ជីវិតកម្សាន្ដ

តារា ៣ ដួង ចែករំលែកក្ដីស្រលាញ់ដល់សិស្សជាង ៣០០ នាក់ នៅសាលាចំនួន ២

បានផុស

៣ years មុន

នៅ

ថ្ងៃសៅរ៍ ១៧ មិថុនា ២០២៣

ដោយ

ដើម្បីចូលរួមលើកទឹកចិត្ត និងផ្ដល់ក្ដីស្រលាញ់ដល់ប្អូនៗ ដែលកំពុងសិក្សាក្រេបយកចំណេះវិជ្ជា តារាប្រុស-ស្រី ៣ រូប ព្រមទាំងសប្បុរសជន បានឧបត្ថម្ភថវិកា និងទិញសម្ភារៈសិក្សាចែកសិស្សជាង ៣០០ នាក់ នៅសាលាចំនួន ២ នៃខេត្តស្វាយរៀង និងព្រៃវែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់សិស្សជាង ៣០០ នាក់ នៅក្នុងសាលារៀនចំនួន ២ នោះរួមមាន ៖ សាលាបឋមសិក្សាវត្តបល្ល័ង្កជា (សិស្សចំនួន ១៣៥ នាក់) ស្ថិតនៅភូមិបល្ល័ង្កជាបង្ក័ជា ឃុំចន្ត្រី ស្រុករមាសហែក ខេត្តស្វាយរៀង និងសាលាអនុវិទ្យាល័យហ៊ុនសែនសូរថ្មី(១៥៧ នាក់) ស្ថិតក្នុងឃុំអង្គសរ ស្រុកមេសាង ខេត្តព្រៃវែង។

ចំណែកតារាចម្រៀង និងសម្ដែងទាំង ៣ រូប ដែលឧបត្ថម្ភថវិកា ព្រមទាំងសម្ភារៈសិក្សានោះរួមមាន ៖ ១.តារាសម្ដែងរូបស្រស់កញ្ញា ពេជ្រ ចរណៃ ល្បីខាងក្បាច់គុនល្បុក្កតោបុរាណខ្មែរ ,២.អតីតតារាចម្រៀងអ្នកនាង អេមមី ,លោក ឌឿ វិសាល ហៅ ធូ តារាចម្រៀង និងជាគ្រូពេទ្យស្ម័គ្រចិត្តប្រយុទ្ធប្រឆាំងជំងឺកូវីដ-១៩។ បន្ថែមនោះ ក៏មានសប្បុរសជនជាច្រើន បានចូលរួមឧបត្ថម្ភថវិកា ព្រមទាំងសម្ភារៈសិក្សាផងដែរ។ ចំពោះសម្ភារៈសិក្សារួមមានដូចជា សៀវភៅ ប៊ិច ខ្មៅដៃ ជ័រលុប ,ហ្វឺត ក្រដាសរ៉ាម និងម៉ាស៊ីនព្រីន(សម្រាប់ប្រើប្រាស់កិច្ចការក្នុងសាលារៀន)។

តារាសម្ដែង ពេជ្រ ចរណៃ បានសម្ដែងអារម្មណ៍រំភើប និងរីករាយ បន្ទាប់ពីបានជួបចែករំលែកក្ដីស្រលាញ់។ មិនតែប៉ុណ្ណោះ កញ្ញា ក៏បានផ្ដាំផ្ញើដល់ប្អូនៗ និងក្មួយៗ ឲ្យខិតខំប្រឹងសិក្សាដើម្បីក្រេបយកចំណេះដឹងទៅថ្ងៃអនាគត។

លោកនាយក និង លោកគ្រូ អ្នកគ្រូ ក៏បានថ្លែងអំណរគុណដល់តារាប្រុស-ស្រីទាំង ៣ រូបខាងលើ ព្រមទាំងសប្បុរសជនទាំងអស់ ដែលបានរួមចំណែកចែកក្ដីស្រលាញ់ និងសម្ភារៈសិក្សាដល់ពួកគាត់(សិស្ស)ផងដែរ៕

អត្ថបទ ៖ ចាន់រ៉ា