៤ ឆ្នាំចុងក្រោយប្រទេស អឺរ៉ុប និងអាស៊ី បង្កើនការនាំចូលអាវុធយ៉ាងខ្លាំង

វិទ្យាស្ថានស្រាវជ្រាវសន្តិភាពអន្តរជាតិ Stockholm បានចេញផ្សាយរបាយការណ៍ស្រាវជ្រាវស្តីពីពាណិជ្ជកម្មអាវុធអន្តរជាតិបានឲ្យដឹងថា បណ្តាប្រទេសនៅអឺរ៉ុប និងអាស៊ីបូព៌ាបានបង្កើនការនាំចូលអាវុធរបស់ពួកគេយ៉ាងខ្លាំងនៅចន្លោះឆ្នាំ ២០១៨ និងឆ្នាំ ២០២២ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសជាសមាជិកអង្គការណាតូ បានបង្កើនការនាំចូលអាវុធចំនួន ៦៥ ភាគរយ ខណៈការនាំចូលពីប្រទេសនៅតំបន់អឺរ៉ុប​កើនឡើងសរុប ៤៧ ភាគរយ បើធៀបនឹងរយៈពេល ៥ ឆ្នាំមុន ។ តាមរយៈរបាយការណ៍នេះបានបញ្ជាក់ថា បន្ទាប់ពីសង្គ្រាមលុកលុយរបស់រុស្ស៊ីលើអ៊ុយក្រែន ប្រទេសជាច្រើននៅអឺរ៉ុបចង់នាំចូលអាវុធកាន់តែច្រើន និងលឿនជាងមុន ។

ចំពោះអ៊ុយក្រែន​ ដែលកំពុងតែប្រយុទ្ធជាមួយរុស្ស៊ី បានក្លាយជាប្រទេសនាំចូលអាវុធធំទី ៣ របស់ពិភពលោក ក្នុងអំឡុងឆ្នាំ ២០២២ ជាពិសេសគឺនាំចូលពីសហរដ្ឋអាមេរិក ដែលជាប្រទេសផ្គត់ផ្គង់អាវុធដ៏សំខាន់ជាងគេ ។

ដោយឡែក នៅឥណ្ឌូប៉ាស៊ីហ្វិកវិញ ការនាំចូលអាវុធរបស់ជប៉ុនបានកើនឡើង ១៧១ ភាគរយពីឆ្នាំ ២០១៣ ដល់ ២០១៧ បន្ទាប់មកគឺកូរ៉េខាងត្បូង បានកើនឡើងការនាំចូល ៦១ ភាគរយ ខណៈអូស្ត្រាលី កើនឡើង ២៣ ភាគរយ ។

ចំពោះមូលហេតុនៃតម្រូវការកើនឡើងការនាំចូលអាវុធនេះ ដោយសារតែការពារការគំរាមកំហែងពីសំណាក់ប្រទេសចិន និងកូរ៉េខាងជើង ជាពិសេសគឺអាវុធវាយប្រហាររយៈចម្ងាយឆ្ងាយ ៕

ប្រែសម្រួលដោយ ៖ នាង​ រតនៈ

ប្រភព ៖ NHK

ចុចអាន ៖ អ៊ុយក្រែន ជាប្រទេសនាំចូលអាវុធធំជាងគេលំដាប់ទីបីលើពិភពលោក