ក្រុមប្រឹក្សា​រាជធានី​ស្នើឱ្យអាជ្ញាធរ​សមត្ថកិច្ច​យកចិត្តទុកដាក់​បង្ក្រាបក្មេងទំនើង​ក្នុងឱកាស​បុណ្យកាន់បិណ្ឌ

ក្រុមប្រឹក្សារាជធានីភ្នំពេញ​បានស្នើឱ្យអាជ្ញាធរ​មានសមត្ថកិច្ចគ្រប់ថ្នាក់​យកចិត្តទុកដាក់សហការបង្ក្រាប​ក្រុមក្មេងទំនើង​ ដើម្បីរក្សាសន្តិសុខ​ សណ្តាប់ធ្នាប់​ និងសុវត្ថិភាពជូនប្រជាពលរដ្ឋ​ក្នុងឱកាស​បុណ្យកាន់បិណ្ឌ និងភ្ជុំបិណ្ឌនៅតាមវត្តអារ៉ាមនានាក្នុងរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះបានធ្វើឡើងនាព្រឹកថ្ងៃទី ០៨ ខែ កញ្ញា ឆ្នាំ២០២នេះ ក្នុងកិច្ចប្រជុំសាមញ្ញលើកទី ៤០ ​របស់ក្រុមប្រឹក្សា​រាជធានីភ្នំពេញ អាណត្តិទី៣ ក្រោមអធិបតិភាពលោកម៉ប់ សារិន ប្រធានក្រុម​ប្រឹក្សា​រាជធានីភ្នំពេញ និងលោក មាន ចាន់យ៉ាដា អភិបាលរងរាជធានីភ្នំពេញ។

លោក ម៉ប់ សារិន មានប្រសាសន៍កោតសរសើរ ចំពោះសមត្ថកិច្ចដែលបានខិតខំបង្ការ ទប់ស្កាត់ បទល្មើសព្រហ្មទណ្ឌ ពិសេសបទល្មើស ឧក្រិដ្ឋឱ្យមានការថយចុះ។ ទន្ទឹមនឹងនេះការបង្ក្រាបបទល្មើសគ្រឿងញៀនបានចំនួន៨០ករណី ក្នុងនោះការជួញដូរ គ្រឿងញៀនបាន៥៣ករណី។

អាជ្ញាធរមានសមត្ថកិច្ចបានយកចិត្តទុកដាក់រៀបចំសណ្តាប់ធ្នាប់អ្នកលក់ដូរចល័តតាមដងផ្លូវសាធារណៈ និងអ្នកលក់ដូរនៅនឹងកន្លែង ដោយបានធ្វើការអប់រំណែនាំឱ្យមានសណ្ដាប់ធ្នាប់ល្អថែមទៀតផងដែរ។

នៅថ្ងៃទី ១៥ ខែកញ្ញានេះ អភិបាល​រាជធានីភ្នំពេញ​នឹងបើកកិច្ច​ប្រជុំគណៈបញ្ជាការឯកភាពរាជធានីភ្នំពេញមួយដើម្បីដាក់ចេញជាវិធានការម៉ឹងម៉ាត់មួយចំនួនក្នុងពិធីបុណ្យកាន់បិណ្ឌ និងបុណ្យភ្ជុំបិណ្ឌនេះ ដោយដាក់ចេញជា​វិធានការធ្វើឱ្យភូមិ សង្កាត់មានសុវត្ថិភាព ការរៀបចំសណ្តាប់ធ្នាប់សាធារណៈ និងការសម្រួលចរាចរណ៍ជូនប្រជាពលរដ្ឋ៕

អត្ថបទ៖ ស្រីរ័ត្ន