កីឡា

អ្នកចាត់ការភ្នំពេញហ្គាឡាក់ស៊ី និងគ្រូឧត្តរមានជ័យបង្ហាញចំណុចខ្លាំងមុនប៉ះគ្នាស្អែកវគ្គផ្តាច់ព្រ័ត្រ Hun Sen Cup ថ្នាក់ខេត្ត

បានផុស

៤ years មុន

នៅ

ថ្ងៃសុក្រ ១០ មិថុនា ២០២២

ដោយ

ក្រុមបាល់ទាត់ភ្នំពេញហ្គាឡាក់ស៊ី នឹងប្រកួតជាមួយក្រុមខេត្តឧត្តរមានជ័យ ក្នុងវគ្គផ្តាច់ព្រ័ត្រពានរង្វាន់សម្តេចតេជោ ហ៊ុន សែន (Hun Sen Cup) លើកទី១៦ ឆ្នាំ២០២២ ស្អែកនេះ វេលាម៉ោង៣:៣០នាទីរសៀលនៅនៅកីឡដ្ឋានខេមបូឌា អ៊ែរវ៉េ ដែលផ្សាយផ្ទាល់ដោយស្ថានីយទូរទស្សន៍ BTV។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រូបង្វឹកក្រុមបាល់ទាត់ខេត្តឧត្តរមានជ័យ លោក លី ដារ៉ា ៖«យើងមិនដែលបានជួបភ្នំពេញហ្គាឡាក់ស៊ីទេពីមុន។ នេះជាលើកទី១ដែលយើងជួបគ្នា តែយើងបានតាមដានយូរដែរហើយ។ ក្រុមនេះល្អទាំងល្បឿន និងបច្ចេកទេស តែយើងមានវិធីសាស្ត្រទប់ទល់នឹងចំណុចខ្លាំងទាំងនោះហើយ»។

កីឡាករ ជោ ស្ថាបនា ប្រធានក្រុមឧត្តរមានជ័យបានឲ្យដឹងថា សម្រាប់ការប្រមូលផ្តុំកីឡាករក្នុងការហ្វឹកហាត់ជួបបញ្ហាច្រើនដោយសារកីឡាករមួយចំនួនជាប់ធ្វើការ ឬការសិក្សាហើយអ្នកខ្លះនៅខេត្តផ្សេង ក៏ដូចជាទីក្រុងភ្នំពេញ។ កីឡាកររូបនេះក៏បានបញ្ជាក់ថា សមាជិកក្រុមរបស់ខ្លួនបានដឹងពីចំណុចខ្លាំងរបស់ក្រុមភ្នំពេញហ្គាឡាក់ស៊ី ប៉ុន្តែក៏បានត្រៀមយុទ្ធសាស្ត្រសម្រាប់ការជួបគ្នាហើយ។

ជាមួយគ្នានេះ អ្នកចាត់ការទូទៅរបស់ក្រុមភ្នំពេញហ្គាឡាក់ស៊ី លោក ប៉ូ គីនណាក់ បានលើកឡើងថា គ្រប់ការប្រកួតទាំងអស់រហូតដល់វគ្គផ្តាច់ព្រ័ត្រនេះ ក្រុមរបស់លោកបានឆ្លងកាត់ការលំបាកទាំងអស់។ អ្វីដែលសំខាន់ ក្រុមរបស់លោកឲ្យតម្លៃដៃគូ និងឆ្លើយតបនឹងការឲ្យតម្លៃជាមួយនឹងការខិតខំប្រឹងប្រែងហ្វឹកហាត់ និងយកចិត្តទុកដាក់ក្នុងការប្រកួត។

«ខ្ញុំកត់កត់សំគាល់ឃើញថា ប្រព័ន្ធការពាររបស់ក្រុមឧត្តរមានជ័យរឹងមាំល្អ ហើយតំបន់បម្រើរបស់ពួកគេក៏ឃើញថា មានបច្ចេកទេសល្អ និងលឿនដែរ»។ លោកបានលើកឡើងពីចំណុចខ្លាំងរបស់ដៃគូ និងបញ្ជាក់ថា ការប្រកួតនីមួយៗបត់បែនទៅតាមភាពខ្លាំងរបស់ក្រុមជាដៃគូ ដូច្នេះមិនអាចប្រើទម្រង់ ឬរបៀបលេងដដែលៗទេ។

ជាមួយគ្នានេះ ក៏មានការប្រកួតដណ្តើមចំណាត់ថ្នាក់លេខ៣ រវាង ក្រុមបាល់ទាត់ខេត្តកំពត ប្រកួតជាមួយ ក្រុមបាល់ទាត់ ឬទ្ធីសែន នៅវេលាម៉ោង៨ព្រឹកនៅកីឡដ្ឋានអគ្គិសនីកម្ពុជា៕