កាណាដា ឲ្យ អ៊ុយក្រែន ខ្ចីលុយទិញឥន្ធនៈទុកកម្ដៅនៅរដូវរងា

ក្រសួងហិរញ្ញវត្ថុរបស់ប្រទេសកាណាដាបាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា រដ្ឋាភិបាលកាណាដាបានផ្តល់ប្រាក់កម្ចីចំនួន ៤៥០ លានដុល្លារកាណាដា (៣៤៨ លានដុល្លារអាមេរិក) ដល់ប្រទេសអ៊ុយក្រែនដើម្បីទិញប្រេងឥន្ធនៈទុកកម្ដៅ មុនរដូវរងា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍បាននិយាយថា “លោក Chrystia Freeland ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុបានប្រកាសផ្តល់ប្រាក់កម្ចីចំនួន ៣៤៨ លានដុល្លារដល់អ៊ុយក្រែនដើម្បីគាំទ្រការទិញឥន្ធនៈកម្ដៅចាំបាច់ មុនរដូវរងា ហើយប្រាក់កម្ចីនេះបំពេញនូវទឹកប្រាក់ចំនួន ១.៥១ ពាន់លានដុល្លារដែលកាណាដាបានគ្រោងទុកសម្រាប់អ៊ុយក្រែននៅក្នុងថវិកាជាតិឆ្នាំ ២០២២ នេះ” ។

សេចក្តីថ្លែងការណ៍បាននិយាយទៀតថា រដ្ឋាភិបាលទីក្រុងកៀវនឹងទទួលបានប្រាក់កម្ចីនេះតាមរយៈគណនីគ្រប់គ្រងរបស់ម្ចាស់ជំនួយនៃមូលនិធិរូបិយវត្ថុអន្តរជាតិ (IMF) សម្រាប់អ៊ុយក្រែន ហើយឥឡូវនេះរដ្ឋាភិបាលទីក្រុង Ottawa ក៏បានបំពេញតាមការប្តេជ្ញាចិត្តរបស់ខ្លួនរួចហើយផងដែរ បន្ទាប់ពីបានសន្យាក្នុងអំឡុងពេលកិច្ចប្រជុំជាមួយនាយករដ្ឋមន្ត្រី និងរដ្ឋមន្ត្រីហិរញ្ញវត្ថុនៃក្រុមប្រទេស G7 នៅក្នុងខែឧសភា និងមិថុនា កន្លងទៅ ។

ក្នុងអំឡុងពេលកិច្ចប្រជុំរដ្ឋមន្ត្រីហិរញ្ញវត្ថុ G7 កាលពីថ្ងៃទី ១៨ ដល់ថ្ងៃទី ២០ ខែឧសភា រដ្ឋមន្ត្រីក្រសួងហិរញ្ញវត្ថុកាណាដាលោកស្រី Chrystia Freeland បានសន្យាផ្តល់ប្រាក់កម្ចីចំនួន ១៩៣ លានដុល្លារដល់អ៊ុយក្រែនតាមរយៈ IMF ដើម្បីចាយវាយតាមតម្រូវការរបស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មេ UN ប្រាប់គោលបំណងទៅ អ៊ុយក្រែន លើកនេះ