សម្ដេចតេជោ ហ៊ុន សែន ៖ ពលរដ្ឋប្រមាណ ៦០​ភាគរយ ដែលធ្វើដំណើរតាមផ្លូវសាធារណៈនៅតែបន្តពាក់ម៉ាស់

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានកត់សម្គាល់ឃើញថា ប្រជាពលរដ្ឋប្រមាណ ៦០​ភាគរយ ដែលធ្វើដំណើរតាមផ្លូវសាធារណៈ នៅរាជធានីភ្នំពេញ នៅតែបន្តពាក់ម៉ាស់ការពារជំងឺកូវីដ-១៩ដដែល​ បើទោះបីជារាជរដ្ឋាភិបាល បានលើកលែងកាតព្វកិច្ចពាក់ម៉ាស់រួចទៅហើយក្ដី។

សម្ដេចតេជោនាយករដ្ឋមន្ត្រី បានថ្លែងក្នុងពិធីបិទសន្និបាតបូកសរុបការងារឆ្នាំសិក្សា ២០២០-២០២១ និងលើកទិសដៅការងារឆ្នាំសិក្សា ២០២១-២០២២ នៅរសៀលថ្ងៃទី ២៧ ខែមេសានេះថា ទោះបីជារាជរដ្ឋាភិបាល បានលើកលែងកាតព្វកិច្ចពាក់ម៉ាស់ក៏ដោយ ក៏សម្ដេចសង្កេតឃើញថា ប្រជាពលរដ្ឋនៅរាជធានីភ្នំពេញ ដែលធ្វើដំណើរនៅតាមផ្លូវសាធារណៈប្រមាណជា ៦០ភាគរយ នៅតែបន្តពាក់ម៉ាស់ដដែល។ ដូច្នេះសម្ដេចតេជោ យល់ឃើញថា ប្រជាពលរដ្ឋបានយល់ដឹងច្រើន ពីការទប់ស្កាត់ការឆ្លងជំងឺកូវីដ-១៩។

សម្ដេចតេជោ ហ៊ុន សែន បានលើកឡើងថា​ វិធានការ ៣ការពារ ៣កុំ នៅតែមានសារៈសំខាន់ នៅក្នុងការបង្ការ និងទប់ស្កាត់ការរាតត្បាតជំងឺកូវីដ-១៩។ សម្ដេចតេជោនាយករដ្ឋមន្ត្រី បានលើកឡើងទៀតថា កម្ពុជាមិនទាន់ឈ្នះសង្គ្រាមកូវីដនៅឡើយទេ គ្រាន់តែឈ្នះសមរភូមិតូចៗតែប៉ុណ្ណោះ៕

អត្ថបទ៖ ឃួន សុភ័ក្រ