វិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) បានរាយការណ៍កាលពីថ្ងៃចន្ទទី១៣ខែមីនាថា ជំនួយផ្នែកយោធាដ៏ទូលំទូលាយរបស់សហរដ្ឋអាមេរិក និងសហភាពអឺរ៉ុបដល់ទីក្រុងកៀវ ចំពេលជម្លោះកំពុងបន្តជាមួយទីក្រុងមូស្គូ បានធ្វើឲ្យអ៊ុយក្រែន ក្លាយជាប្រទេសនាំចូលអាវុធធំជាងគេលំដាប់ទីបីក្នុងឆ្នាំ២០២២ បន្ទាប់ពីប្រទេសកាតា និងឥណ្ឌា។

ក្រុមអ្នកស្រាវជ្រាវរកឃើញថា អ៊ុយក្រែនក៏ជាប់ចំណាត់ថ្នាក់ជាប្រទេសនាំចូលអាវុធធំជាងគេលំដាប់ទី១៤នៅលើពិភពលោកផងដែរ សម្រាប់រយៈពេល៥ឆ្នាំចន្លោះឆ្នាំ២០១៨ដល់ឆ្នាំ២០២២ ដែលស្មើនឹង២% នៃការនាំចូលអាវុធទូទាំងពិភពលោក។

ថ្វីបើកម្រិតនៃការផ្ទេរសព្វាវុធជាសកលបានធ្លាក់ចុះ ៥.១% ក្នុងរយៈពេល៥ឆ្នាំចុងក្រោយនេះក៏ដោយ ប៉ុន្តែ SIPRI បានរាយការណ៍ថា ការនាំចូលអាវុធដោយរដ្ឋអ៊ឺរ៉ុប មានការកើនឡើងយ៉ាងខ្លាំងពោលគឺ ៤៧% ខណៈរដ្ឋអឺរ៉ុបជាសមាជិកអង្គការណាតូ បានបង្កើនការនាំចូលអាវុធរបស់ពួកគេ ៦៥% ចំពេលមានការគំរាមកំហែងពីប្រទេសរុស្ស៊ី។

លោក Pieter D. Wezeman អ្នកស្រាវជ្រាវជាន់ខ្ពស់របស់ SIPRI បានកត់សម្គាល់ថា “ទោះសហរដ្ឋអាមេរិក និងរដ្ឋណាតូផ្សេងទៀត បានបដិសេធសំណើរបស់ទីក្រុងកៀវ សម្រាប់យន្តហោះចម្បាំង និងមីស៊ីលរយៈចម្ងាយឆ្ងាយ ដោយសារតែការភ័យខ្លាចធ្វើឲ្យជម្លោះរុស្ស៊ី-អ៊ុយក្រែនកាន់តែរីកធំក៏ដោយ ប៉ុន្តែពួកគេបានផ្គត់ផ្គង់អាវុធបែបនេះដល់រដ្ឋផ្សេងទៀតដែលពាក់ព័ន្ធនឹងជម្លោះ ជាពិសេសនៅមជ្ឈិមបូព៌ា និងអាស៊ីខាងត្បូង”។

គួរបញ្ជាក់ថា រុស្ស៊ី និងអាមេរិកនៅតែជាប្រទេសនាំចេញអាវុធធំជាងគេលើពិភពលោក បើទោះបីជាភាគហ៊ុននៃការលក់អាវុធរបស់ទីក្រុងមូស្គូ ត្រូវបានគេរាយការណ៍ថា ធ្លាក់ចុះពី២២% មកនៅ ១៦% ក៏ដោយ។ ដោយឡែក ភាគហ៊ុនរបស់ទីក្រុងវ៉ាស៊ីនតោន បានកើនឡើងពី ៣៣% ដល់៤០%៕

ប្រែសម្រួល៖ Vann Vann

ប្រភព៖ RT

ចុចអាន៖ ប្រជាជនអ៊ុយក្រែន ត្រូវជាប់ពន្ធ រាប់លានដុល្លារដោយសារដំណើរទស្សនកិច្ចរបស់លោក Biden ថ្ងៃមុន