គណៈកម្មាធិកាសិទ្ធិមនុស្សកម្ពុជា ដាក់ប្រអប់បណ្តឹងនៅមណ្ឌលអប់រំកែប្រែ ២​កន្លែង និងពន្ធនាគារ ១កន្លែង

គណៈកម្មាធិការសិទ្ធិមនុស្សកម្ពុជា បានដាក់ប្រអប់បណ្តឹងនៅមណ្ឌលអប់រំកែប្រែចំនួន ២កន្លែង និងពន្ធនាគារ ១កន្លែង ដែលជាគម្រោងសាកល្បង សម្រាប់ឲ្យជនជាប់ឃុំអាចដាក់ពាក្យបណ្តឹងតវ៉ា ពាក់ព័ន្ធនឹងភាពមិនប្រក្រតីនានា។

លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងប្រធានគណៈកម្មាធិការសិទ្ធិមនុស្សកម្ពុជា កាលពីថ្ងៃទី​ ២៤ ខែវិច្ឆិកា ឆ្នាំ ២០២២ បានដឹកនាំសមាជិក-សមាជិកា និងក្រុមមេធាវីស្ម័គ្រចិត្តរបស់គណៈកម្មាធិកាសិទ្ធិមនុស្សកម្ពុជា ទៅដាក់ប្រអប់បណ្តឹងនៅមណ្ឌលអប់រំកែប្រែទី ១ (ម១) មណ្ឌលអប់រំកែប្រែទី ២ (ម២) និងពន្ធនាគាររាជធានីភ្នំពេញ (PJ)។

សេចក្ដីប្រកាសព័ត៌មានរបស់គណៈកម្មាធិការសិទ្ធិមនុស្សកម្ពុជា បានឲ្យដឹងថា លោក កែវ រ៉េមី មានគំនិតផ្ដួចផ្ដើមក្នុងការរៀបចំប្រអប់បណ្តឹង ដើម្បីដាក់តាមបណ្តាពន្ធនាគារ និងមណ្ឌលអប់រំកែប្រែ ក្នុងគោលបំណងបន្តពង្រឹងកិច្ចសហប្រតិបត្តិការ រវាងគណៈកម្មាធិការសិទ្ធិមនុស្សកម្ពុជា និងពន្ធនាគារ ក្នុងការលើកកម្ពស់ការគោរព និងការការពារសិទ្ធិ សេរីភាពរបស់ជនជាប់ឃុំ។

បើតាមគណៈកម្មាធិការសិទ្ធិមនុស្សកម្ពុជា តាមរយៈប្រអប់បណ្តឹងនេះ ជនជាប់ឃុំគ្រប់រូបអាចដាក់ពាក្យបណ្តឹងតវ៉ារបស់ខ្លួនដោយសម្ងាត់ ពាក់ព័ន្ធនឹងភាពមិនប្រក្រតីនានាក្នុងពន្ធនាគារ ក៏ដូចជាការអនុវត្តនូវសិទ្ធិសេរីភាពរបស់ខ្លួន ជូនគណៈ កម្មាធិការសិទ្ធិមនុស្សកម្ពុជាពិនិត្យ អង្កេត និងដោះស្រាយ។

ការដាក់ប្រអប់បណ្តឹងចំនួន ៣ទីតាំងខាងលើនេះ គឺជាចំណុចចាប់ផ្ដើម និងជាគម្រោងសាកល្បងមុនពេលឈានដល់ ការសម្រេចដាក់ប្រអប់បណ្តឹងរបស់គណៈកម្មាធិការសិទ្ធិមនុស្សកម្ពុជា នៅគ្រប់បណ្តាពន្ធនាគារទូទាំងរាជធានី-ខេត្ត។

ជាមួយគ្នានេះ គណៈកម្មាធិការសិទ្ធិមនុស្សកម្ពុជា បានថ្លែងអំណរគុណ និងកោតសរសើរចំពោះអគ្គនាយកដ្ឋានពន្ធនាគា ក៏ដូចជាពន្ធនាគារ និងមណ្ឌលអប់រំកែប្រែទូទាំងរាជធានី-ខេត្ត ដែលតែងតែសហការយ៉ាងជិតស្និទ្ធ ក្នុងការលើកកម្ពស់ការគោរព និងការការពារសិទ្ធិសេរីភាពរបស់ជនជាប់ឃុំ ក៏ដូចជាការពង្រឹងនូវប្រសិទ្ធភាព ក្នុងការគ្រប់គ្រងពន្ធនាគារ៕