្ទុកមេរោគកូវីដ១៩ នៅព្រំដែន Mohan ប្រទេសចិន ដោយបង្ខំឲ្យមានការរឹតបន្តឹងការដឹកជញ្ជូនកាលពីថ្ងៃអង្គារដល់ថ្ងៃព្រហស្បតិ៍។ មេរោគកូវីដ ត្រូវបានរកឃើញនៅលើឡានដឹកទំនិញ និងប្រអប់ផ្លែឈើ។

លោក Suthee Thongyaem អភិបាលខេត្ត Chanthaburi ភាគខាងកើតប្រទេសថៃ បានបញ្ជាឲ្យឈ្មួញលក់ផ្លែឈើ សហការគ្នា គោរពវិធានការគ្រប់គ្រងជំងឺ ហើយបុគ្គលិកត្រូវតែបន្តធ្វើតេស្តរកកូវីដ។

លោកនិយាយថា “ការត្រួតពិនិត្យកូវីដជាប្រចាំរបស់និយោជិត ត្រូវតែធ្វើឡើងដោយអាជ្ញាធរ មុនពេលការដឹកជញ្ជូនណាមួយត្រូវបានសម្រេច។ ប្រសិនបើមានការឆ្លង ការផ្អាករយៈពេលបីថ្ងៃត្រូវបានណែនាំ។ គណៈកម្មាធិការគ្រប់គ្រងជំងឺខេត្ត ត្រូវធ្វើអន្តរាគមន៍ ហើយនឹងអនុញ្ញាតឲ្យបិទកន្លែងវេចខ្ចប់មួយចំនួន និងចាត់វិធានការប្រុងប្រយ័ត្ន ដើម្បីទប់ស្កាត់ការឆ្លងមេរោគ”។

លោក Chonlatee Numnoo ប្រធានការិយាល័យស្រាវជ្រាវ និងអភិវឌ្ឍន៍កសិកម្មប្រចាំតំបន់ទី៦ បាននិយាយថា ផ្លែទុរេនប្រហែល ២៥០០០ តោន ឬ ៤% នៃផលិតផលសរុប ដែលកំពុងត្រូវបានបញ្ជូនទៅកាន់ប្រទេសចិន គឺទាមទារឲ្យមានច្បាប់ និងបទប្បញ្ញត្តិតឹងរ៉ឹង៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ចិន រកឃើញមេរោគកូវីដ-១៩ លើកញ្ចប់ផ្លែធុរេន នាំចូលពី ថៃ