កីឡា

គ្រូបង់ក្លាដែសថា អ្នកគាំទ្រកម្ពុជាគួរមានមោទនភាពចំពោះកីឡាកររបស់ខ្លួន

បានផុស

៣ years មុន

នៅ

ថ្ងៃសុក្រ ១៦ មិថុនា ២០២៣

ដោយ

គ្រូបង្វឹកក្រុមបាល់ទាត់ជម្រើសជាតិបង់ក្លាដែស លោក Javier Fernadez Cabrera យល់ឃើញពីការលេងរបស់ក្រុមបាល់ទាត់ជម្រើសជាតិកម្ពុជាគួរជាទីមោនភាពសម្រាប់អ្នកគាំទ្របាល់ទាត់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការយល់ឃើញរបស់លោក លោក Javier Fernadez Cabrera កើតមានឡើង បន្ទាប់ពីក្រុមបាល់ទាត់កម្ពុជាបានប្រកួតចាញ់ក្រុមរបស់លោកដោយលទ្ធផល ០-១ នៅយប់ថ្ងៃទី១៥ ខែមិថុនា ឆ្នាំ២០២៣ នៅពហុកីឡដ្ឋានជាតិអូឡាំពិក ប៉ុន្តែទម្រង់លេង និងការគ្រប់គ្រងបាល់ ម្ចាស់ផ្ទះកម្ពុជាធ្វើបានល្អជាង។

ក្នុងសន្និសីទសារព័ត៌មានក្រោយចប់ការប្រកួត លោក Javier Fernadez បាននិយាយថា លោកសប្បាយចិត្តនឹងលទ្ធផលដែលបានឈ្នះលើម្ចាស់ផ្ទះកម្ពុជា ប៉ុន្តែលោកមិនសូវរីករាយនឹងទម្រង់លេងរបស់កូនក្រុមលោកឡើយ។ ក្រុមរបស់លោកត្រូវការកែលំអក្នុងការគ្រប់គ្រងបាល់ របៀបនៃការវាយបក និងការការពារ។

លោកបាននិយាយថា ៖«យើងពិតជាមានការលំបាកខ្លាំងក្នុងការលេងជាមួយកម្ពុជាលើកនេះ។ ក្រុមម្ចាស់ផ្ទះកម្ពុជាប្រឹងរត់ ដាក់សម្ពាធ គាបសង្កត់ដែលធ្វើឲ្យយើងរងការលំបាកខ្លាំង។ ក្រុមរបស់ខ្ញុំត្រូវតែកែលំអរបៀបលេងវាយបក»។

«ខ្ញុំគិតច្បាស់ណាស់ថា ក្រុមកម្ពុជាកំពុងស្ថិតនៅលើផ្លូវការត្រូវសម្រាប់ការអភិវឌ្ឍ។ ជាការយល់ឃើញរបស់ខ្ញុំ អ្នកគាំទ្របាល់ទាត់កម្ពុជាគួរតែមានមោទនភាពចំពោះកីឡាកររបស់ខ្លួនដែលមានឆន្ទៈក្នុងការលេង ជាពិសេសសំបូរកីឡាករក្មេងៗដែលមានទេពកោសល្យ»។ លោកបានបញ្ជាក់។

គ្រាប់បាល់ជ័យជម្នះរបស់បង់ក្លាដែសរកបានដោយកីឡាករ Rahm Jony នៅនាទី២៤ ដែលជាឱកាសវាយបកតែម្យ៉ាងគត់ និងបានបំប៉ោងសំណាញ់ទីរបស់កម្ពុជាបានសម្រេច។ ក្នុងសន្និសីទសារព័ត៌មានកីឡាកររូបនេះបាននិយាយថា ៖«ខ្ញុំពិតជាសប្បាយរីករាយណាស់ដែលបានរកគ្រាប់បាល់ជ័យជម្នះ។ នេះជាគ្រាប់បាល់អន្តរជាតិដំបូងរបស់ខ្ញុំឲ្យជម្រើសជាតិ អីចឹងខ្ញុំពិតជាសប្បាយចិត្តមែនទែន»។