អាមេរិក កំពុងភ័យអស់ប្រព័ន្ធអាវុធ HIMARS ឲ្យ អ៊ុយក្រែន (មានវីដេអូ)

លោក Mark Hertling អតីតឧត្តមសេនីយឯកនៃកងទ័ពអាមេរិកប្រចាំអឺរ៉ុបបានបង្ហោះនៅក្នុងបណ្តាញ Twitter នាពេលថ្មីៗនេះថា សហរដ្ឋអាមេរិកអាចអស់ប្រព័ន្ធរ៉ុកកែតកាំភ្លើងចល័តខ្ពស់ HIMARS បញ្ជូនទៅកាន់អ៊ុយក្រែនក្នុងរយៈពេលពី ៣ ទៅ ៤ ខែទៀត ប្រសិនបើផ្ដល់ប្រព័ន្ធអាវុធនេះច្រើនជាង ១២ ទៅ ២០ ដើមដល់ទីក្រុងកៀវ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Hertling បានពន្យល់ទៀតថា ចំណែកការផ្គត់ផ្គង់គ្រាប់រំសេវសម្រាប់ប្រព័ន្ធនេះក៏មានកម្រិតផងដែរ ដោយមានប្រហែល ៩,០០០ គ្រាប់ប៉ុណ្ណោះសម្រាប់ការផលិតក្នុងមួយឆ្នាំ ។

ទន្ទឹមនោះលោក Hertling បានចោទជាសំនួរថា តើយើងនឹងមានហានិភ័យអ្វីកើតឡើង នៅពេលដែលយើងបន្តផ្ដល់អាវុធឲ្យអ៊ុយក្រែននូវចំនួនដ៏ច្រើនលើសលប់? ហើយចុះបើយើងប្រឈមមុខនឹងសត្រូវផ្សេងទៀតនៅក្នុងជម្លោះ តើយើងនឹងមានអ្វីទប់ទល់? ។

កាលពីសប្តាហ៍មុន ប្រភពសន្តិសុខរុស្ស៊ីបានប្រាប់ Sputnik ថា អាវុធ HIMARS ដែលកំពុងប្រតិបត្តិការនៅក្នុងប្រទេសអ៊ុយក្រែនត្រូវបានគ្រប់គ្រងដោយបុគ្គលិកណាតូដែលមានការងារក្រៅម៉ោង និងត្រូវបានការពារដោយអ្នកម៉ៅការយោធាឯកជន មុនពេលអនុញ្ញាតឲ្យអ៊ុយក្រែនប្រើប្រាស់ ដោយសារតែខ្វះការជឿទុកចិត្តលើរដ្ឋាភិបាលទីក្រុងកៀវ ។

គួរបញ្ជាក់ថា អាវុធ HIMARS ប្រហែល ៥៤០ ដើមត្រូវបានផលិតឡើងនៅមុនពេលប្រើប្រាស់ក្នុងប្រទេសអ៊ុយក្រែន ហើយអាវុធទាំងនោះត្រូវបានប្រើប្រាស់ក្នុងសង្គ្រាមដែលដឹកនាំដោយសហរដ្ឋអាមេរិកនៅអ៊ីរ៉ាក់ អាហ្វហ្គានីស្ថាន និងស៊ីរី ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អាមេរិក កំពុងទិញប្រព័ន្ធការពារមីស៊ីលមួយប្រភេទទៀតឲ្យ អ៊ុយក្រែន