កីឡា

Messi ទើបតែសម្ដែងការសោកស្ដាយចំពោះភាពចម្រូងចម្រាសជាមួយហូឡង់ នៅ World Cup ថ្មីៗនេះ

បានផុស

៣ years មុន

នៅ

ថ្ងៃអង្គារ ៣១ មករា ២០២៣

ដោយ

កីឡាករ Lionel Messi ដែលជាម្ចាស់ជើងឯក World Cup បានសោកស្ដាយចំពោះការប៉ះទង្គិចរបស់ខ្លួនជាមួយគ្រូបង្វឹក និងកីឡាករហូឡង់ អំឡុងពេលការប្រកួតវគ្គ ១/៤ ផ្ដាច់ព្រ័ត្រ ក្នុងប្រទេសកាតា ដោយគេបាននិយាយនៅក្នុងបទសម្ភាសន៍មួយដែលបានចាក់ផ្សាយកាលពីថ្ងៃចន្ទ។

Messi បានផ្តល់បទសម្ភាសន៍ជាលើកដំបូងរបស់ខ្លួនចាប់តាំងពីការលើកពានកាលពីខែធ្នូ ទៅកាន់វិទ្យុ Urbana Play របស់ Buenos Aires។ ប្រធានក្រុមអាហ្សង់ទីន បាននិយាយអំពីការប៉ះទង្គិចគ្នាដ៏សាហាវជាមួយហូឡង់ ដែលក្រុមមកពីអាមេរិកខាងត្បូងមួយនេះបានយកឈ្នះក្នុងការស៊ុតបាល់ប៉េណាល់ទី។ កំណត់ត្រាមួយដែលមិនធ្លាប់មាន គឺមានកាតលឿង ចំនួន ១៧ ក្នុងនោះ Messi ក៏ទទួលបានកាតលឿងមួយផងដែរ សម្រាប់ការមិនពេញចិត្តរបស់គេលើការកាត់សេចក្ដី។

នៅពេលដែល Messi ស៊ុតបញ្ចូលទីក្នុងម៉ោងធម្មតា គេបានឈរនៅមុខគ្រូបង្វឹកសញ្ជាតិហូឡង់ Louis van Gaal ហើយយកដៃទាំងពីរដាក់ត្រចៀករបស់ខ្លួន។ បន្ទាប់ពីការប្រកួត គេបានបញ្ចេញកាយវិការទៅកាន់កៅអីបម្រុងរបស់ហូឡង់ និងបានប្រមាថដល់ខ្សែប្រយុទ្ធ Wout Weghorst ដែលបានស៊ុតបាល់បញ្ចូលទីចំនួន ២ គ្រាប់។

Messi បាននិយាយថា “ខ្ញុំមិនចូលចិត្តអ្វីដែលខ្ញុំបានធ្វើ ខ្ញុំមិនចូលចិត្តអ្វីដែលបានកើតឡើងនៅពេលក្រោយ។ “ទាំងនេះគឺជាពេលវេលា នៃភាពតានតឹងខ្លាំង។ វាលឿនណាស់ ហើយមនុស្សមានប្រតិកម្មតាមរបៀបដែលពួកគេប្រតិកម្ម។ គ្មានអ្វីត្រូវបានគ្រោងទុកនោះទេ វាទើបតែកើតឡើង»។

វគ្គ ១/៤ ផ្ដាច់ព្រ័ត្រនោះ ត្រូវបានហ៊ុមព័ទ្ធដោយភាពចម្រូងចម្រាស មុនការជួបគ្នា លោក Van Gaal បាននិយាយថា កីឡាកររបស់លោកបានត្រៀមខ្លួនបានល្អជាងគូប្រជែងរបស់ខ្លួនសម្រាប់ការស៊ុតបាល់ប៉េណាល់ទី។ លោកក៏បាននិយាយផងដែរថា “Messi មិនបានប៉ះបាល់ទេ” នៅក្នុងវគ្គពាក់កណ្ដាលផ្ដាច់ព្រ័ត្ររវាងក្រុមរបស់លោក នៅក្នុងការប្រកួតបាល់ទាត់ពិភពលោក កាលពីឆ្នាំ ២០១៤។ អាហ្សង់ទីន ក៏ឈ្នះក្នុងការស៊ុតបាល់ប៉េណាល់ទី៕

ប្រភព ៖ AP

អត្ថបទ ៖ មន្នីរ័ត្ន