តាមដាន! ទាំងនេះជារោគសញ្ញាជំងឺផ្តាសាយបក្សី H5N1

​​នាយកដ្ឋាន​ប្រយុទ្ធនិង​ជំងឺឆ្លង CDC របស់ប្រទេសកម្ពុជា បានចេញសេចក្តីប្រកាសកាលពីយប់ថ្ងៃពុធទី២២ខែកុម្ភៈថា កុមារីអាយុ១១ឆ្នាំម្នាក់នៅខេត្តព្រៃវែង បានបាត់បង់ជីវិត​ ដោយសារឆ្លង​ជំងឺ​ផ្ដាសាយបក្សី H5N1។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេរោគ H5N1 អាចបង្កឲ្យមានជំងឺគ្រុនផ្តាសាយធ្ងន់ធ្ងរ ជាមួយនឹងអត្រាមរណភាពខ្ពស់។

ទោះបីជាយ៉ាងណាក៏ដោយ បើយោងតាមមជ្ឈមណ្ឌលគ្រប់គ្រង និងការពារជំងឺ (CDC) របស់សហរដ្ឋអាមេរិក បានឲ្យដឹងថា ការឆ្លងក្នុងជំងឺនេះចំណោមមនុស្សគឺកម្រណាស់។

ការផ្ទុះឡើងដំបូងនៃជំងឺផ្តាសាយបក្សី H5N1 ចំពោះមនុស្សបានកើតឡើងក្នុងឆ្នាំ ១៩៩៧ នៅទីក្រុងហុងកុង។ ក្រោយមក អាជ្ញាធរបានរាយការណ៍ករណីឆ្លងមេរោគ H5N1 ក្នុងចំណោមមនុស្សជាង៧០០នាក់នៅទ្វីបអាហ្រ្វិក អាស៊ី និងអឺរ៉ុប។ ប្រទេសឥណ្ឌូណេស៊ី វៀតណាម និងអេហ្ស៊ីប មានករណីឆ្លងច្រើនជាងគេ។

ជំងឺផ្ដាសាយបក្សី H5N1 បានបង្កឲ្យមានរោគសញ្ញាដូចជា៖

• គ្រុនក្តៅលើស៣៨អង្សាសេ
• ក្អក
• ឈឺសាច់ដុំ
• សំឡេងស្អក
• ឈឺ​ក
• ពិបាកក្នុងខ្លួន
• អស់កម្លាំង
• ឈឺពោះ ជួនកាលមានរាក
• ចង្អោរ
• ក្អួត
• ឈឺពោះ
• ឈឺ​ទ្រូង
• ស្ថានភាពផ្លូវចិត្តផ្លាស់ប្តូរ
• ប្រកាច់

មនុស្សមួយចំនួនដែលមានជំងឺផ្តាសាយបក្សី H5N1 ក៏អាចវិវត្តទៅជាបញ្ហាផ្លូវដង្ហើមធ្ងន់ធ្ងរ រួមទាំងរលាកសួត និងថប់ដង្ហើមផងដែរ។

យោងតាមរបាយការណ៍របស់អង្គការសុខភាពពិភពលោក (WHO) ឆ្នាំ២០០៥ បានបង្ហាញថា អាការដកដង្ហើមខ្លី កើតឡើងប្រហែល ៥ថ្ងៃបន្ទាប់ពីរោគសញ្ញាដំបូងលេចឡើង។

ស្ថានភាពរបស់មនុស្សដែលកើតជំងឺផ្តាសាយបក្សី H5N1 អាចកាន់តែយ៉ាប់យ៉ឺនយ៉ាងឆាប់រហ័ស។ ពួកគេ​អាច​ជួប​ប្រទះ​នឹង​បញ្ហា​ផ្លូវ​ដង្ហើម និងខូច​សរីរាង្គ​ច្រើន ​ដែលអាចបណ្តាល​ឲ្យស្លាប់៕

ប្រែសម្រួល៖ Vann Vann

ប្រភព៖ CDC

ចុចអាន៖ កុមារី​ខ្មែរ​ស្លាប់​ដោយ​ឆ្លង​ជំងឺផ្តាសាយបក្សី​H5N1