សម្ដេចតេជោ ហ៊ុន សែន ជំរុញឲ្យពន្លឿនរៀបចំសេចក្ដីព្រាងច្បាប់ ស្ដីពី តុលាការពាណិជ្ជកម្ម

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានជំរុញឲ្យរៀបចំចេញជារូបរាងនូវតុលាការពាណិជ្ជកម្ម នៅអាណត្តិទី ៧ ខាងមុខ។ ការជំរុញរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ “អគារសាលាយុត្ដិធម្ម” របស់ក្រសួងយុត្តិធម៌ នៅព្រឹកថ្ងៃទី ២៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន បានជំរុញឲ្យពន្លឿនការរៀបចំសេចក្ដីព្រាងច្បាប់ ស្ដីពី តុលាការពាណិជ្ជកម្ម ខណៈដែលប្រទេសកម្ពុជា កំពុងមានការអភិវឌ្ឍរីកចម្រើន ដែលត្រូវធ្វើយ៉ាងណាឲ្យមានការជឿជាក់ពីវិនិយោគិន។

សម្ដេចតេជោ ហ៊ុន សែន ថ្លែងបែបនេះថា «កម្មវិធីនៃការកសាងសេចក្ដីព្រាងច្បាប់ គប្បីពន្លឿនច្បាប់ទាក់ទិនជាមួយនឹងតុលាការពាណិជ្ជកម្ម ព្រោះឥឡូវនេះបញ្ហាកាន់តែធំ កាន់តែច្រើន យើងកំពុងតែអភិវឌ្ឍន៍ប្រទេសមួយ ដោយពង្រឹងនូវការជឿជាក់របស់ធុរកិច្ច សម្រាប់ការធ្វើធុរកិច្ចនៅកម្ពុជា»។

សម្ដេចតេជោ ហ៊ុន សែន បានស្នើឲ្យក្រសួងយុត្តិធម៌ និងភាគីពាក់ព័ន្ធទាំងអស់ខិតខំជំរុញឲ្យច្បាប់ ស្ដីពី តុលាការពាណិជ្ជកម្ម ចេញជារូបរាងនៅអាណត្តិទី ៧ ខាងមុខ ដើម្បីកាត់ក្ដីទៅលើសំណុំរឿងពាណិជ្ជកម្ម៕