រកឃើញទឹកអប់អាយុកាល ២ ពាន់ឆ្នាំនៅ អេស្ប៉ាញ

ទឹកអប់មួយដបត្រូវអ្នកស្រាវជ្រាវជីកយកចេញពីផ្នូរស្ត្រីអភិជនម្នាក់នាសម័យរ៉ូម៉ាំង នៅទីក្រុង Seville ក្នុងស្ថានភាពមិនបាក់បែក ។

ផ្នូរដែលគេជីកគឺជាកម្មសិទ្ធិរបស់អភិជនមួយគ្រួសារ ចាប់តាំងពីការរកឃើញក្នុងឆ្នាំ ២០១៩ មក ផ្នូរនោះមិនដែរមានអ្នកប្លន់ឬជីកយកទ្រព្យសម្បត្តិសោះឡើយ ដូច្នេះកន្លែងបញ្ចុះសពរបស់ពួកគេពោរពេញដោយវត្ថុមានតម្លៃទាំងអស់មិនបាត់សូម្បីតែមួយ ។

ទឹកអប់ខាងលើជារបស់ស្ត្រីអភិជនម្នាក់ស្ថិតក្នុងវ័យ ៤០ ឆ្នាំ វាធ្វើពីថ្មក្វាតមានរូបឆ្លាក់ដោយដៃ ឆ្នុកបិទល្អឥតខ្ចោះធ្វើពីសារធាតុរ៉ែ dolomite និង bitumen tar ទើបអ្នកសិក្សាសន្និដ្ឋានថាជាទឹកអប់មានតម្លៃថ្លៃសម្រាប់អភិជន ។

ចំណែកក្លិនវិញត្រូវក្រុមអ្នកសិក្សាដឹកនាំដោយសាស្ត្រាចារ្យ José Rafael Ruiz Arrebola ធ្វើការពិសោធន៍ និងវិភាគយ៉ាងទូលំទូលាយដើម្បីដឹងពីវា ហើយរកឃើញថាធ្វើពីប្រេងបន្លែ ប្រេងអូលីវ និងក្លិន Patchouli ដែលជាប្រេងចម្រាញ់ចេញពី Pogostemon cablin រុក្ខជាតិដាំដុះដំបូងបំផុតនៅក្នុងប្រទេសឥណ្ឌា ។

មកទល់បច្ចុប្បន្ន ទឹកអប់ក្លិន Patchouli នៅតែពេញនិយមក្នុងចំណោមក្រុមមនុស្សអភិជនដដែល ៕

ប្រភព ៖ sputnik

ចុចអាន ៖ ទឹកអប់អាចជួយដល់សុខភាពផ្លូវចិត្តច្រើននឹកស្មានមិនដល់