មកដឹងចំនួនឧស្ម័នធម្មជាតិរាវ LNG ដែលអឺរ៉ុបទិញពី រុស្ស៊ី ក្នុងឆ្នាំ ២០២២

កាសែតហិរញ្ញវត្ថុរបស់អង់គ្លេសបានរាយការណ៍ថា សហភាពអឺរ៉ុប (EU) បានទិញឧស្ម័នធម្មជាតិរាវ (LNG) របស់រុស្ស៊ីចំនួន ៤២ ភាគរយ នៅចន្លោះខែមករា ដល់ខែតុលា ឆ្នាំ២០២២ នេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​នៅពេលនេះ ការនាំចូលឧស្ម័នរាវរបស់អឺរ៉ុបគឺមានចំនួន ១៧.៨ ពាន់លានម៉ែត្រគូប​ ដែលនៅក្នុងនោះ ​បែលហ្ស៊ិក បារាំង អេស្ប៉ាញ និងហូឡង់ ឈរនៅកំពូលតារាង ជាប្រទេសនាំចូលច្រើនជាងគេ ។

តាមរបាយការណ៍បន្តបង្ហាញថា ក្នុងរយៈពេល ១០ ខែដំបូងនៅឆ្នាំនេះ អឺរ៉ុបបានទិញឧស្ម័នរាវធម្មជាតិចំនួន ១១១ ពាន់លានម៉ែត្រគូបពីទីផ្សារពិភពលោក ដោយបង្កើនបរិមាណនាំចូល​ ៧០ ភាគរយ ខណៈដែលកាលពីឆ្នាំមុន EU បានទិញឧស្ម័នធម្មជាតិ និងឧស្ម័នធម្មជាតិរាវរបស់រុស្ស៊ីចំនួន ១៥៥ ពាន់លានម៉ែត្រគូប ។​

គួរឲ្យដឹងថា រុស្ស៊ីធ្លាប់ជាប្រទេសផ្គត់ផ្គង់ថាមពលធំជាងគេទី ២ របស់អឺរ៉ុប ប៉ុន្តែពេលនេះការផ្គត់ផ្គង់បានធ្លាក់ចុះ ១៦ ភាគរយ ក្នុងឆ្នាំ ២០២២ ដោយសារ​តែអឺរ៉ុបងាកទៅទិញឧស្ម័នធម្មជាតិរាវពីអាមេរិកវិញ ។

ស្របពេលជាមួយគ្នានេះ ប្រទេសលោកខាងលិច ជាពិសេស​គឺក្រុមប្រទេស​ G7 ក៏កំពុងតែព្យាយាមចរចាកំណត់តម្លៃលើការទិញប្រេងពីប្រទេសរុស្ស៊ីផងដែរ ខណៈរុស្ស៊ីក៏បានបញ្ជាក់វិញដែរថា នឹងមិនលក់ប្រេងឲ្យទៅប្រទេសណាដែលព្យាយាមកំណត់តម្លៃនោះឡើយ ៕

ប្រែសម្រួលដោយ ៖ ណាក់ ណាក់

ប្រភព ៖​ Sputnik

ចុចអាន ៖ អាមេរិក បន្ថយទណ្ឌកម្មប្រេងលើ វេណេស៊ុយអេឡា តែប្រាក់ចំណេញពីការ​លក់មិនអាចចែកគ្នាឡើយ